ବୋଲଗଡ଼,୪ା୧୧(ଡି.ଏନ୍.ଏ.): ଧାନରେ ଶ୍ରୀଜଗନ୍ନାଥଙ୍କ ପ୍ରତିକୃତି କରି ଚର୍ଚ୍ଚାକୁ ଆସିଛନ୍ତି ଖୋର୍ଦ୍ଧା ଜିଲା ବୋଲଗଡ଼ ବ୍ଲକ ଅଧୀନ ମର୍ଦ୍ଦାବାଡି ଗ୍ରାମର ଚନ୍ଦନ ପଶ୍ଚିମକବାଟ। ସେ ପରମାନନ୍ଦ ମହାବିଦ୍ୟାଳୟର ଯୁକ୍ତ ୨ ପ୍ରଥମ ବର୍ଷ ଛାତ୍ର ହୋଇଥିବା ବେଳେ ଯେକୌଣସି ଚିତ୍ରକୁ ଦେଖି ଅବିକଳ ଆଙ୍କି ଦେଇପାରନ୍ତି। ପଟ୍ଟଚିତ୍ରର ଅବିକଳ ନକଲ କରି ଆଙ୍କିବାରେ ମଧ୍ୟ ସେ ସିଦ୍ଧହସ୍ତ। ଏଥପାଇଁ କୌଣସି ପ୍ରଶିକ୍ଷଣ ନେଇ ନ ଥିବା ବେଳେ ପିଲାଦିନୁ ତାଙ୍କର ଏଥିପ୍ରତି ବିଶେଷ ଆଗ୍ରହ ଥିବା ଚନ୍ଦନ କହିଛନ୍ତି। ଆଜି ପର୍ଯ୍ୟନ୍ତ ସେ ହ୍ୟାଣ୍ଡମେଡ୍ ପେପର, କାନଭାସ ଚିତ୍ର, ମାଟି ମୂର୍ତ୍ତି, ପଟ୍ଟଚିତ୍ର ବିଭିନ୍ନ ଅଦରକାରୀ ସାମଗ୍ରୀରୁ ସୁନ୍ଦର ଉପକରଣ ପ୍ରସ୍ତୁତ କରୁଛନ୍ତି। ଏବେ ଧାନରେ ଶ୍ରୀଜଗନ୍ନାଥଙ୍କ ପ୍ରତିକୃତି କରି ଚର୍ଚ୍ଚାକୁ ଆସିଛନ୍ତି। ଚିତ୍ର ଆଙ୍କିବା ତାଙ୍କର ଏକ ନିଶା। ତାଙ୍କ ବାପା ଗଣେଶ୍ୱର ପଶ୍ଚିମକବାଟ ଜଣେ ଦିନମଜୁରିଆ ଓ ମା’ ଟିକିନା ପଶ୍ଚିମକବାଟ ଜଣେ ଗୃହିଣୀ। ସରକାରଙ୍କ ପକ୍ଷରୁ ସହାୟତା ମିଳିଲେ ସେ ଆଗକୁ ବଢ଼ିପାରିବେ ବୋଲି କହିଛନ୍ତି।
