ମୋହାଲି,୬।୩: ଶ୍ରୀଲଙ୍କା ବିପକ୍ଷରେ ଏଠାରେ ଖେଳାଯାଉଥିବା ପ୍ରଥମ ଟେଷ୍ଟରେ ଚମକିଛନ୍ତି ରବୀନ୍ଦ୍ର ଜାଡେଜା । ପ୍ରଥମେ ବ୍ୟାଟିଂ ପରେ ଏବେ ବୋଲିଂରେ ଦମ୍ଦାର ପ୍ରଦର୍ଶନ କରିଛନ୍ତି ସେ । ଶନିବାର ଭାରତ ପାଇଁ ୭ମ ଉଇକେଟରେ ସର୍ବାଧିକ ବ୍ୟକ୍ତିଗତ ସ୍କୋର କରିଥିବା ଖେଳାଳି ଭାବେ ସେ ଗୌରବ ଅର୍ଜନ କରିଥିଲେ। ରବିବାର ସେ ବୋଲିଂରେ ଅନ୍ୟ ଏକ କୀର୍ତ୍ତିମାନ ସ୍ଥାପନ କରିଛନ୍ତି । ଗୋଟିଏ ଟେଷ୍ଟରେ ୧୫୦ରୁ ଅଧିକ ରନ୍ ଏବଂ ୫ଟି ଉଇକେଟ ନେବାରେ ସେ ବିଶ୍ୱର ଷଷ୍ଠ କ୍ରିକେଟର ପାଲଟିଛନ୍ତି। ଜାଡ଼େଜା ତୃତୀୟ ଭାରତୀୟ କ୍ରିକେଟର ଭାବେ ଏହି ରେକର୍ଡ ନିଜ ନାମରେ କରିଛନ୍ତି।
ଶନିବାର ଭାରତ ୮ଟି ଉଇକେଟ ହରାଇ ୫୭୪ ରନ୍ କରିଥିବା ବେଳେ ଅଧିନାୟକ ରୋହିତ ଶର୍ମା ପାଳି ଘୋଷଣା କରିଥିଲେ। ତେବେ ଭାରତର ପ୍ରଥମ ଇନିଂସରେ ୭ ନମ୍ବରରେ ବ୍ୟାଟିଂ କରିବାକୁ ଆସିଥିବା ଜାଡେଜା ୧୭୫ ରନ୍ କରି ଅପରାଜିତ ରହିଥିଲେ। ସେ ୨୨୮ଟି ବଲ୍ର ସମ୍ମୁଖୀନ ହୋଇଥିବା ବେଳେ ୧୭ଟି ଚୌକା ଓ ୩ଟି ଛକା ମାରିଥିଲେ। ବ୍ୟାଟିଂ ଭଳି ବୋଲିଂରେ ମଧ୍ୟ ଜାଡେଜାଙ୍କ ଯାଦୁ ଦେଖିବାକୁ ମିଳିଛି। ଶ୍ରୀଲଙ୍କାର ପ୍ରଥମ ଇନିଂସରେ ସେ ୧୩ ଓଭର ବୋଲିଂ କରିଥିବା ଜାଡେଜା ୪୧ ରନ ଦେଇ ୫ଟି ଉଇକେଟ ନେଇଛନ୍ତି । ଏହି ୧୩ ଓଭରରୁ ୪ଟି ମେଡେନ ଓଭର ଥିଲା।
ଅପରପକ୍ଷେ ପ୍ରଥମ ଇନିଂସରେ ଶ୍ରୀଲଙ୍କା ୧୭୪ ରନ୍ରେ ଅଲଆଉଟ ହୋଇଯିବାରୁ ଭାରତ ଫଲୋ-ଅନ ଦେଇଛି। ଏଣୁ ଭ୍ରମଣକାରୀ ଦଳ ତା’ର ଦ୍ୱିତୀୟ ଇନିଂସ ଖେଳ ଆରମ୍ଭ କରିଛି।
