ଜମ୍ମୁ,୧୨ ।୮: ଜମ୍ମ-କଶ୍ମୀରରେ ଆତଙ୍କବାଦୀମାନେ ପୁଣିଥରେ ସାଧାରଣ ଜନତାଙ୍କୁ ଟାର୍ଗେଟ କରିଛନ୍ତି । ଘାଟିର ବାନ୍ଦିପୋରା ଜିଲାର ଅଜସ ସ୍ଥିତ ସଦୁନାରା ଅଞ୍ଚଳରେ ଆତଙ୍କବାଦୀମାନେ ଜଣେ ଶ୍ରମିକଙ୍କୁ ଗୁଳି କରି ହତ୍ୟା କରିଛନ୍ତି । ଆତଙ୍କବାଦୀମାନେ ଗୁରୁବାର ରାତି ପ୍ରାୟ ୧୨ଟା ୩୦ରେ ଶ୍ରମିକ ଜଣଙ୍କୁ ଅତି ନିକଟରୁ ଗୁଳିକରି ହତ୍ୟା କରିଥିବା ଜଣାପଡିଛି । ଏହାପରେ ତୁରନ୍ତ ତାଙ୍କୁ ହସ୍ପିଟାଲ ନିଆଯାଇଥିଲେ ବି ଡାକ୍ତର ସେଠାରେ ତାଙ୍କୁ ମୃତ ଘୋଷଣା କରିଥିଲେ । ମୃତକ ଶ୍ରମିକ ଜଣଙ୍କ ହେଲେ ଅମରେଜ ପୁତ୍ର ମହମ୍ମଦ ଜଲିଲ । ସେ ବିହାର ବାସିନ୍ଦା ବୋଲି ଜଣାପଡିଛି ।
ସୂଚନାଯୋଗ୍ୟ, ବାନ୍ଦିପୋରାରେ ସ୍ଥାନୀୟ ନାଗରିକଙ୍କୁ ପୁଣି ଟାର୍ଗେଟ କରାଯାଇଥିବାରୁ ସୁରକ୍ଷାକର୍ମୀ ଉକ୍ତ ଅଞ୍ଚଳକୁ ସିଲ କରି ଆତଙ୍କବଦୀଙ୍କୁ ଖୋଜିବା ଆରମ୍ଭ କରିଛନ୍ତି । ଅନ୍ୟପଟେ ଘାଟିରେ କଶ୍ମୀର ବାହାରର ଲୋକଙ୍କୁ ଟାର୍ଗେଟ କରିବା ଘଟଣା ଥମିବାର ନାଁ ନେଉନି । ଏହା ପୂର୍ବରୁ ଏପ୍ରିଲରେ ଆତଙ୍କବାଦୀମାନେ ଦକ୍ଷିଣ କଶ୍ମୀରର କୁଲଗାମ ଜିଲାର କାକରାନ ଅଞ୍ଚଳରେ ଜଣେ କଶ୍ମୀର ବାହାରର ବାସିନ୍ଦାଙ୍କୁ ଗଳି କରି ହତ୍ୟା କରିଥିଲେ । ଏହାସହ ଯେଉଁମାନେ କଶ୍ମୀର ବାସିନ୍ଦା ନୁହଁନ୍ତି ସେମାନଙ୍କୁ ଘାଟି ଛାଡିଦେବାକୁ ଚେତାବନୀ ଦେଇଥିଲେ ଆତଙ୍କବାଦୀ । ଆତଙ୍କବାଦୀମାନେ କଶ୍ମୀର ବାହାରର ଲୋକଙ୍କୁ ହତ୍ୟା କରି ଘାଟିରେ ଭୟର ବାତାବରଣ ସୃଷ୍ଟି କରିବାକୁ ଚେଷ୍ଟା ଚଳାଇଥିବା କୁହାଯାଉଛି ।
