ନୂଆଦିଲ୍ଲୀ, ୨୪।୬(ପି.ଟି.): ଭାରତ-ଓ୍ବେଷ୍ଟଇଣ୍ଡିଜ ୨ ମ୍ୟାଚ ବିଶିଷ୍ଟ ଟେଷ୍ଟ ସିରିଜ ଜୁଲାଇ ୧୨ରୁ ରୋସେଉଠାରେ ଆରମ୍ଭ ହେବ। ଏଥିପାଇଁ ଶୁକ୍ରବାର ଭାରତୀୟ ଦଳ ଘୋଷଣା କରାଯାଇଛି। ଏହି ଦଳରୁ ଚେତେଶ୍ୱର ପୂଜାରାଙ୍କୁ ବାଦ୍ ଦିଆଯାଇ ଯୁବ ଖେଳାଳି ଯଶସ୍ବୀ ଜୟସ୍ବାଲ ଓ ଋତୁରାଜ ଗାଏକ୍ୱାଡ୍ଙ୍କୁ ସାମିଲ କରାଯାଇଛି। ଶିବ ସୁନ୍ଦର ଦାସଙ୍କ ନେତୃତ୍ୱାଧୀନ ଚୟନ ପ୍ୟାନେଲ ଆଗାମୀ ୨ ବର୍ଷର ବିଶ୍ୱ ଟେଷ୍ଟ ଚାମ୍ପିୟନଶିପ୍ ସାଇକେଲ (୨୦୨୩-୨୫)କୁ ଦୃଷ୍ଟିରେ ରଖି ଏପରି ନିଷ୍ପତ୍ତି ନେଇଥିବା ସ୍ପଷ୍ଟ ହୋଇଛି। ଫଳରେ ପୂଜାରାଙ୍କ ଅନ୍ତର୍ଜାତୀୟ କ୍ୟାରିୟର ସରି ଆସୁଥିବା ସୂଚନା ମିଳିଛି।
ଶାମିଙ୍କୁ ବିଶ୍ରାମ, ମୁକେଶ ସାମିଲ
ଟେଷ୍ଟ ସହ ଭାରତୀୟ ଦିନିକିଆ ଦଳ ମଧ୍ୟ ଘୋଷଣା କରାଯାଇଛି। ରୋହିତ ଶର୍ମା ଉଭୟ ଦଳର ନେତୃତ୍ୱ ନେବେ। ଆଉ ଏକ ଉଲ୍ଲେଖନୀୟ ଘଟଣା ହେଲା ପୂର୍ବ ମ୍ୟାଚରେ ଅନ୍ତର୍ଜାତୀୟ ପ୍ରତ୍ୟାବର୍ତ୍ତନ କରିଥିବା ଅଜିଙ୍କ୍ୟ ରାହାନେଙ୍କୁ ଦଳର ଉପ-ଅଧିନାୟକ ମନୋନୀତ କରାଯାଇଛି। ମହମ୍ମଦ ଶାମିଙ୍କୁ ସମ୍ପୂର୍ଣ୍ଣ ବିଶ୍ରାମ ଦିଆଯାଇଛି। ଅର୍ଥାତ୍ ତାଙ୍କୁ ଟେଷ୍ଟ କିମ୍ବା ଦିନିକିଆ ଦଳରେ ସାମିଲ କରାଯାଇନାହିଁ। ସ୍ଥିର ପ୍ରଦର୍ଶନ ଦେଇପାରି ନ ଥିବା ଉମେଶ ଯାଦବଙ୍କୁ ବାଦ୍ ଦିଆଯାଇଥିବାବେଳେ କୋଲକାତା ଦ୍ରୁତ ବୋଲର ମୁକେଶ କୁମାରଙ୍କୁ ସୁଯୋଗ ମିଳିଛି। ଐତିହାସିକ ଅଷ୍ଟ୍ରେଲିଆ ଗସ୍ତ ପରଠାରୁ ବାଦ୍ ପଡ଼ି ଆସୁଥିବା ନବଦୀପ ସଇନୀଙ୍କୁ ଏଥର ସାମିଲ କରାଯାଇଛି। କାରିବିୟନ ଟ୍ରାକ୍ରେ ସେ ଉପାଦେୟ ହେବେ ବୋଲି ଆଶା କରାଯାଉଛି। ନୂଆକରି ସାମିଲ ହୋଇଥିବା ୩ ଖେଳାଳି ଜୟସ୍ବାଲ, ଗାଏକ୍ୱାଡ୍ ଓ ମୁକେଶ ବିଶ୍ୱ ଟେଷ୍ଟ ଚାମ୍ପିୟନଶିପ୍ ଫାଇନାଲ ଅବସରରେ ଭାରତୀୟ ଦଳର ଷ୍ଟାଣ୍ଡବାଇ ଖେଳାଳି ଥିଲେ। ଘରୋଇ କ୍ରିକେଟର ଗତ କିଛି ସିଜନରେ ଏମାନେ ସ୍ଥିର ପ୍ରଦର୍ଶନ ଦେଇ ଆସୁଛନ୍ତି। ଦିନିକିଆ ଦଳରେ ସେପରି କିଛି ବିସ୍ମୟ ଦେଖିବାକୁ ମିଳିନାହିଁ। ୧୭ ଜଣିଆ ଦଳ ସ୍ବାଭାବିକଭାବେ ମନୋନୀତ ହୋଇଛନ୍ତି। ଆହତ ଯଶପ୍ରୀତ୍ ବୁମ୍ରା, ଶ୍ରେୟସ ଆୟାର ଓ ଲୋକେଶ ରାହୁଲ ଫିଟ୍ ନାହାନ୍ତି। ଏହି ୩ ଜଣଙ୍କୁ ମିଶାଇ ୨୦ ଜଣିଆ କୋର୍ ଦଳରୁ ଆଗାମୀ ବିଶ୍ୱକପ ପାଇଁ ଖେଳାଳି ଚୟନ ହେବେ।
ପୂଜାରାଙ୍କ ପ୍ରତ୍ୟାବର୍ତ୍ତନ କଷ୍ଟକର ହେବ
ଏହା ପୂର୍ବରୁ ରାହାନେଙ୍କ ସହ ପୂଜାରା ଯେତେବେଳେ ଶ୍ରୀଲଙ୍କା ବିପକ୍ଷ ସିରିଜରୁ ବାଦ୍ ପଡ଼ିଥିଲେ ସେତେବେଳେ ତତ୍କାଳୀନ ଚୟନ କମିଟି ମୁଖ୍ୟ ଚେତନ ଶର୍ମା କହିଥିଲେ ଯେ, ତାଙ୍କ ପାଇଁ ପଥରୁଦ୍ଧ ହୋଇନାହିଁ। ପ୍ରଥମଶ୍ରେଣୀ କ୍ରିକେଟରେ ଭଲ ପ୍ରଦର୍ଶନ କରି ସେ ପୁଣି ଫେରିପାରିବେ। ପୂଜାରା ସସେକ୍ସ ପକ୍ଷରୁ କାଉଣ୍ଟି କ୍ରିକେଟ ଖେଳି ସ୍ଥିର ପ୍ରଦର୍ଶନ ଦେବାରୁ ୨୦୨୨ରେ ଇଂଲଣ୍ଡ ବିପକ୍ଷ ଏକମାତ୍ର ଟେଷ୍ଟ ପାଇଁ ଡାକରା ପାଇଥିଲେ। ଏହାପରେ ଚଳିତ ବର୍ଷ ଅଷ୍ଟ୍ରେଲିଆ ବିପକ୍ଷରେ କ୍ୟାରିୟରର ୧୦୦ତମ ଟେଷ୍ଟ ମଧ୍ୟ ଖେଳିଥିଲେ। ଘରୋଇ ପରିବେଶରେ ଅଷ୍ଟ୍ରେଲିଆ ବିପକ୍ଷ ସିରିଜରେ ବିଫଳତା ପରେ ତାଙ୍କ ସୁଯୋଗ କ୍ଷୀଣ ହୋଇଥିଲା। ମାତ୍ର ଡବ୍ଲ୍ୟୁଟିସି ଫାଇନାଲ ପାଇଁ ଚୟନକର୍ତ୍ତାମାନେ ଦଳରେ ବିଶେଷ ପରିବର୍ତ୍ତନ କରିବାକୁ ଚାହୁଁ ନ ଥିଲେ। ମାତ୍ର ଓଭାଲରେ ଦୁଇଟିଯାକ ଇନିଂସରେ ବିଫଳତା