ମହାକାଳପଡ଼ା,୨୮ା୫(ଡି.ଏନ୍.ଏ.): କେନ୍ଦ୍ରାପଡ଼ା ଜିଲା ମହାକାଳପଡ଼ା ବ୍ଲକର ପ୍ରସିଦ୍ଧ ଶକ୍ତି ପୀଠ ମା’ରାମଚଣ୍ଡୀଙ୍କ ପୀଠରେ ଅନୁଷ୍ଠିତ ଝାମୁ ଯାତ୍ରା ମେଳାରୁ ଆୟ ହୋଇଥିବା ଅର୍ଥର ହିସାବ ମିଳୁନାହିଁ ା ସେହି ଅର୍ଥକୁ ମନ୍ଦିର ଟ୍ରଷ୍ଟି ନିଜ ହେପାଜତରେ ରଖି ମନମୁଖୀ କାମ କରୁଥିବା ନେଇ ମା’ରାମଚଣ୍ଡୀ ଆଞ୍ଚଳିକ ସେନା ପକ୍ଷରୁ ଚଳିତ ସପ୍ତାହରେ ବ୍ଲକ ଅଫିସ ସଭାଗୃହରେ ଆୟୋଜିତ ଜିଲାପାଳଙ୍କ ଜନ ଶୁଣାଣି ଶିବିରରେ ଲିଖିତ ଅଭିଯୋଗ କରାଯାଇଥିଲା। ଏ ନେଇ ଧରିତ୍ରୀରେ ଖବର ପ୍ରକାଶ ପାଇବା ପରେ ଦାୟିତ୍ୱରେ ଥିବା ଟ୍ରଷ୍ଟି ମଥୁରୀ ଚରଣ ସେନାପତି ତରବରିଆ ଭାବେ ୧୦ ଲକ୍ଷ ଟଙ୍କାରୁ ପ୍ରଥମ ପର୍ଯ୍ୟାୟରେ ୩ ଲକ୍ଷ ଓ ଦ୍ୱିତୀୟ ପର୍ଯ୍ୟାୟରେ ଆଉ ୩ ଲକ୍ଷ ଟଙ୍କା ମା’ଙ୍କ ଜମା ଖାତାରେ ଡିପୋଜିଟ୍ କରିଥିଲେ ା ଏ ସଂକ୍ରାନ୍ତରେ କେନ୍ଦ୍ରାପଡ଼ା ଓ ଯାଜପୁର ଜିଲା ଦାୟିତ୍ୱରେ ଥିବା ଏଣ୍ଡାଓମେଣ୍ଟ ଇନ୍ସପେକ୍ଟର ଶକ୍ତି ପ୍ରସନ୍ନ ନାୟକ ସୂଚନା ଦେଇଛନ୍ତି ା ଏ ସମ୍ପର୍କରେ ଏଣ୍ଡାଓମେଣ୍ଟ ଇନ୍ସପେକ୍ଟର ନାୟକ କୁହନ୍ତି, ଦାୟିତ୍ୱରେ ଥିବା ମନ୍ଦିର ଟ୍ରଷ୍ଟିଙ୍କୁ ଆଦାୟ ହୋଇଥିବା ୧୦ଲକ୍ଷ ଟଙ୍କାର ହିସାବ ମଗାଯାଇଥିଲା ା ଆଜି ସୁଦ୍ଧା ମା’ଙ୍କ ଜମା ଖାତାରେ ୬ ଲକ୍ଷ ଟଙ୍କା ଜମା ହୋଇଥିବା ବେଳେ ଅବଶିଷ୍ଟ ୪ ଲକ୍ଷ ଟଙ୍କା ମେଳାରେ ଖର୍ଚ୍ଚ ହୋଇଥିବା ଟ୍ରଷ୍ଟି ସେନାପତି କହିଛନ୍ତି ବୋଲି ଅଧିକାରୀ ନାୟକ ସୂଚନା ଦେଇଛନ୍ତି । ଅପରପକ୍ଷେ ମା’ଙ୍କ ପୀଠ ପରିସରରେ ଥିବା ଭୋଗ ଦୋକାନକୁ ସର୍ବସାଧାରଣରେ ନିଲାମ କରିବାର ବ୍ୟବସ୍ଥା ଥିଲେ ମଧ୍ୟ ତାହା ଟ୍ରଷ୍ଟିଙ୍କ ଦାୟିତ୍ୱହୀନତା ଯୋଗୁ ତାହା ହେଉନାହିଁ ା ଫଳରେ ରାଜସ୍ବ ଆଦାୟରେ ବାଧକ ସାଜିଛି ବୋଲି ସେନାର ଆବାହକ ଲକ୍ଷ୍ମୀକାନ୍ତ ସ୍ବାଇଁ , ବିରଞ୍ଚି ନାରାୟଣ ଦାସ , କଳ୍ପତରୁ ସାମଲ , ସୁବାସ ସ୍ବାଇଁ , ସୁବାସ ବିଶ୍ୱାସ ପ୍ରମୁଖ ଅଭିଯୋଗ କରିଛନ୍ତି। ମନ୍ଦିର ପରିଚାଳନାରେ ସ୍ବଚ୍ଛତା ଅବଲମ୍ବନ କରା ନ ଗଲେ ଆଗାମୀ ଦିନରେ ଆନ୍ଦୋଳନ ତୀବ୍ରତର ହେବ ବୋଲି ସେନା ପକ୍ଷରୁ ଚେତାବନୀ ଦିଆଯାଇଛି ା