ନୂଆଦିଲ୍ଲୀ, ୧୮।୫: ଦିଲ୍ଲୀରୁ ପାକିସ୍ତାନୀ ଆତଙ୍କବାଦୀ ସଂଗଠନ ଜୈଶ୍-ଇ-ମହମ୍ମଦ (ଜେଇଏମ୍)ର ସଦସ୍ୟ ଜନ୍ ମହମ୍ମଦ ଦର୍ଙ୍କୁ ପୋଲିସ ଗିରଫ କରିଛି। ତାଙ୍କ ଘର ଜମ୍ମୁ-କଶ୍ମୀରର ପୁଲ୍ଓ୍ବାମାରେ। ସେ ଦଶନା ଦେବୀ ମନ୍ଦିର ପୂଜକ ସ୍ବାମୀ ଯତି ନରସିଂହାନନ୍ଦ ସରସ୍ବତୀଙ୍କୁ ହତ୍ୟା କରିବା ଯୋଜନାରେ ଥିଲେ। ରବିବାର ପହରଗଞ୍ଜସ୍ଥିତ ଏକ ହୋଟେଲରୁ ଦର୍ଙ୍କୁ ଗିରଫ କରାଯାଇଛି। ତାଙ୍କ ପ୍ରକୋଷ୍ଠରୁ ଗୈରିକ ବସ୍ତ୍ର, ଧଳା ପାଇଜାମା, ହାତରେ ବନ୍ଧାଯାଉଥିବା ଫିତା, ମୋତି ହାର, ଚନ୍ଦନକାଠ ପେଷ୍ଟ, କଙ୍କୁମ ବାକ୍ସ ମିଳିଛି। ଏହା ବ୍ୟତୀତ ପଏଣ୍ଟ ଥ୍ରି ଜିରୋ ପିସ୍ତଲ, ଦୁଇଟି ମାଗାଜିନ ଓ ୧୫ ରାଉଣ୍ଡ ଗୁଳି ମିଳିଥିବାରୁ ସେ ନରସିଂହାନନ୍ଦ ସରସ୍ବତୀଙ୍କୁ ହତ୍ୟା କରିବା ଯୋଜନାରେ ଥିଲେ ବୋଲି ପୋଲିସ ଜାଣିପାରିଛି। କାରଣ ନିକଟରେ ନରସିଂହାନନ୍ଦ ପ୍ରଫେଟ୍ ମହମ୍ମଦଙ୍କ ବିରୋଧରେ ବିବାଦୀୟ ମନ୍ତବ୍ୟ ଦେଇଥିଲେ। ମନ୍ଦିର ପୂଜକଙ୍କୁ ହତ୍ୟା କରିବା କାମ ଜେଇଏମ୍ ତାଙ୍କ ଉପରେ ନ୍ୟସ୍ତ କରିଥିବା ଜେରା ବେଳେ ଦର୍ ସ୍ବୀକାର କରିଛନ୍ତି। ଦର୍ ପେସାରେ ଜଣେ କାଠମିସ୍ତ୍ରି। ସେ ୨୦୨୦ ଡିସେମ୍ବରରେ ଜେଇଏମ୍ ଆତଙ୍କବାଦୀ ଆବିଦ୍ଙ୍କ ସଂସ୍ପର୍ଶରେ ଆସିବା ପରେ ଉକ୍ତ ସଂଗଠନ ପାଇଁ କାର୍ଯ୍ୟ କରିବାକୁ ନିୟୋଜିତ ହୋଇଥିଲେ। ଗତମାସ ୨ ତାରିଖରେ ଆବିଦ୍ ତାଙ୍କୁ ଅନନ୍ତନାଗରେ ଭେଟି ସ୍ବାମୀ ନରସିଂହାନନ୍ଦଙ୍କୁ ହତ୍ୟା କରିବା ଲାଗି ଦାୟିତ୍ୱ ଦେଇଥିଲେ। ଏଥିସହିତ ଆବିଦ୍ ଦର୍ଙ୍କୁ ପିସ୍ତଲ ଦେବା ସହ ଏହାକୁ କିପରି ବ୍ୟବହାର କରାଯିବ, ସେ ସମ୍ପର୍କରେ ତାଲିମ ଦେଇଥିଲେ। ତାଙ୍କୁ ଆବିଦ୍ ନଗଦ ୬,୫୦୦ ଟଙ୍କା ଦେବା ସହ ଦିଲ୍ଲୀ ଆସିବା ପୂର୍ବରୁ ବ୍ୟାଙ୍କ ଆକାଉଣ୍ଟକୁ ୩୫,୦୦୦ ଟଙ୍କା ପଠାଇଥିଲେ। ପୂଜକଙ୍କୁ ହତ୍ୟା କରିବା ପରେ ବଡ଼ ଧରଣର ଅର୍ଥ ସହାୟତା ଦିଆଯିବ ବୋଲି ତାଙ୍କୁ ପ୍ରତିଶ୍ରୁତି ଦିଆଯାଇଥିଲା।