ଆନନ୍ଦପୁର,୫ା୪(ସ୍ବ.ପ୍ର.): ପୁରୁଣା ମାମଲାର ବିଚାର କରି ରାହୁଲ ଗାନ୍ଧୀଙ୍କୁ ସର୍ବାଧିକ ଦୁଇ ବର୍ଷର ଦଣ୍ଡାଦେଶ ଓ ୨୪ ଘଣ୍ଟା ମଧ୍ୟରେ ଏମ୍ପି ପଦ ରଦ୍ଦ କରିବା ଘଟଣାକୁ ନେଇ ଆନନ୍ଦପୁରର ବରିଷ୍ଠ କଂଗ୍ରେସ ନେତା ତଥା ପୂର୍ବତନ ପିସିସି ସଭାପତି ତଥା ପୂର୍ବତନ ମନ୍ତ୍ରୀ ଜୟଦେବ ଜେନା ବୁଧବାର ଏକ ପ୍ରେସ୍ ମିଟ୍ ଜରିଆରେ କେନ୍ଦ୍ର ସରାକାରଙ୍କୁ ଭର୍ତ୍ସନା କରିବା ସହିତ ଦେଶରେ ଗଣତନ୍ତ୍ର ବ୍ୟବସ୍ଥା ସମ୍ପୂର୍ଣ୍ଣ ଭୁଶୁଡ଼ି ପଡ଼ିଥିବା ପ୍ରକାଶ କରିଛନ୍ତି। ଦେଶ ସ୍ବାଧୀନ ହେବା ପରଠାରୁ ରାହୁଲ ଗାନ୍ଧୀ ପ୍ରଥମ ନେତା ଯାହାଙ୍କ ନାମରେ ମାନହାନି ମୋକଦ୍ଦମା ଦାୟର କରାଯାଇ ସର୍ବାଧିକ ଦୁଇ ବର୍ଷର ଦଣ୍ଡାଦେଶ ଶୁଣାଣି କରାଯିବା ଉଦ୍ବେଗର କାରଣ ପାଲଟିଛି। କେନ୍ଦ୍ର ଭାଜପା ସରକାରଙ୍କ ହୀନମନ୍ୟତାର ଜବାବ ୨୦୨୪ ନିର୍ବାଚନରେ ମିଳିବ ବୋଲି ଜେନା କହିଛନ୍ତି। ପୂର୍ବରୁ ଅନେକବାର କଂଗ୍ରେସର ସୋନିଆ ଗାନ୍ଧୀ ହୁଅନ୍ତ କି ରାହୁଲ ସେମାନଙ୍କ ବିରୋଧରେ ଆପତ୍ତିଜନକ ମନ୍ତନ୍ତ୍ୟ ଦେଇଆସୁଥିବା ଭାଜପା ନେତା ରାହୁଲଙ୍କ ସାମାନ୍ୟ ମନ୍ତବ୍ୟକୁ ନେଇ ମାନହାନି ମକୋଦ୍ଦମା ଦାୟର କରିବା ଗଣତନ୍ତ୍ରକୁ ପ୍ରଭାବିତ କରିଥିବା ପ୍ରକାଶ କରିଛନ୍ତି। ସେହିପରି କେନ୍ଦ୍ରର ଭାଜପା ସରକାର ଦେଶର ଅର୍ଥନୀତିକୁ ପୁଞ୍ଜିପତିଙ୍କ ହାତରେ ନ୍ୟସ୍ତ କରି ଲୋକଙ୍କ ସାଧାରଣ ଜୀବନଶୈଳୀକୁ ପ୍ରଭାବିତ କରାଯାଉଥିବା ଭଳି ଅଭିଯୋଗ ଆଣିଛନ୍ତି ଶ୍ରୀକାନ୍ତ। ଏଭଳି ଘଟଣାକୁ ନେଇ ଆନନ୍ଦପୁର ନିର୍ବାଚନମଣ୍ଡଳୀରେ କଂଗ୍ରେସ ଜୟ ଭାରତ ସତ୍ୟାଗ୍ରହ ମାଧ୍ୟମରେ ତୃଣମୂଳ ସ୍ତରରେ ଲୋକଙ୍କ ନିକଟତର ହେବାକୁ ନିଷ୍ପତ୍ତି ନେଇଥିବା ପୂର୍ବତନ ପିସିସି ସଭାପତି ଜୟଦେବ ପ୍ରକାଶ କରିଛନ୍ତି। କେନ୍ଦୁଝର ଜିଲା କଂଗ୍ରେସ ସାଧାରଣ ସମ୍ପାଦକ ହାଡିବନ୍ଧୁ ଖୁଣ୍ଟିଆଙ୍କ ସଂଯୋଜନାରେ ଆୟୋଜିତ ଏହି ପ୍ରେସ୍ ମିଟ୍ରେ ବରିଷ୍ଠ କଂଗ୍ରେସ ନେତା ଶ୍ରୀଧର ଦଳେଇ, ଅକ୍ଷୟ ମହାନ୍ତି, ନିକୁଞ୍ଜ ବିହାରୀ ମିଶ୍ର, ଯୁବ କଂଗ୍ରେସ ନେତା ବିଷ୍ଣୁ ପ୍ରସାଦ ସାହୁ ପ୍ରମୁଖ ଉପସ୍ଥିତ ରହିଥିଲେ।