ଶ୍ରୀନଗର,୨୧।୭: ଜମ୍ମୁ-କଶ୍ମୀରରେ ଆତଙ୍କବାଦୀ ସଂଗଠନ ଲଗାତର ଭାବେ ବର୍ତ୍ତମାନ ଜମ୍ମୁ ଅଞ୍ଚଳକୁ ଟାର୍ଗେଟ କରି ଷଡ଼ଯନ୍ତ୍ର ରଚୁଛନ୍ତି। ଏଥିପାଇଁ ସୀମାରେ ଡ୍ରୋନ୍ର ବ୍ୟବହାର କରାଯାଉଛି। ବୁଧବାର ଜମ୍ମୁରେ ପୁଣି ଥରେ ଡ୍ରୋନ୍ର ଗତିବିଧି ନଜର ଆସିଛି। ଭୋର ପ୍ରାୟ ୪ଟା ୧୫ମିନିଟ୍ରେ ଜମ୍ମୁର ସତୱାରିରେ ଏକ ଡ୍ରୋନ୍ ଉଡୁଥିବାର ଦେଖିବାକୁ ମିଳିଥିଲା। ତେବେ ଏହି ଡ୍ରୋନ୍ କେଉଁଠାରୁ ଆସିଛି, କିଏ ପଠାଇଛି, ସେ ସମ୍ପର୍କରେ ଅଧିକ ସୂଚନା ମିଳିପାରିନାହିଁ। କିନ୍ତୁ ଉକ୍ତ ଅଞ୍ଚଳରେ ସର୍ଚ୍ଚ ଅପରେଶନ ଆରମ୍ଭ କରାଯାଇଛି। ସତୱାରି ଅଞ୍ଚଳରେ ପ୍ରଥମେ ଏହି ଡ୍ରୋନ୍କୁ ଭାରତୀୟ ଯବାନମାନେ ଦେଖିବାକୁ ପାଇଥିଲେ। ତେବେ ଆତଙ୍କବାଦୀଙ୍କ ଦ୍ୱାରା ଲଗାତର ଡ୍ରୋନ୍ର ବ୍ୟବହାରକୁ ନେଇ ଏବେ ପୋଲିସ ବିଭାଗ ଚିନ୍ତିତ ହୋଇପଡ଼ିଛି। ଅନ୍ୟପଟେ ଏନେଇ ଜାମ୍ମୁ କାଶ୍ମୀର ପୋଲିସର ଡିଜିପି ଦିଲ୍ବାଗ ସିଂହ ମଙ୍ଗଳବାର ଜମ୍ମୁରେ ଏକ ଉଚ୍ଚ ସ୍ତରୀୟ ବୈଠକ ଡାକିଥିଲେ। ଏହି ବୈଠକରେ ସମସ୍ତ ବରିଷ୍ଠ ଅଧିକାରୀ ଅଂଶଗ୍ରହଣ କରିଥିଲେ। ଡ୍ରୋନ୍ର ସମ୍ଭାବ୍ୟ ବିପଦକୁ ଦୃଷ୍ଟିରେ ରଖି ପୋଲିସ ଏବଂ ସମସ୍ତ ସୁରକ୍ଷା ଏଜେନ୍ସିଗୁଡ଼ିକୁ ସତର୍କ ରହିବାକ କୁହାଯାଇଥିଲା।
