ସୁନ୍ଦରଗଡ଼/ହେମଗିରି,୫ା୧୧(ଡି.ଏନ୍.ଏ.): ସୁନ୍ଦରଗଡ଼ ଜିଲା ହେମଗିରି ବ୍ଲକ ଅନ୍ତର୍ଗତ ଜାମକାନି କୋଇଲା ଖଣି କାର୍ଯ୍ୟ ଶନିବାର ଆରମ୍ଭ ହୋଇଥିବା ବେଳେ ଖଣି ବିସ୍ଥାପିତଙ୍କ ବିରୋଧ ଯୋଗୁ ପୋଲିସକୁ ମୃଦୁ ଲାଠିଚାଳନା କରିବାକୁ ପଡ଼ିଛି। ଏହାକୁ ନେଇ ସେଠାରେ ଉତ୍ତେଜନା ପ୍ରକାଶ ପାଇଛି। ଜିଲା ପ୍ରଶାସନ ପକ୍ଷରୁ ଅତିରିକ୍ତ ଜିଲାପାଳ ଅଭିମନ୍ୟୁ ବେହେରା ଓ ଅନ୍ୟ ଅଧିକାରୀଙ୍କ ଉପସ୍ଥିତିରେ ବେଦାନ୍ତ କମ୍ପାନୀ ଏହି ଖଣି କାର୍ଯ୍ୟ ଆରମ୍ଭ ବେଳେ ଖଣି ପାଇଁ ବିସ୍ଥାପିତ ହେବାକୁ ଥିବା ଜାମକାନି, ଗିରସୀମା, ଝାରପଲମ ଓ ମେଣ୍ଡ୍ରା ପଞ୍ଚାୟତବାସୀ ଏହାକୁ ପ୍ରତିବାଦ କରି ୨୦୧୩ ନୂତନ ପୁନର୍ବାସ ଓ ଥଇଥାନ ନୀତି ଅନୁଯାୟୀ କ୍ଷତିପୂରଣ ଓ ଥଇଥାନ ଯୋଗାଇ ଦେବା ଦାବିରେ ବିରୋଧ କରିଥିଲେ। ଫଳରେ ପୋଲିସ-ସହିତ ବିସ୍ଥାପିତଙ୍କ ମଧ୍ୟରେ ଧସ୍ତାଧସ୍ତି ହୋଇଥିଲା। ଏହାଭିତରେ କମ୍ପାନୀ ପକ୍ଷରୁ ଖଣି ଖନନ କାର୍ଯ୍ୟ ଶୁଭାରମ୍ଭ ହୋଇଥିଲା ବେଳେ ବିସ୍ଥାପିତମାନେ ନିଜ ଦାବି ନେଇ ସେଠାରେ ଧାରଣାରେ ବସିରହିଛନ୍ତି। ଅପରପକ୍ଷରେ ପୂର୍ବରୁ ଏହି ଜାମକାନି କୋଇଲା ଖଣିକୁ ପ୍ରଥମେ ଭୂଷଣ କମ୍ପାନୀକୁ ଆବଣ୍ଟିତ ହୋଇଥିଲା। ସେତେବେଳେ ଇଡ୍କୋ ପକ୍ଷରୁ ଜମି ଅଧିଗ୍ରହଣ କରାଯାଇ ୨୦୦୬ ଜମି ଅଧଗ୍ରହଣ ନୀତି ଅନୁଯାୟୀ ବିସ୍ଥାପିତଙ୍କୁ କ୍ଷତି ପ୍ରଦାନ ହୋଇଛି। ମାତ୍ର ପରବର୍ତ୍ତୀ ସମୟରେ ଏହି କୋଲ ବ୍ଲକ ଭୂଷଣ କମ୍ପାନୀକୁ ବାତିଲ ପରେ ୨୦୨୦ରେ ବେଦାନ୍ତ କମ୍ପାନୀକୁ ଏହି ଖଣି ଆବଣ୍ଟିତ ହୋଇଛି। ଖଣି କାର୍ଯ୍ୟ ଆରମ୍ଭ ପୂର୍ବରୁ ବେଦାନ୍ତ କମ୍ପାନୀ ଓ ଜିଲା ପ୍ରଶାସନ ତରଫରୁ ଏହି ଦାବିନେଇ ବହୁବାର ବିସ୍ଥାପିତଙ୍କ ସହ ଆଲୋଚନା ହୋଇଛି। ଖଣି କାର୍ଯ୍ୟ ବିଳମ୍ବ ହୋଇଥିବାରୁ ଏପରିକି କମ୍ପାନୀ ପକ୍ଷରୁ ଏକର ପିଛା ୬ଲକ୍ଷ ଟଙ୍କା ପ୍ରଦାନ ସହ ଅନ୍ୟାନ୍ୟ ପାରିପାଶର୍ବିକ ଉନ୍ନୟନ କାର୍ଯ୍ୟ କରିଯିବାକୁ। ପ୍ରତିଶ୍ରୁତି ପ୍ରଦର୍ଶନ କରାଯାଇଥିଲା।ମାତ୍ର ବିସ୍ଥାପିତମାନେ ନୂତନ ପୁନର୍ବାସ ଓ ଥଇଥାନ ନୀତି ଅନୁସାରେ କ୍ଷତିପୂରଣ ଯୋଗାଇ ଦେବା ଦାବି କରିଛନ୍ତି। ନ ହେଲେ ଭିଟାମାଟି ମାଟି ଛାଡ଼ିବୁ ନାହିଁ ବୋଲି ନିଜ ଜିଦ୍ରେ ଅଟଳ ରହିଛନ୍ତି। ଆଇନ ଶୃଙ୍ଖଳା ପାଇଁ ୧୩ ପ୍ଲାଟୁନ ପୋଲିସ ଫୋର୍ସ ମୁତୟନ ରହିଥିବା ବେଲେ ଆଉ ୨ ପ୍ଲାଟୁନ ପୋଲିସ ଫୋର୍ସ ରିଜର୍ଭ ରହିଛନ୍ତି। ଦାବି ପୂରଣ ନେଇ ପ୍ରଶାସନ ପକ୍ଷରୁ ବିସ୍ଥାପିତଙ୍କ ସହ ଆଲୋଚନା ଜାରି ରହିଛି ବୋଲି ପ୍ରଶାସନ ପକ୍ଷରୁ କୁହାଯାଇଛି।