ଯେତେବେଳେ କୌଣସି ବ୍ୟକ୍ତି ଜୀବନର ପ୍ରଥମ ଚାକିରି ଆରମ୍ଭ କରନ୍ତି ସେତେବେଳେ ଚେଷ୍ଟା କରିଥାନ୍ତି ତାଙ୍କ ନିଯୁକ୍ତି ସମୟର ଫଟୋ ସବୁଠୁ ଭଲ ହେଉ। ମାତ୍ର ଜର୍ମାନୀର ଜଣେ ଯୁବକ ପ୍ରଥମ ଚାକିରିରେ ଯାହା କରିଛନ୍ତି ତାହା ଶୁଣିଲେ ଆଶ୍ଚର୍ଯ୍ୟ ହେବେ। ତାଙ୍କର ସାମାନ୍ୟ ଭୁଲ ପାଇଁ ତାଙ୍କୁ ଘରେ ରହିବାକୁ ପଡ଼ିଲା। ଏଥିଯୋଗୁ ତାଙ୍କ ଇଣ୍ଟର୍ନଶିପ୍ ମଧ୍ୟ ଶେଷ ହେଲା।
ଜର୍ମାନୀର ବର୍ଲିନ-ବ୍ରେଡେନବର୍ଗ ମହାନଗର ଅଞ୍ଚଳରେ ରହୁଥିବା ଜେବିଏ ହିଡରିଙ୍ଗ୍ ଜେଲ୍ରେ ଇଣ୍ଟର୍ନଶିପ୍ ପାଇଥିଲେ। ଯୁବକଙ୍କ ବନ୍ଧୁ ତାଙ୍କ ନୂଆ ଚାକିରି ସମ୍ପର୍କରେ ଜାଣିବା ପାଇଁ ଚାହିଁଥିଲେ। ତେଣୁ ଜେବିଏ ନିଜ ବନ୍ଧୁଙ୍କୁ ଦେଖାଇବାକୁ ଚାହୁଁଥିଲେ କି ତାଙ୍କ ଚାକିରି କେତେ ଭଲ। ଏଥିପାଇଁ ଜେବିଏ ଜେଲ ଭିତରର ଫଟୋ ବି ଉଠାଇ ବନ୍ଧୁଙ୍କ ନିକଟକୁ ପଠାଇଥିଲେ। ଏହି ଫଟୋରେ ଜେଲ୍ର ସମସ୍ତ ଚାବିପେନ୍ଥା ମଧ୍ୟ ଥିଲା।
ଏହି ଫଟୋକୁ ସେ ତାଙ୍କ ବନ୍ଧୁଙ୍କ ନିକଟକୁ ହ୍ବାଟ୍ସ୍ଆପ ଜରିଆରେ ପଠାଇଥିଲେ। ପଠାଇଥିବା ଫଟୋରେ ଜେଲ୍ର ସବୁଠୁ ଗୁରୁତ୍ୱପୂର୍ଣ୍ଣ ଚାବି ନଜର ଆସିଥିଲା। ଏଥିରେ ଜେଲ୍ର ସମସ୍ତ କୋଠରି ଚାବି ଥିଲା। ଚାବିର ଫଟୋ ସାର୍ବଜନିକ ହେବା ପରେ ଜେଲ୍ କର୍ତ୍ତୃପକ୍ଷ ଆଶ୍ଚର୍ଯ୍ୟ ହୋଇଯାଇଥିଲେ। କାରଣ ଏହି ଜେଲ୍ରେ ମୋଟ୍ ୬୫୭ କଏଦୀ ରହୁଥିଲେ। ଫଟୋ ଦେଖି କଏଦୀମାନେ ନକଲି ଚାବି ତିଆରି କରି ସହଜରେ ଜେଲ୍ରୁ ଖସି ପଳାଇବେ। ଯୁବକଙ୍କ ଫଟୋ ଉଠାଇବା ପରେ କୌଣସି ମନ୍ଦ ଉଦ୍ଦେଶ୍ୟ ନ ଥିଲା। ମାତ୍ର ଏଥିରେ ଜେଲ୍ର ସୁରକ୍ଷା ବିପଦପୂର୍ଣ୍ଣ ହୋଇଥିଲା। ତେଣୁ ଜେଲ କର୍ତ୍ତୃପକ୍ଷ ୬୦୦ ତାଲାକୁ ବଦଳାଇବା ପାଇଁ ନିଷ୍ପତ୍ତି ନେଇଥିଲେ।