ନୂଆଦିଲ୍ଲୀ, ୧୮।୯ : ତେହେରିକ-ଇ-ତାଲିବାନ ପାକିସ୍ତାନ (ଟିଟିପି) ବିରୋଧରେ ଇସଲାମାବାଦ କଠୋର ଆଭିମୁଖ୍ୟ ନେଇ ସୂଚନା ଦେଇଛି। ତେବେ ଖାଇବର ପାସ୍ତୁନଖ୍ବା ଏବଂ ବାଲୁଚିସ୍ତାନରେ ଆତଙ୍କବାଦ ବିରୋଧୀ କାର୍ଯ୍ୟ ଜାରି ରଖିବାକୁ ଜୋର ଦେଇଥିବା ପାକିସ୍ତାନ ଭିତ୍ତିକ ଆତଙ୍କବାଦୀ ସଂଗଠନ ଜୈଶ-ଇ-ମହମ୍ମଦ (ଜେଏମ) ଏବଂ ଲଶ୍କର-ଇ -ତୋଏବା ନିକ କ୍ୟାଡରମାନଙ୍କୁ ଭାରତରେ ଅନୁପ୍ରବେଶ କରାଇବା ପାଇଁ ଉଦ୍ୟମ ଜାରି ରଖିଛି।
ପାକିସ୍ତାନର ଅର୍ଥନୀତି ତଳମୁହାଁ ହେବା ସହିତ ଦେଶରେ ରାଜନୈତିକ ସଙ୍କଟ ଜାରି ରହିଛି। କିନ୍ତୁ ଏଠାରେ ଆଶ୍ରୟ ନେଇଥିବା ଆତଙ୍କବାଦୀ ସଂଗଠନ ଜୈଶ୍ ଏବଂ ଲଶ୍କର ଭାରତ ବିରୋଧରେ ଜହର ଓଗାଳିବା ଜାରି ରଖିଛନ୍ତି।
କରାଚି, ଗୁଜରାନୱାଲା, ସିଆଲକୋଟ, ପେଶୱାର, ମୁଜାଫରବାଦ, କୋଟଲି, ନରୋୱାଲ, ଶାକରଗଡ ଇତ୍ୟାଦି ଜିଲା ସ୍ତରରେ ଆତଙ୍କବାଦୀ ସଂଗଠନରେ ଯୋଗଦେବାକୁ ଜେଏମ ଯୁବବର୍ଗଙ୍କୁ ଭ୍ରମିତ କରୁଛି।
ଅଗଷ୍ଟ ୫ ରୁ ୧୧ ମଧ୍ୟରେ, ଜେଏମ ପାକିସ୍ତାନ ଅଧିକୃତ ଜମ୍ମୁ-କଶ୍ମୀରର ବାଘ ଜିଲାର ଗଙ୍ଗା ଛୋଟିରେ ସାତ ଦିନିଆ ଦୌରା ତାରବିୟା ତାଲିମ ଶିବିର ଆୟୋଜନ କରିଥିଲା।
ଏହି ସମୟରେ, ବରିଷ୍ଠ ଲଶ୍କର ନେତାମାନେ ଜମାତ-ଉଦ-ଦାୱାର ମାରାକିଜ ଏବଂ ମଦ୍ରାସାଗୁଡ଼ିକରେ ସକ୍ରିୟ ଭାବରେ ଅଂଶଗ୍ରହଣ କରି ଭାରତ ଏବଂ ପାଶ୍ଚାତ୍ୟ ଦେଶ ବିରୁଦ୍ଧରେ ଷଡ଼ଯନ୍ତ୍ର କରିଥିଲେ। ସମ୍ପ୍ରତି ବନ୍ୟା ନାମରେ ଲଶ୍କର କାର୍ଯ୍ୟକର୍ତ୍ତାମାନେ ଦାନ ଅଭିଯାନ ଆରମ୍ଭ କରିଛନ୍ତି। ବନ୍ୟା ପ୍ରଭାବିତ ଅଞ୍ଚଳର ଲୋକଙ୍କୁ ସାହାଯ୍ୟ କରୁଥିବାବେଳେ, ସେମାନେ ନିଜ ମୌଳବାଦୀ ଚିନ୍ତାଧାରା ପ୍ରଚାର କରୁଛନ୍ତି। ଏହାକୁ ନେଇ ଅନ୍ତର୍ଜାତୀୟ ସ୍ତରରେ ଚିନ୍ତା ବଢ଼ିବାରେ ଲାଗିଛି।
