ମୋହାଲି,୬।୩: ଶ୍ରୀଲଙ୍କା ବିପକ୍ଷରେ ଖେଳାଯାଇଥିବା ପ୍ରଥମ ଟେଷ୍ଟ ମ୍ୟାଚ୍ରେ ରବୀନ୍ଦ୍ର ଜାଡେଜା ଏକ ବିରଳ ରେକର୍ଡର ଅଧିକାରୀ ହେବାରୁ ବଞ୍ଚିତ ହୋଇଛନ୍ତି। ମ୍ୟାଚ୍ରେ ୧୭୫ ରନ୍ର ଅପରାଜିତ ଇନିଂସ ଖେଳିଥିବା ଅଲରାଉଣ୍ଡର ଉଭୟ ଇନିଂସ ଯଥାକ୍ରମେ ୫ ଓ ୪ ଉଇକେଟ ନେଇଥିଲେ। ପ୍ରଥମ ଭଳି ଦ୍ୱିତୀୟ ଇନିଂସରେ ୫ ଉଇକେଟ ଅକ୍ତିଆର କରିବାରେ ସଫଳ ହୋଇଥିଲେ ଜାଡେଜା ବିଶ୍ୱର ପ୍ରଥମ କ୍ରିକେଟର ଭାବେ ଗୋଟିଏ ଟେଷ୍ଟରେ ୧୫୦ରୁ ଅଧିକ ରନ୍ କରିବା ସହ ୧୦ ଉଇକେଟ ନେବାର ସଫଳତା ପାଇଥାନ୍ତେ। ଏହି ରେକର୍ଡ କରିବାର ସୁଯୋଗ ତାଙ୍କ ପାଖରେ ଥିଲା। କିନ୍ତୁ ସେ ୪ ଉଇକେଟ ନେବା ପରେ ବୋଲିଂ ନ କରିବାକୁ ନିଷ୍ପତ୍ତି ନେଇଥିଲେ। ଏହା ପଛର କାରଣ ମ୍ୟାଚ୍ ପରେ ପ୍ରକାଶ କରିଥିଲେ ସାଥି ଅଲରାଉଣ୍ଡର ରବିଚନ୍ଦ୍ରନ ଅଶ୍ୱିନ।
“ମ୍ୟାଚ୍ରେ ଜୟନ୍ତ ଯାଦବଙ୍କୁ ଅଧିକ ବୋଲିଂ କରିବାକୁ ମିଳୁ ନ ଥିବା ଆମେ ଅନୁଭବ କରିଥିଲୁ। ସେ ଦଳର ତୃତୀୟ ସ୍ପିନର ହୋଇଥିବାରୁ ତାଙ୍କୁ ସାଥିରେ ନେଇ ଚାଲିବା ଆମ ଦାୟିତ୍ୱ। ଏଣୁ ଜାଡୁ ତାଙ୍କ ଓଭର ଜୟନ୍ତଙ୍କୁ ବୋଲିଂ କରିବାକୁ ଦେଇଥିଲେ” ବୋଲି ଅଶ୍ୱିନ ମ୍ୟାଚ୍ ପରେ କହିଛନ୍ତି।