ଜମ୍ମୁକଶ୍ମୀର,୨।୪: ଜମ୍ମୁ-କଶ୍ମୀରର ରାମବାନ ଜିଲାରେ ରବିବାର ଭୂସ୍ଖଳନ ଘଟିଛି। ଏଥିଯୋଗୁ ଶ୍ରୀନଗର-ଜମ୍ମୁ ରାଜପଥ ବନ୍ଦ ରହିଛି। ଫଳରେ ରାଜପଥରେ ବହୁସଂଖ୍ୟକ ଗାଡ଼ି ଅଟକି ରହିଛି। ଆବର୍ଜନା ସଫା ହେବା ପରେ ରାଜପଥ ଖୋଲାଯିବ ବୋଲି ରାମବାନ ଏସ୍ଏସ୍ପି ମୋହିତା ଶର୍ମା କହିଛନ୍ତି।
ମିଳିଥିବା ସୂଚନା ମୁତାବକ, ଗତ କିଛିଦିନ ହେବ ଉତ୍ତର ଭାରତର ଅନେକ ସ୍ଥାନରେ ବର୍ଷା ହୋଇଛି। ଏପରି କି ଜମ୍ମୁ-କଶ୍ମୀରର କେତେକ ଅଞ୍ଚଳରେ ମଧ୍ୟ ଶନିବାର ବର୍ଷା ହୋଇଥିଲା। ଏଭଳି ସ୍ଥିତିରେ ରାମବାନ ଜିଲାର ପାନ୍ଥିଆଲ ଅଞ୍ଚଳ ଶ୍ରୀନଗର-ଜମ୍ମୁ ରାଜପଥ ଟି -୫ ଟନେଲ ମୁହାଣରେ ଭୂସ୍ଖଳନ ଘଟି ପଥରଗୁଡିକ ଖସିପଡି ରାସ୍ତା ଉପରେ ପଡିଥିଲା। ଫଳରେ ରାଜପଥରେ ଯାତାୟାତ ବ୍ୟାହତ ହୋଇଛି। ଭୂସ୍ଖଳନ ସମୟରେ ଗାଡ଼ିରେ ବସିଥିବା କେତେକ ଯାତ୍ରୀ ଦୌଡି ପଲାଇଥିବା ଦେଖିବାକୁ ମିଳିଛି। ବର୍ତ୍ତମାନ ସୁଦ୍ଧା କୌଣସି କ୍ଷୟକ୍ଷତି ହୋଇ ନ ଥିବା ସୂଚନା ମିଳିଛି। ଅନ୍ୟପକ୍ଷେ ସୋସିଆଲ ମିଡିଆରେ ଘଟଣାର ଏକ ଭିଡିଓ ଭାଇରାଲ ହୋଇଛି। ଭିଡିଓରେ ହଠାତ୍ କେତେକ କାର ୟୁ-ଟର୍ନ ନେଇ ରୁଟ୍ ଛାଡି ପଳାଉଥିବା ନଜର ରହିଛି। ପାଣିପାଗ ବିଭାଗ ସୂଚନା ଅନୁଯାୟୀ, ଏପ୍ରିଲ ୩ରୁ ୬ତାରିଖ ଉକ୍ତ ଅଞ୍ଚଳରେ ପୁଣି ବର୍ଷା ହେବାର ସମ୍ଭାବନା ରହିଛି। ଏପରି କି ତୁଷାରପାତର ମଧ୍ୟ ଅନୁମାନ କରାଯାଉଛି।