ଖୋର୍ଦ୍ଧା ଅଫିସ,୧୧ା୪: ଖୋର୍ଦ୍ଧା ବ୍ଲକ ଟାଙ୍ଗିଆପଡ଼ା ପଞ୍ଚାୟତ ଉଇଲ୍କିଶନ ନଗରର ଆରାଧ୍ୟା ଦେବୀ ମା’ ଅଳେଁଇଙ୍କ ପ୍ରସିଦ୍ଧ ଦଣ୍ଡଯାତ୍ରା ତଥା ଝାମୁଯାତ୍ରା ସୋମବାର ଠାରୁ ପାରମ୍ପରିକ ବିଧିବିଧାନପୂର୍ବକ ଆରମ୍ଭ ହୋଇଛି। କାହିଁ ଅନାଦି କାଳରୁ ଅଳେଁଇ ଠାକୁରାଣୀ ଏଠାରେ ବିଜେ କରିଛନ୍ତି। ମା’ଙ୍କ ବାରମାସ ତେର ଯାତ୍ରା ମଧ୍ୟରେ ଅନ୍ୟତମ ଚୈତମାସ ଝାମୁଯାତ୍ରା। ୫ ଦିନ ଧରି ଏହି ଯାତ୍ରା ଚାଲିବ। ଗ୍ରାମବାସୀ ଏବଂ ଆଖପାଖ ଅଞ୍ଚଳର ମାନସିକ ବ୍ରତଧାରୀମାନେ ଏହି ଯାତ୍ରାରେ ସାମିଲ ହୋଇ ଉପବାସ କରିଥାନ୍ତି। ରବିବାର ନିଶାର୍ଦ୍ଧରେ ମା’ଙ୍କ ଘଟକୁ ରୀତିନୀତି ପ୍ରକାରେ ପୂଜାର୍ଚ୍ଚନା କରାଯାଇ କାମନା ଗୃହରୁ ବାହାରକୁ ଅଣାଯାଇଥିଲା। ବ୍ରତଧାରୀମାନେ ନିକଟ ପୁଷ୍କରିଣୀରେ ସ୍ନାନକରି ଶୁଦ୍ଧପୂତ ହୋଇ ମା’ଙ୍କ ଘଟକୁ ପୂଜା କରିଥିଲେ। ମଧ୍ୟାହ୍ନରେ ବ୍ରତଧାରୀମାନେ ପୁଷ୍କରିଣୀ ସ୍ନାନସାରି ଗ୍ରାମର ସମସ୍ତ ଠାକୁର, ଠାକୁରାଣୀଙ୍କୁ ଆବାହନ କରି ମାନସିକଧାରୀଙ୍କ ଦାଣ୍ଡଦୁଆରେ ଦଣ୍ଡ ଭାଙ୍ଗିବା ପରମ୍ପରା ରହିଛି। ଆସନ୍ତା ୧୩ ତାରିଖ ମାସାନ୍ତରେ ମେରୁପର୍ବ ଓ ୧୪ରେ ମା’ଙ୍କ ଝାମୁଯାତ୍ରା ହେବ। ମାନସିକଧାରୀ, ପାଟଭୁକ୍ତା, କାଳିସି ପ୍ରମୁଖ ଉକ୍ତ ଦିନ ଅଗ୍ନିରେ ଚାଲିବେ। କରୋନା କଟକଣା ଯୋଗୁ ଦୁଇ ବର୍ଷ ଧରି ବିନା ଭକ୍ତରେ ଯାତ୍ରା ସମାପନ ହୋଇଥିବା ବେଳେ ଚଳିତବର୍ଷ ଭକ୍ତଙ୍କ ମଧ୍ୟରେ ପ୍ରବଳ ଉତ୍ସାହ ରହିଛି। ମା’ଙ୍କ ଦର୍ଶନ ଲାଗି ଭକ୍ତମାନଙ୍କ ମଧ୍ୟରେ ଏକ ଅପୂର୍ବ ଆନନ୍ଦଉଲ୍ଲାସ ଭରିରହିଛି। ଚଳିତବର୍ଷ ଗ୍ରାମବାସୀଙ୍କ ଉପସ୍ଥିତିରେ ମା’ଙ୍କ ଝାମୁଯାତ୍ରା ସମାରୋହରେ ପାଳନ କରାଯିବ ବୋଲି କମିଟି ପକ୍ଷରୁ କୁହାଯାଇଛି। ୧୨ ଓ ୧୩ ତାରିଖ ଦୁଇଦିନ ଧରି ଗ୍ରାମରେ ହନୁମାନ ଜୟନ୍ତୀ ଓ ବିଶ୍ୱର କଲ୍ୟାଣ ପାଇଁ ବିଶ୍ୱଶାନ୍ତି ମହାଯଜ୍ଞ ଆୟୋଜନ କରାଯିବ ବୋଲି ଗ୍ରାମ କମିଟି ସଭାପତି ପୂର୍ଣ୍ଣଚନ୍ଦ୍ର ସାହୁ, ସନାତନ ବିଶ୍ୱାଳ ପ୍ରକାଶ କରିଛନ୍ତି।