ମୋହାଲି,୭।୩: ରବୀନ୍ଦ୍ର ଜାଡେଜାଙ୍କ ଅଲରାଉଣ୍ଡିଂ ପ୍ରଦର୍ଶନ ବଳରେ ଭାରତୀୟ ଦଳ ଏକ ଇନିଂସ ଏବଂ ୨୨୨ ରନ୍ରେ ଶ୍ରୀଲଙ୍କାକୁ ହରାଇ ଦେଇଛି। ମ୍ୟାଚ୍ରେ ୧୭୫ ରନ୍ର ଅପରାଜିତ ଇନିଂସ ଖେଳିବା ସହିତ ଉଭୟ ଇନିଂସରେ ୯ ଉଇକେଟ ନେଇଥିଲେ। ଏଭଳି ପ୍ରଦର୍ଶନ ଯୋଗୁ ତାଙ୍କୁ ମିଳିଥିଲା ମ୍ୟାନ୍ ଅଫ୍ ଦି ମ୍ୟାଚ୍ ପୁରସ୍କାର। ତେବେ ମୋହାଲିର ଆଇଏସ୍ ବିନ୍ଦ୍ରା ପିସିଏ ଷ୍ଟାଡିୟମ୍ରେ ଜାଡେଜାଙ୍କ ପାଇଁ ଏହା କିଛି ନୂଆ କଥା ନୁହେଁ। ଏହି ଗ୍ରାଉଣ୍ଡରେ ସେ ପୂର୍ବରୁ ଦୁଇ ଥର ମ୍ୟାନ୍ ଅଫ୍ ଦି ମ୍ୟାଚ୍ ପୁରସ୍କାର ହାତେଇଥିଲେ।
୨୦୧୫ରେ ଦକ୍ଷିଣ ଆଫ୍ରିକା ବିପକ୍ଷରେ ଜାଡେଜା ଭାରତ ପାଇଁ ସର୍ବାଧିକ ୮ ଉଇକେଟ ନେଇଥିଲେ। ତା’ ପର ବର୍ଷ ଇଂଲଣ୍ଡ ବିପକ୍ଷ ଟେଷ୍ଟରେ ୯୦ ରନ୍ର ଇନିଂସ ଖେଳିବା ପରେ ୪ ଉଇକେଟ ଅକ୍ତିଆର କରି ନିଜ ନାମରେ କରିଥିଲେ ମ୍ୟାନ୍ ଅଫ୍ ଦି ମ୍ୟାଚ୍ ପୁରସ୍କାର। କେବଳ ଥରେ ୨୦୧୩ରେ ଏହି ଗ୍ରାଉଣ୍ଡରେ ଖେଳାଯାଇଥିବା ଟେଷ୍ଟରେ ଶ୍ରେଷ୍ଠ ଖେଳାଳି ପୁରସ୍କାର ପାଇ ନ ଥିଲେ ଜାଡେଜା। ସେଥର ଅଷ୍ଟ୍ରେଲିଆ ବିପକ୍ଷରେ ଶିଖର ଧାଓ୍ବନ ତାଙ୍କ ପଦାର୍ପଣ ମ୍ୟାଚ୍ରେ ଖେଳିଥିଲେ ୧୮୭ ରନ୍ର ବିସ୍ଫୋରକ ଇନିଂସ। ଏହି ମ୍ୟାଚ୍ରେ ମଧ୍ୟ ସିଏସ୍କେ ଅଲରାଉଣ୍ଡର ୬ ଉଇକେଟ ଅକ୍ତିଆର କରିଥିଲେ। ମୋହାଲି ଗ୍ରାଉଣ୍ଡରେ ମାତ୍ର ୪ ଟେଷ୍ଟରେ ଜାଡେଜା ମୋଟ ୩୨୭ ରନ୍ କରିବା ସହ ୨୭ ଉଇକେଟ ନେଇଛନ୍ତି।
“ଏହା ମୋ ପାଇଁ ଲକି ଗ୍ରାଉଣ୍ଡ। ଯେତେବେଳେ ବି ଏଠାକୁ ଆସେ ମୁଁ ଭଲ ପ୍ରଦର୍ଶନ କରେ। ଉଭୟ ବ୍ୟାଟ ଏବଂ ବଲରେ ପ୍ରଦର୍ଶନ କରିପାରି ଥିବାରୁ ମୁଁ ଅତ୍ୟନ୍ତ ଖୁସି। ଏଭଳି ପ୍ରଦର୍ଶନ କରିବା ପରେ ଆତ୍ମବିଶ୍ୱାସ ଆସେ” ବୋଲି ୩୩ ବର୍ଷୀୟ ଅଲରାଉଣ୍ଡର କହିଛନ୍ତି।
