ଭାସ୍କୋ, ୨୬।୨-ଇଣ୍ଡିଆନ ସୁପରଲିଗ୍ (ଆଇଏସ୍ଏଲ)ର ଗୁରୁବାର ଅନୁଷ୍ଠିତ ଲିଗ୍ ମ୍ୟାଚରେ ବେଙ୍ଗାଲୁରୁ ଏଫ୍ସିକୁ ୩-୨ ଗୋଲରେ ହରାଇ ଜାମସେଦପୁର ଏଫ୍ସି ୬ଷ୍ଠ ସ୍ଥାନ ଅଧିକାର କରିଛି। ଉଭୟ ଦଳପାଇଁ ଏହାଥିଲା ଚଳିତ ସିଜନର ଶେଷ ଲିଗ୍ ମ୍ୟାଚ। ଜାମସେଦପୁର ୨୦ ମ୍ୟାଚ ଖେଳି ୭ ବିଜୟ, ୬ ଡ୍ର ଓ ୭ ପରାଜୟ ସହ ୨୭ ପଏଣ୍ଟ ପାଇ ଅଭିଯାନ ଶେଷ କରିଛି। ବେଙ୍ଗାଲୁରୁ ୨୦ ମ୍ୟାଚରୁ ୫ ବିଜୟ, ୭ ଡ୍ର ଓ ୮ ପରାଜୟ ସହିତ ୨୨ ପଏଣ୍ଟ ପାଇ ୭ମ ସ୍ଥାନ ଅଧିକାର କରିଛି। ଗୁରୁବାର ମ୍ୟାଚରେ ଜାମସେଦପୁର ପକ୍ଷରୁ ଷ୍ଟିଫେନ୍ ଏଜେ, ଲେନ୍ କୁକି ଓ ଡେଭିଡ ଗ୍ରାଣ୍ଡେ ଏବଂ ବେଙ୍ଗାଲୁରୁର ଫ୍ରାନ୍ ଗ୍ଲେଜ ଓ ଅଧିନାୟି ସୁନୀଲ ଛେତ୍ରୀ ଗୋଟିଏ ଲେଖାଏ ଗୋଲ ସ୍କୋର କରିଥିଲେ। ବିଜୟୀ ଦଳର ଇଟର ମୋନରେ ହିରୋ ଅଫ୍ ଦି ମ୍ୟାଚ ପୁରସ୍କାର ପାଇଥିଲେ।
୧୯ଟି ମ୍ୟାଚ ଖେଳିଥିବା ଏଟିକେ ମୋହନବାଗାନ ୧୨ ବିଜୟ ସହ ୪୦, ମୁମ୍ବାଇ ସିଟି ଏଫ୍ସି ୧୧ ବିଜୟ ସହ ୩୭, ଏଫ୍ସି ଗୋଆ ଓ ନର୍ଥ ଇଷ୍ଟ ୟୁନାଇଟେଡ ୭ଟି ଲେଖାଏ ବିଜୟ ସହିତ ୩୦ ପଏଣ୍ଟରେ ରହି ପ୍ରଥମ ୪ ସ୍ଥାନ ଅଧିକାର କରିଛନ୍ତି। ୨୮ ପଏଣ୍ଟରେ ଥିବା ହାଇଦ୍ରାବାଦ ଏଫ୍ସିର ମଧ୍ୟ ପ୍ଲେ-ଅଫ୍ ଆଶା ଉଜ୍ଜୀବିତ ରହିଛି।