ଜବଲପୁର,୧୩।୬: ମଧ୍ୟପ୍ରଦେଶର ଜବଲପୁରରେ ଏକ ଅଭାବାନୀୟ ଘଟଣା ଘଟିଛି। ପ୍ରେମିକ ଅନ୍ୟ ଜଣେ ଯୁବତୀଙ୍କୁ ବିବାହ କରିବାରୁ ପ୍ରେମିକା ଏକ ହୃଦୟଥରା କାଣ୍ଡ କରିଛନ୍ତି। ନିଜ ଭଉଣୀଙ୍କ ସହ ମିଶି ପ୍ରେମିକଙ୍କୁ ହତ୍ୟା କରିଛନ୍ତି। ପ୍ରେମିକଙ୍କ ବିବାହର ଚାରି ଦିନ ପରେ ତାଙ୍କୁ ଶେଷଥର ସାକ୍ଷାତ କରିବାକୁ ଡାକି ପ୍ରେମିକା ତାଙ୍କୁ ହତ୍ୟା କରିଥିବା ପୋଲିସ ଆଗରେ ସ୍ବୀକାର କରିଛନ୍ତି।
ପୋଲିସ କହିଛି ଯେ, ମୃତ ବ୍ୟକ୍ତି ଅଭିଯୁକ୍ତ ଯୁବତୀଙ୍କୁ ବିବାହ କରିବାକୁ ପ୍ରତିଶ୍ରୁତି ଦେଇଥିଲେ, କିନ୍ତୁ ତାଙ୍କୁ ବିବାହ ନ କରି ଅନ୍ୟ ଏକ ସ୍ଥାନରେ ବିବାହ କରିଥିଲେ। ଏଥିରେ ପ୍ରେମିକା ରାଗି ଯାଇଥିଲେ। ଏହା ପରେ ସେ ପ୍ରତିଶୋଧ ପାଇଁ ତାଙ୍କୁ ହତ୍ୟା କରିବାକୁ ନିଷ୍ପତ୍ତି ନେଇଥିଲେ। ମୃତ ସୋନୁ ପଟେଲଙ୍କୁ ଶେଷ ଥର ପାଇଁ ସାକ୍ଷାତ କରିବାକୁ ଏକ ଜଙ୍ଗଲକୁ ଡାକିଥିଲେ। ସେଠାରେ ସୋନୁଙ୍କ ହାତ, ପାଦ ଏବଂ ପାଟିରେ ବାନ୍ଧିଥିଲେ। ତା’ପରେ ତାଙ୍କୁ ପଥର ସାହାଯ୍ୟରେ ଛେଚି ହତ୍ୟା କରିଥିଲେ। ସୋନୁ ମେ ୧୨ରେ ବିବାହ କରିଥିଲେ। ବିବାହର ଚାରି ଦିନ ପରେ ଅର୍ଥାତ୍ ମେ ୧୬ରେ ସେ ଘରୁ ବାହାରି ମୋବାଇଲ ମରାମତି ପାଇଁ ସିହୋରା ଯିବେ ବୋଲି କହିଥିଲେ। ସେବେଠାରୁ ସେବେଠାରୁ ସେ ନିଖୋଜ ଥିଲେ ଏବଂ ପରେ ପରିବାର ଲୋକେ ଥାନାରେ ମାମଲା ରୁଜୁ କରିଥିଲେ। ମେ ୨୪ରେ ହରଗଡ ଜଙ୍ଗଲରୁ ମିଳିଥିବା ମୃତ ଦେହର ପୋଷ୍ଟମର୍ଟମ ରିପୋର୍ଟରୁ ସୋନୁ ହତ୍ୟାକାଣ୍ଡର ଗୁମର ଫିଟିଥିଲା।
