ମୁମ୍ବାଇ,୪।୧ : ଜୈନ ସମ୍ପ୍ରଦାୟ ପକ୍ଷରୁ ଗୁଜରାଟ ଏବଂ ଝାଡ଼ଖଣ୍ଡ ସରକାରଙ୍କ ବିରୋଧରେ ପ୍ରଦର୍ଶନ କରାଯାଇଛି। ବୁଧବାର ମହାରାଷ୍ଟ୍ରର ରାଜଧାନୀ ମୁମ୍ବାଇରେ ଏଭଳି କରାଯାଇଛି। ଝାଡ଼ଖଣ୍ଡ ସରକାରଙ୍କ ପକ୍ଷରୁ ଶ୍ରୀ ସମ୍ମେଦ ଶିଖରଜୀକୁ ପର୍ଯ୍ୟଟନ ସ୍ଥଳୀ ଭାବରେ ଘୋଷଣା କରିବା ଏବଂ ଗୁଜରାଟର ପଲିତାନା ଠାରେ ଥିବା ଜୈନ ମନ୍ଦିରକୁ ଭଙ୍ଗାରୁଜା କରିବାକୁ ନେଇ ଏକ ବିରାଟ ବିରୋଧ ପ୍ରଦର୍ଶନ କରାଯାଇଥିଲା। ହଜାର ହଜାର ଲୋକ ରାସ୍ତାରେ ପ୍ରଦର୍ଶନ କରିଥିଲେ। ମୁମ୍ବାଇର ଆଜାଦ ମଇଦାନରେ ଜୈନ ସମାଜର ଏକ ବଡ ଆନ୍ଦୋଳନ ହୋଇଥିଲା। ଜୈନ ସମାଜର ଏହି ରାଲି ମୁମ୍ବାଇ ମେଟ୍ରୋ ସିନେମାରୁ ଆରମ୍ଭ ହୋଇ, ଆଜାଦ ମଇଦାନରେ ସମାବେଶ ସହିତ ଶେଷ ହୋଇଥିଲା।
ବୁଧବାର ସକାଳୁ ଜୈନ ସମାଜର ପ୍ରଦର୍ଶନ ଆରମ୍ଭ ହୋଇଥିଲା। ଲୋକ ରାସ୍ତା ଅବରୋଧ କରାଯାଇ ତୀର୍ଥସ୍ଥାନ ମୁକ୍ତ କରିବାକୁ ଦାବି କରିଥିଲେ।
ଝାଡ଼ଖଣ୍ଡ ସରକାର ଜୈନ ସମ୍ପ୍ରଦାୟର ଦିଗମ୍ବର ଶ୍ୱେତାମ୍ବର ସମାଜର ପବିତ୍ର ସ୍ଥାନ ପ୍ରଭୁ ପରସନାଥ ପର୍ବତକୁ ଏକ ପର୍ଯ୍ୟଟନ ସ୍ଥଳ ଭାବରେ ଘୋଷଣା କରିଛନ୍ତି। ଯେଉଁ କାରଣରୁ ସେଠାରେ ହୋଟେଲ ଖୋଲିବ। ଏହି ପରିବର୍ତ୍ତନକୁ ନେଇ ଜୈନ ସମାଜ ଅସନ୍ତୁଷ୍ଟ ହୋଇ ବିରୋଧ କରିବାକୁ ରାସ୍ତାକୁ ଓହ୍ଲାଇଛନ୍ତି। ଗୁଜରାଟର ଭବନଗର ଜିଲା ଅନ୍ତର୍ଗତ ପାଲିତାନାର ଶତ୍ରୁଞ୍ଜୟ ପାହାଡ ଉପରେ ଥିବା ବୋର୍ଡ ଏବଂ ଲୁହା ସ୍ତମ୍ଭକୁ ଭଙ୍ଗାରୁଜା କରାଯାଇଛି। ସ୍ତମ୍ଭରେ ଲଗାଯାଇଥିବା ସିସିଟିଭି କ୍ୟାମେରାରେ ପୁରା ଘଟଣା କଏଦ ହୋଇଛି। ସେବେଠାରୁ ସେଠ ଆନନ୍ଦଜୀ କଲ୍ୟାଣଜୀ ଟ୍ରଷ୍ଟ ଏବଂ ନୀଳକଣ୍ଠ ମହାଦେବ ସେବା ସମିତି ଦୁଇ ସମ୍ପ୍ରଦାୟ ମଧ୍ୟରେ ଉତ୍ତେଜନା ସୃଷ୍ଟି ହୋଇଛି।
ବିବାଦକୁ ନେଇ ଝାଡଖଣ୍ଡର ମୁଖ୍ୟନ୍ତ୍ରୀ ହେମନ୍ତ ସୋରେନ କହିଛନ୍ତି ଯେ ଏପର୍ଯ୍ୟନ୍ତ ଏହା ବିଷୟରେ ତାଙ୍କ ପାଖରେ ସବିଶେଷ ତଥ୍ୟ ନାହିଁ। ସେ କେବଳ ଜାଣନ୍ତି ଯେ କେନ୍ଦ୍ର ସରକାର ପରାସନାଥ ପର୍ବତକୁ ଏକ ଇକୋ-ସମ୍ବେଦନଶୀଳ ଜୋନ ଭାବରେ ଘୋଷଣା କରିଛନ୍ତି। ଏହାକୁ ନେଇ ଏକ ବିବାଦ ଦେଖାଦେଇଛି। ତେଣୁ ସେ ବର୍ତ୍ତମାନ ଏହି ପ୍ରସଙ୍ଗରେ ନିଜର ମତାମତ ଦେଇପାରିବେ ନାହିଁ।
ତେବେ କେନ୍ଦ୍ର ସରକାର କାହିଁକି ଏବଂ କେଉଁ ପ୍ରସଙ୍ଗରେ ଏହି ନିଷ୍ପତ୍ତି ନେଇଛନ୍ତି ସେ ସମ୍ପର୍କରେ ସୂଚନା ପାଇବା ପରେ ହିଁ କିଛି କୁହାଯାଇପାରେ ବୋଲି ସେ କହିଛନ୍ତି। ସେ ଆହୁରି ମଧ୍ୟ କହିଛନ୍ତି ଯେ ସେ ସମସ୍ତ ଧର୍ମକୁ ସମ୍ମାନ କରନ୍ତି। ଏହି ଘଟଣାରେ କେଉଁ ସମାଧାନ ହୋଇପାରିବ ସେ ତାହା କରିବେ।