ନୂଆଦିଲ୍ଲୀ, ୧।୩ (ପି.ଟି.)- ହିରୋ ଇଣ୍ଡିଆନ୍ ଓମେନ୍ସ ଲିଗ୍ (ଆଇଡବ୍ଲ୍ୟୁଏଲ୍) ୨୦୨୦-୨୧ ଓଡ଼ିଶାରେ ଆୟୋଜନ ହେବ। ସର୍ବଭାରତୀୟ ଫୁଟ୍ବଲ ମହାସଂଘ (ଏଆଇଏଫ୍ଏଫ୍) ତରଫରୁ ରବିବାର ସ୍ପଷ୍ଟ କରାଯାଇଛି। ଟୁର୍ନାମେଣ୍ଟର ତାରିଖ ଖୁବ୍ ନିକଟରେ ଘୋଷଣା କରାଯିବ। ଓଡ଼ିଶା ସରକାର ଇଭେଣ୍ଟର ଆୟୋଜନ ପାଇଁ ରାଜି ହୋଇଥିବାରୁ ଏଆଇଏଫ୍ଏଫ୍ ସଭାପତି ପ୍ରଫୁଲ୍ଲ ପଟେଲ ଧନ୍ୟବାଦ ଜଣାଇଛନ୍ତି। ଓଡ଼ିଶା ସରକାର ଭାରତୀୟ ଫୁଟ୍ବଲର ବଡ଼ ସମର୍ଥକ। ହିରୋ ଇଣ୍ଡିଆନ ଓମେନ୍ସ ଲିଗ୍ ଆୟୋଜନ ପାଇଁ ସମସ୍ତ ପ୍ରକାର ସାହାଯ୍ୟ ଓ ସମର୍ଥନ ଯୋଗାଇ ଦେବାକୁ ପ୍ରସ୍ତୁତ ଥିବାରୁ ଆମେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏବଂ ରାଜ୍ୟ କ୍ରୀଡ଼ା ବିଭାଗକୁ ଧନ୍ୟବାଦ ଦେଉଛୁ ବୋଲି ସେ କହିଛନ୍ତି। ଦକ୍ଷତା ଓ ପ୍ରତିଭା ପ୍ରତିପାଦନ କରିବା କ୍ଷେତ୍ରରେ ବହୁ ଉଦୀୟମାନ ମହିଳା ଫୁଟ୍ବଲରଙ୍କ ଲାଗି ବର୍ଷ ବର୍ଷ ଧରି ଏହି ଟୁର୍ନାମେଣ୍ଟ ଏକ ପ୍ଲାଟଫର୍ମ ଭଳି କାର୍ଯ୍ୟ କରିଆସୁଛି। ଭାରତ ୨୦୨୨ରେ ଏଏଫ୍ସି ମହିଳା ଏସିଆ କପ୍ ଏବଂ ଏହା ପଛକୁ ୧୭ ବର୍ଷରୁ କମ୍ ମହିଳା ଫିଫା ବିଶ୍ୱକପ୍ ଆୟୋଜନ କରିବାର କାର୍ଯ୍ୟକ୍ରମ ରହିଛି। ଜାତୀୟ ମହିଳା ଦଳ ପାଇଁ ନୂଆ ପ୍ରତିଭା ଚିହ୍ନଟ କ୍ଷେତ୍ରରେ ଆଇଡବ୍ଲ୍ୟୁଏଲ୍ କାର୍ଯ୍ୟ କରିବ ବୋଲି ପଟେଲ କହିଛନ୍ତି।