ମୁମ୍ବାଇ: ବୁଧବାର ବଲିଉଡ୍ ଇଣ୍ଡଷ୍ଟ୍ରିରେ ଏକ ବଡ଼ ବିବାହ ଅନୁଷ୍ଠିତ ହେବାକୁ ଯାଇଛି। ଅଭିନେତ୍ରୀ ରକୁଲ୍ ପ୍ରୀତ ସିଂ ତାଙ୍କ ପୁରୁଷ ବନ୍ଧୁ ତଥା ଚଳଚ୍ଚିତ୍ର ନିର୍ମାତା ଜ୍ୟାକି ଭଗ୍ନାନୀଙ୍କୁ ବିବାହ କରୁଛନ୍ତି। ଦୁହେଁ ପରସ୍ପରକୁ ଦୀର୍ଘ ସମୟ ଧରି ଡେଟ୍ କରୁଥିବାବେଳେ ବୁଧବାର ଉଭୟ ବିବାହ ବନ୍ଧନରେ ଆବଦ୍ଧ ହେବାକୁ ଯାଉଛନ୍ତି। ତେବେ ବିବାହକୁ ସ୍ବତନ୍ତ୍ର ଓ ସ୍ମରଣୀୟ କରିବା ପାଇଁ ଜ୍ୟାକି ରାକୁଲ୍ଙ୍କ ପାଇଁ ଏକ ସରପ୍ରାଇଜ୍ ଗିଫ୍ଟ ମଧ୍ୟ ରଖିଛନ୍ତି। ବିବାହ ଦିନ ହେଉଥିବା ବିଶେଷ ଆୟୋଜନରେ ଜ୍ୟାକି ନିଜ ସ୍ତ୍ରୀଙ୍କ ପାଇଁ ଏକ ନୂଆ ଗୀତ ଉତ୍ସର୍ଗ କରୁଛନ୍ତି, ଯାହାର ଟାଇଟେଲ୍ ‘ବିନ୍ ତେରେ’ ରଖାଯାଇଛି। ଏହି ଗୀତ ମାଧ୍ୟମରେ ଜ୍ୟାକି ନିଜ ପ୍ରେମ ବ୍ୟକ୍ତ କରିବା ସହ ତାଙ୍କ ଜୀବନର ଏକ ନୂତନ ଇନିଂସ ଆରମ୍ଭ କରିବେ। ଗୀତଟିକୁ ମୟୂର ପୁରୀ ଲେଖିଥିବା ବେଳେ ତନିସ୍କ ବାଗ୍ଚି ଏହାର ସ୍ବର ପ୍ରଦାନ କରିଛନ୍ତି। ଏହି ଗୀତଟି ସମ୍ପୂର୍ଣ୍ଣ ଭାବେ ରକୁଲ୍ ଓ ଜ୍ୟାକିଙ୍କ ପ୍ରେମ କାହାଣୀ ଉପରେ ଉତ୍ସର୍ଗୀକୃତ ରହିଛି।
ଉଭୟ ରକୁଲ ଓ ଜ୍ୟାକିଙ୍କ ବିବାହ ନେଇ ଦୀର୍ଘ ଦିନ ଧରି ଆଲୋଚନା ଚାଲିଥିବା ବେଳେ ବୁଧବାର ଉଭୟ ବିବାହ କରିବେ। ଚଳଚ୍ଚିତ୍ର ନିର୍ମାତା ଭାବେ ଜ୍ୟାକି ଏବଂ ଅଭିନେତ୍ରୀ ଭାବେ ରକୁଲ୍ ବଲିଉଡ ଇଣ୍ଡଷ୍ଟ୍ରିରେ ବେଶ୍ ଜଣାଶୁଣା ଥିବାରୁ ଏହି ବିବାହରେ ବହୁ ତାରକା ଯୋଗ ଦେବାର ସମ୍ଭାବନା ରହିଛି। ବିଭିନ୍ନ ରିପୋର୍ଟକୁ ବିଶ୍ୱାସ କରାଗଲେ, ଏହି ବିବାହରେ ଅନନ୍ୟା ପାଣ୍ଡେ, ଅକ୍ଷୟ କୁମାର, ଆଦିତ୍ୟ ରୟ କପୁର, ବରୁଣ ଧାୱନଙ୍କ ସମେତ ଅନେକ ବଲିଉଡ ତାରକା ଯୋଗ ଦେବେ। ଏହା ବ୍ୟତୀତ ଜ୍ୟାକିଙ୍କ ପ୍ରଡକ୍ସନ୍ ହାଉସ୍ ‘ପୂଜା ଏଣ୍ଟରଟେନମେଣ୍ଟ’ ସହ ଜଡିତ ଥିବା ସମସ୍ତ କର୍ମଚାରୀ ମଧ୍ୟ ଏହି ଗ୍ରାଣ୍ଡ ୱେଡିଂରେ ସାମିଲ ହେବେ। ବିବାହରେ ଅତିଥିମାନଙ୍କ ସୁରକ୍ଷା ଏବଂ ଖାଦ୍ୟପେୟ ଉପରେ ବିଶେଷ ଯତ୍ନ ନିଆଯାଉିଥିବା ସୂଚନା ମିଳିଛି।
