ବମ୍ବେ: ପ୍ରେମ ସମ୍ପର୍କକୁ ନେଇ ଚର୍ଚ୍ଚାରେ ଶ୍ରୀଦେବୀ ଲଳନା ତଥା ବଲିଉଡ୍ ଅଭିନେତ୍ରୀ ଜାହ୍ନବୀ କପୁର। ଦୀର୍ଘଦିନ ଧରି ଖୋଲାଖୋଲି ଭାବେ ଡେଟିଂକୁ ନେଇ ମୁହଁ ଖୋଲୁ ନ ଥିଲେ। ହେଲେ ଏବେ ସେ ସମ୍ପର୍କ ଉପରେ ମୋହର ମାରିଛନ୍ତି। ମଙ୍ଗଳବାର ଜାହ୍ନବୀ ଅଜୟ ଦେବଗନ ଅଭିନୀତ ଫିଲ୍ମ ‘ମୈଦାନ’ର ସ୍କ୍ରିନିଂରେ ପହଞ୍ଚିଥିଲେ। ଏଥିରେ ସେ ପ୍ରେମିକଙ୍କ ନାମର ଏକ ହୀରାର ହାର ପିନ୍ଧିଥିବା ଦେଖାଯାଇଛି। ଏହାର ଅନେକ ଫଟୋ ଭାଇରାଲ ହେଉଛି।
‘ମୈଦାନ’ର ସ୍କ୍ରିନିଂରେ ବାପା ବୋନି କପୁରଙ୍କ ସହ ପହଞ୍ଚିଥିଲେ ଜାହ୍ନବୀ। ଏହି କାର୍ଯ୍ୟକ୍ରମରେ ସେ ଧଳା ରଙ୍ଗର ଆଉଟ୍ଫିଟ୍ ପିନ୍ଧିଥିଲେ। ତାଙ୍କ ପୋଷାକ ବ୍ୟତିତ ନେକଲେସ୍ ସମସ୍ତଙ୍କ ଦୃଷ୍ଟି ଆକର୍ଷଣ କରିଥିଲା। କାରଣ ଏଥିରେ ତାଙ୍କ କଥିତ ପ୍ରେମିକଙ୍କ ନାମ ‘ଶିଖୁ’ ବୋଲି ଲେଖାଯାଇଥିଲା।
କହିରଖୁଛୁ, ଜାହ୍ନବୀ ଶିଖର ପାହାଡ଼ିଆଙ୍କୁ ଡେଟ୍ କରୁଛନ୍ତି। ସେ ମହାରାଷ୍ଟ୍ରର ପୂର୍ବତନ ମୁଖ୍ୟମନ୍ତ୍ରୀ ସୁଶିଲ କୁମାର ଶିନ୍ଦେଙ୍କ ନାତି। ନିକଟରେ ସେ ଅଭିନେତ୍ରୀଙ୍କ ସହ ତିରୁମାଳା ମନ୍ଦିର ଯାଇଥିବା ନଜର ଆସିଥିଲା। ଏହାଛଡ଼ା ଜାହ୍ନବୀଙ୍କ ଜନ୍ମଦିନରେ ଶିଖର କିଛି ଫଟୋ ନିଜର ଇନଷ୍ଟାଗ୍ରାମରେ ଶେୟାର କରିଥିଲେ। ସେଥିରୁ ଦୁହିଁଙ୍କ ସମ୍ପର୍କ ଉପରୁ ପରଦା ହଟିଥିଲା।