ଭୁବନେଶ୍ୱର, ୧୭ା୩ (ବ୍ୟୁରୋ): ଓଡ଼ିଶା ଓ ଅନ୍ୟ ୬ ରାଜ୍ୟରେ ମହାପ୍ରଭୁ ଶ୍ରୀଜଗନ୍ନାଥଙ୍କ ନାମରେ ଥିବା ୩୫,୨୭୨ ଏକର ଜମିକୁ ବିକ୍ରି କରାଯିବା ନିମନ୍ତେ ରାଜ୍ୟ ସରକାର ପ୍ରକ୍ରିୟା ଆରମ୍ଭ କରିଛନ୍ତି। ଭାଜପା ବିଧାୟକ ମୋହନ ଚରଣ ମାଝିଙ୍କ ଏକ ପ୍ରଶ୍ନର ଲିଖିତ ଉତ୍ତର ଦେଇ ମଙ୍ଗଳବାର ଆଇନ ମନ୍ତ୍ରୀ ପ୍ରତାପ ଜେନା ବିଧାନସଭାରେ ଏହି ସୂଚନା ଦେଇଛନ୍ତି। ତତ୍କାଳୀନ ରାଜ୍ୟପାଳ ବି.ଡି. ଶର୍ମାଙ୍କ ଅଧ୍ୟକ୍ଷତାରେ ଗଠିତ କମିଟିର ସୁପାରିସ ଅନୁଯାୟୀ ସରକାର ୩୫,୨୭୨.୨୩୫ ଏକର ଜମି ବିକ୍ରି କରିବା ଲାଗି ଆବଶ୍ୟକ ପଦକ୍ଷେପ ନେଉଛନ୍ତି। ରାଜ୍ୟର ୩୦ ଜିଲା ମଧ୍ୟରୁ ୨୪ ଜିଲାରେ ଜଗନ୍ନାଥଙ୍କ ୬୦,୪୨୬.୯୪୩ ଏକର ଜମି ରହିଛି। ଏଥିମଧ୍ୟରୁ ଶ୍ରୀମନ୍ଦିର ପ୍ରଶାସନ ୩୪,୮୭୬.୯୮୩ ଏକର ଉପରେ ଚୂଡ଼ାନ୍ତ ମାଲିକାନା ସ୍ବତ୍ୱ(ଆର୍ଓଆର୍) କରିବାକୁ ସ୍ଥିର କରିଛନ୍ତି। ରାଜ୍ୟ ସରକାରଙ୍କ ଦ୍ୱାରା ସ୍ବୀକୃତ ଏକକ ନୀତି(ସମାନ ନୀତି) ଅନୁଯାୟୀ ଏଭଳି ପଦକ୍ଷେପ ନିଆଯାଉଛି ବୋଲି ମନ୍ତ୍ରୀ ଗୃହରେ ପ୍ରକାଶ କରିଛନ୍ତି। ଓଡ଼ିଶା ବ୍ୟତୀତ ଅନ୍ୟ ୬ ରାଜ୍ୟରେ ୩୯୫.୨୫୨ ଏକର
ଜମି ବିକ୍ରି ହେବା ଲାଗି ମଧ୍ୟ ପ୍ରସ୍ତୁତି ଚାଲିଛି। ଏନେଇ ସରକାର ସମ୍ପୃକ୍ତ ଜିଲାପାଳଙ୍କୁ ତୁରନ୍ତ ପଦକ୍ଷେପ ନେବାକୁ ଲିଖିତ ଭାବେ ଜଣାଇଛନ୍ତି।
ମିଳିଥିବା ସୂଚନା ଅନୁସାରେ ଦ୍ୱାଦଶ ଶତାବ୍ଦୀର ଏହି ମନ୍ଦିରର ଜମି ରାଜ୍ୟ ବାହାରେ ସର୍ବାଧିକ ୩୩୨.୯୩୦ ଏକର ପଶ୍ଚିମବଙ୍ଗରେ ରହିଛି। ସେହିପରି ୨୮.୨୧୮ ଏକର ମହାରାଷ୍ଟ୍ରରେ, ୨୫.୧୧୦ ଏକର ମଧ୍ୟପ୍ରଦେଶ, ୧୭.୦୨୦ ଏକର ଆନ୍ଧ୍ରପ୍ରଦେଶ, ୧.୭୦୦ ଏକର ଛତିଶଗଡ଼ ଏବଂ ବିହାରରେ ୦.