ନଟିଂହାମ,୧୪।୬: ଇଂଲଣ୍ଡର ତାରକା ଫାଷ୍ଟ ବୋଲର ଜେମ୍ସ ଆଣ୍ଡରସନ ଇତିହାସ ସୃଷ୍ଟି କରିଛନ୍ତି। ଟେଷ୍ଟ କ୍ରିକେଟରେ ୬୫୦ ଉଇକେଟ ନେବାରେ ଜେମ୍ସ ଆଣ୍ଡରସନ ଦୁନିଆର ପ୍ରଥମ ଦ୍ରୁତ ବୋଲର ହୋଇଛନ୍ତି। ୧୪୫ ବର୍ଷ ଟେଷ୍ଟ କ୍ରିକେଟ ଇତିହାସରେ ପ୍ରଥମ ଥର ପାଇଁ ଜେମ୍ସ ଆଣ୍ଡରସନ ଏପରି ଉପଲବ୍ଧି ହାସଲ କରିଛନ୍ତି।
ଟେଷ୍ଟ କ୍ରିକେଟ ଇତିହାସରେ ପ୍ରଥମ ମ୍ୟାଚ ୧୮୭୭ ମସିହାରେ ମେଲବୋର୍ଣ୍ଣ ଗ୍ରାଉଣ୍ଡରେ ଅଷ୍ଟ୍ରେଲିଆ ଏବଂ ଇଂଲଣ୍ଡ ମଧ୍ୟରେ ଖେଳାଯାଇଥିଲା। ୧୮୭୭ରୁ ବର୍ତ୍ତମାନ ପର୍ଯ୍ୟନ୍ତ ଟେଷ୍ଟ କ୍ରିକେଟ ଇତିହାସରେ ଜେମ୍ସ ଆଣ୍ଡରସନ ବିଶ୍ୱର ପ୍ରଥମ ଦ୍ରୁତ ବୋଲର ଭାବେ ସର୍ବାଧିକ ୬୫୦ ଉଇକେଟ ନେଇଛନ୍ତି। ୨୦୦୩ରେ ଜେମ୍ସ ଆଣ୍ଡରସନ ଇଂଲଣ୍ଡ ପାଇଁ ଟେଷ୍ଟ ଡେବ୍ୟୁ କରିଥିଲେ।
୩୯ ବର୍ଷୀୟ ଜେମ୍ସ ଆଣ୍ଡରସନ ନଟିଂହାମରେ ନ୍ୟୁଜିଲାଣ୍ଡ ବିପକ୍ଷ ଦ୍ୱିତୀୟ ଟେଷ୍ଟର ଦ୍ୱିତୀୟ ଇନିଂସରେ କିୱି ଅଧିନାୟକ ଟମ ଲାଥାମଙ୍କୁ ଆଉଟ୍ କରି ଟେଷ୍ଟ କ୍ରିକେଟରେ ୬୫୦ ଉଇକେଟ ସମାପ୍ତ କରିଛନ୍ତି। ବିଶ୍ୱର ସର୍ବାଧିକ ଟେଷ୍ଟ ଉଇକେଟ ନେବାରେ ଜେମ୍ସ ଆଣ୍ଡରସନ ତୃତୀୟ ସ୍ଥାନରେ ଅଛନ୍ତି।
ଟେଷ୍ଟ କ୍ରିକେଟରେ ସର୍ବାଧିକ ୮୦୦ ଉଇକେଟ ନେଇ ବିଶ୍ୱ ରେକର୍ଡ କରିଛନ୍ତି ଶ୍ରୀଲଙ୍କାର ମହାନ୍ ସ୍ପିନର ମୁଥିୟା ମୁରଲୀଧରନ। ଦୁଇ ନମ୍ବରରେ ଅଷ୍ଟ୍ରେଲିଆର ଲେଗ ସ୍ପିନର ଶେନ୍ ୱାର୍ନ ଅଛନ୍ତି। ସେ ୭୦୯ ଟେଷ୍ଟ ଉଇକେଟ ନେଇଛନ୍ତି। ଏହା ପରେ ଇଂଲଣ୍ଡର କିମ୍ବଦନ୍ତୀ ଦ୍ରୁତ ବୋଲର ଜେମ୍ସ ଆଣ୍ଡରସନ ୬୫୦ ଟେଷ୍ଟ ଉଇକେଟ ନେଇ ତୃତୀୟ ସ୍ଥାନରେ ଅଛନ୍ତି। ଭାରତୀୟ ଲେଗ ସ୍ପିନର ଅନିଲ କୁମ୍ବଲେ ଚତୁର୍ଥ ସ୍ଥାନରେ ଅଛନ୍ତି। ତାଙ୍କ ନାମରେ ୬୧୯ ଉଇକେଟ ରହିଛି। ମୁରଲୀଧରନ, ଓ୍ବାର୍ନ, କୁମ୍ବଲେ ସ୍ପିନର ହୋଇଥିବାବେଳେ ଆଣ୍ଡରସନ୍ ଦ୍ରୁତ ବୋଲର୍ ଅଟନ୍ତି।
