ଛତ୍ରପୁର,୩।୧୦(ଡି.ଏନ୍.ଏ.): ଗଞ୍ଜାମ ଜିଲା ଛତ୍ରପୁରସ୍ଥିତ ଜିଲା ଟ୍ରେଜେରି କାର୍ଯ୍ୟାଳୟର ଷ୍ଟ୍ରଙ୍ଗରୁମ୍ରେ ହାତୀଦାନ୍ତ ରଖିବାକୁ ସ୍ଥିର ହୋଇଛି । ଦୀର୍ଘ ୧୫ ବର୍ଷ ତଳେ ରମ୍ଭା ୱାଇଲ୍ଡ ଲାଇଫ୍ ରେଞ୍ଜ ଅଞ୍ଚଳରେ ଏକ ଛୋଟ ହାତୀର ମୃତ୍ୟୁ ହୋଇଥିଲା। ତାର ୨ଟି ଦାନ୍ତକୁ ପ୍ରଥମେ ରମ୍ଭା ୱାଇଲ୍ଡ ଲାଇଫ୍ ରେଞ୍ଜ ଅଫିସରେ ରଖାଯାଇଥିଲା। ରମ୍ଭା ୱାଇଲ୍ଡ ଲାଇଫ୍ ଖୋର୍ଦ୍ଧା ଜିଲା ବାଲୁଗାଁସ୍ଥିତ ଚିଲିକା ୱାଇଲ୍ଡ ଲାଇଫ୍ ଡିଭିଜନର ଡିଏଫଓଙ୍କ କାର୍ଯ୍ୟାଳୟ ଅଧୀନରେ ଆସୁଥିବାରୁ ଦାନ୍ତକୁ ସେଠାକୁ ସ୍ଥାନାନ୍ତର କରାଯାଇଥିଲା।
ବର୍ତ୍ତମାନ ସୁଦ୍ଧା ଚିଲିକା ୱାଇଲ୍ଡ ଲାଇଫ୍ ଡିଭିଜନର ଡିଏଫଓଙ୍କ କାର୍ଯ୍ୟାଳୟରେ ହାତୀଦାନ୍ତ ରହିଛି। ପୂର୍ବରୁ ସବୁ ଡିଭିଜନ ଓ ରେଞ୍ଜ ଅଫିସରେ ଥିବା ହାତୀଦାନ୍ତଗୁଡିକୁ ସମ୍ପୃକ୍ତ ଅଞ୍ଚଳର ଟ୍ରେଜେରି ଅଫିସର ଷ୍ଟ୍ରଙ୍ଗରୁମ୍ରେ ରଖାଯାଇଥିଲା ା ହେଲେ କୌଣସି କାରଣରୁ ତାହାକୁ ଷ୍ଟ୍ରଙ୍ଗରୁମ୍ରେ ରଖାଯାଇ ନ ଥିଲା। ଏନେଇ ୱାଇଲ୍ଡଲାଇଫ୍ ପକ୍ଷରୁ ଜିଲାପାଳଙ୍କୁ ଅନୁରୋଧ କରାଯାଇଥିଲା। ଛତ୍ରପୁରସ୍ଥିତ ଗଞ୍ଜାମ ଜିଲା ଟ୍ରେଜେରି ଅଫିସ ଷ୍ଟ୍ରଙ୍ଗରୁମ୍ରେ ହାତୀର ୨ଟି ଦାନ୍ତକୁ ରଖିବାକୁ ଗଞ୍ଜାମ ଜିଲାପାଳଙ୍କ ପକ୍ଷରୁ ସେପ୍ଟେମ୍ବର ୨୭ରେ ଚିଠି (ନଂ.୧୧୫୯)ରେ ଟ୍ରେଜେରି ଅଫିସରଙ୍କୁ ନିର୍ଦ୍ଦେଶ ଦେଇଥିଲେ। ଏହି ପରିପ୍ରେକ୍ଷୀରେ ୨୮ରେ ହାତୀଦାନ୍ତକୁ ଟ୍ରେଜେରି ଅଫିସ ଷ୍ଟ୍ରଙ୍ଗରୁମ୍ରେ ରଖିବାକୁ ଟ୍ରେଜେରି ଅଫିସରଙ୍କ ପକ୍ଷରୁ ଏକ ଚିଠି (ନଂ.୩୧୪୩) ରମ୍ଭା ୱାଇଲ୍ଡ ଲାଇଫ୍ ରେଞ୍ଜ ଅଫିସରଙ୍କୁ ଆସିଛି। ଏ ସମ୍ପର୍କରେ ବାଲୁଗାଁ ଚିଲିକା ୱାଇଲ୍ଡ ଲାଇଫ୍ ଡିଏଫଓଙ୍କୁ ମଧ୍ୟ ଚିଠି କରାଯାଇଛି। ଚଳିତ ମାସ ୧୪ରେ ହାତୀର ୨ ଦାନ୍ତକୁ ଟ୍ରେଜେରି ଅଫିସ ଷ୍ଟ୍ରଙ୍ଗରୁମ୍ରେ ଜମା କରିବାକୁ ଉକ୍ତ ଚିଠିରେ କୁହାଯାଇଛି । ମିଳିଥିବା ସୂଚନା ଅନୁସାରେ ଏହି ହାତୀ ଦାନ୍ତର ଭବିଷ୍ୟତ କ’ଣ ହେବ ସେସମ୍ପର୍କରେ ଭାରତ ସରକାର ନିଷ୍ପତ୍ତି ନେବେ।