୨୭୪ ଏକର ଜମି ଅଛି। ମନ୍ତ୍ରୀ ଆହୁରି କହିଛନ୍ତି, ୧୦୦ ଏକର ବାଘା ଅଞ୍ଚଳରେ ଚିହ୍ନଟ କରାଯାଇଥିବାବେଳେ ସରକାର ଉକ୍ତ ଜମିରୁ ଭାଗଚାଷୀଙ୍କ ଠାରୁ ନିର୍ଦ୍ଧାରିତ ଭାଗ ସଂଗ୍ରହ କରୁଛନ୍ତି। ଏଥିପାଇଁ ଜଣେ ଖମାରିଙ୍କୁ ବାଘାରେ ଏବଂ ଅନ୍ୟ ଜଣଙ୍କୁ ଦୋଚାଇନରେ ନିୟୋଜିତ କରାଯାଇଛି। ଏଥିସହିତ ଦୋଚାଇନ୍ରୁ ସଂଗ୍ରହ ହେଉଥିବା ଧାନକୁ ପ୍ରତ୍ୟେକ ବର୍ଷ ମଧ୍ୟ ବିକ୍ରି କରାଯାଉଛି। ଖୋର୍ଦ୍ଧା ଅଞ୍ଚଳରେ ଥିବା ୫୮୨.୨୫୫ ଏକର ଜମିକୁ ଓଡ଼ିଶା କାଜୁ ବିକାଶ ନିଗମକୁ ଲିଜ୍ ସୂତ୍ରରେ ଦିଆଯାଇଛି। ଏହାର ପ୍ରତିବଦଳରେ ସରକାର ବାର୍ଷିକ ୩ଲକ୍ଷ ଟଙ୍କା ନିଗମଠାରୁ ପାଉଛନ୍ତି ବୋଲି ମନ୍ତ୍ରୀ କହିଛନ୍ତି।
ମିଳିଥିବା ସୂଚନା ଅନୁସାରେ ଶ୍ରୀମନ୍ଦିର ଜମିକୁ ଯେଉଁମାନେ ୩୦ବର୍ଷରୁ ଊର୍ଦ୍ଧ୍ୱ ସମୟ ଧରି ଅକ୍ତିଆର କରି ରଖିଛନ୍ତି, ସେମାନେ ତାହାକୁ ନିଜ ଦଖଲକୁ ନେବାକୁ ଚାହିଁଲେ ଏକର ପିଛା ୬ଲକ୍ଷ ଟଙ୍କା ସରକାରଙ୍କୁ ଦେବାକୁ ପଡ଼ିବ। ଆଉ ଯେଉଁମାନେ ୨୦ବର୍ଷରୁ ଊର୍ଦ୍ଧ୍ୱ ଏବଂ ୩୦ବର୍ଷରୁ କମ୍ ସମୟ ଧରି ରଖିଛନ୍ତି ସେମାନେ ଏକର ପିଛା ୯ଲକ୍ଷ ଟଙ୍କା ଦେଇ ଜମି ଦଖଲକୁ ନେଇପାରିବେ। ସେହିପରି ୨୦ବର୍ଷରୁ କମ୍ ଏବଂ ୧୨ବର୍ଷରୁ ଅଧିକ ସମୟ ଧରି ଜମି ଅକ୍ତିଆର କରିଛନ୍ତି ସେମାନେ ଏକର ପିଛା ୧୫ଲକ୍ଷ ଟଙ୍କା ଦେବେ। ଆଇନ ମନ୍ତ୍ରୀ ପୁଣି କହିଛନ୍ତି, ସରକାର ମନ୍ଦିର ଜମି ସଂକ୍ରାନ୍ତ ଘଟଣାର ତଦନ୍ତ ଓ ସଂସ୍କାର ଆଣିବା ନିମନ୍ତେ ବିଭିନ୍ନ ସମୟରେ ୪ଟି କମିଶନ ଗଠନ କରିଛନ୍ତି। ବି.ଡି. ଶର୍ମାଙ୍କ ଅଧ୍ୟକ୍ଷତାରେ ଗଠିତ କମିଟି ସହ ଜଷ୍ଟିସ୍ ବି.କେ. ପାତ୍ର କମିଶନ, ଜଷ୍ଟିସ ପି.କେ. ମହାନ୍ତି କମିଶନ ଏବଂ ଜଷ୍ଟିସ୍ ବି.ପି. ଦାସ କମିଶନ କାର୍ଯ୍ୟ କରିଛନ୍ତି। କମିଶନଙ୍କ ବିଭିନ୍ନ ପ୍ରସ୍ତାବକୁ କାର୍ଯ୍ୟକାରୀ କରିବା ନିମନ୍ତେ ଶ୍ରୀମନ୍ଦିର ମୁଖ୍ୟ ପ୍ରଶାସକଙ୍କ ଅଧ୍ୟକ୍ଷତାରେ ଏକ କମିଟି ଗଠିତ ହୋଇଛି, ଯାହାକି ଶ୍ରୀଜଗନ୍ନାଥ ମନ୍ଦିର ପରିଚାଳନା କମିଟି ଦ୍ୱାରା ସ୍ବୀକୃତ।