ତାଙ୍କ ଭାଗ୍ୟ ନିର୍ଣ୍ଣୟ କରିଥିଲା। ଡବ୍ଲ୍ୟୁଟିସି ଫାଇନାଲ ଅବସରରେ ଶିବ ସୁନ୍ଦର ଦାସ ଲଣ୍ଡନରେ ଥିଲେ। ତେଣୁ ସେ ନିଶ୍ଚିତ ଚୟନ ପ୍ୟାନେଲର ଆଭିମୁଖ୍ୟ ସମ୍ପର୍କରେ ମୁଖ୍ୟ କୋଚ୍ ରାହୁଲ ଡ୍ରାଭିଡଙ୍କ ସହ ଆଲୋଚନା କରିଥିବେ।
ଓପନ କରିପାରନ୍ତି ଜୟସ୍ବାଲ, ଗାଏକ୍ୱାଡ୍
ଆଗାମୀ ସିରିଜରେ ଜୟସ୍ବାଲ ଓ ଗାଏକ୍ୱାଡ୍ ଇନିଂସ ଓପନ କରିପାରନ୍ତି କିମ୍ବା କେହିଜଣେ ତୃତୀୟ ସ୍ଥାନରେ ଖେଳିପାରନ୍ତି। ଅବଶିଷ୍ଟ ଭାରତ ଏକାଦଶ ପକ୍ଷରୁ ମଧ୍ୟପ୍ରଦେଶ ବିପକ୍ଷ ଇରାନୀ କପ୍ରେ ୨୧୩ ଓ ୧୪୪ ରନ କରିଥିବା ମୁମ୍ବାଇର ବାମହାତୀ ବ୍ୟାଟର ଜୟସ୍ବାଲଙ୍କ ଟେଷ୍ଟ କ୍ୟାରିୟର ଆରମ୍ଭ ହେବା ସମ୍ଭାବନା ଦୃଢ଼। ପ୍ରଥମଶ୍ରେଣୀ କ୍ରିକେଟରେ ତାଙ୍କର ଆଭରେଜ ୮୦.୨୧ ରହିଛି।
ଭାରତୀୟ ଟେଷ୍ଟ ଦଳ
ରୋହିତ ଶର୍ମା (ଅଧିନାୟକ), ଶୁବମନ ଗିଲ୍, ଋତୁରାଜ ଗାଏକ୍ୱାଡ୍, ବିରାଟ କୋହଲି, ଯଶସ୍ବୀ ଜୟସ୍ବାଲ, ଅଜିଙ୍କ୍ୟ ରାହାନେ (ଉପ-ଅଧିନାୟକ), କେ.ଏସ. ଭରତ, ଇଶାନ କିଷନ, ରବିଚନ୍ଦ୍ରନ ଅଶ୍ୱିନ, ରବୀନ୍ଦ୍ର ଜାଡେଜା, ଶାର୍ଦ୍ଦୂଳ ଠାକୁର, ଅକ୍ଷର ପଟେଲ, ମହମ୍ମଦ ସିରାଜ, ମୁକେଶ କୁମାର, ଜୟଦେବ ଉନାଡକଟ୍, ନବଦୀପ ସଇନୀ।
ଭାରତୀୟ ଦିନିକିଆ ଦଳ
ରୋହିତ ଶର୍ମା (ଅଧିନାୟକ), ଶୁବମନ ଗିଲ୍, ଋତୁରାଜ ଗାଏକ୍ୱାଡ୍, ବିରାଟ କୋହଲି, ସୂର୍ଯ୍ୟକୁମାର ଯାଦବ, ସଞ୍ଜୁ ସାମସନ, ଇଶାନ କିଷନ, ହାର୍ଦ୍ଦିକ ପାଣ୍ଡ୍ୟା (ଉପ-ଅଧିନାୟକ), ଶାର୍ଦ୍ଦୂଳ ଠାକୁର, ରବୀନ୍ଦ୍ର ଜାଡେଜା, ଅକ୍ଷର ପଟେଲ, ୟୁଜବେନ୍ଦ୍ର ଚହଲ, କୁଲଦୀପ ଯାଦବ, ଜୟଦେବ ଉନାଡକଟ୍, ମହମ୍ମଦ ସିରାଜ, ଉମ୍ରାନ ମଲିକ, ମୁକେଶ କୁମାର।