ରାଜନଗର,୧୪।୫(ଡି.ଏନ.ଏ.): ରାଜନଗର ବ୍ଲକ କେରେଡାଗଡ଼ ଗାଁର ୨୧୨ ପରିବାର ବଳଭଦ୍ରପ୍ରସାଦ ଗାଁର ରିଟେଲର ପ୍ରକାଶ ଚନ୍ଦ୍ର ବଳଙ୍କଠାରୁ ରାଶନ ସାମଗ୍ରୀ ଆଣିଥାନ୍ତି। ରିଟେଲର କେରେଡାଗଡ଼ ବଜାର ଉପରେ ଏକ ପଏଣ୍ଟ ଖୋଲି ହିତାଧିକାରୀଙ୍କୁ ରାଶନ ସାମଗ୍ରୀ ଯୋଗାଇ ଦେଇଥାନ୍ତି। ମାର୍ଚ୍ଚ ୧୫ରୁ ୨୦ ତାରିଖ ମଧ୍ୟରେ ୨୧୨ଜଣ ହିତାଧିକାରୀଙ୍କୁ ୩ ମାସର ଚାଉଳ ଦେବା ପାଇଁ ଫିଙ୍ଗର ପ୍ରିଣ୍ଟ/ଆଇ ସ୍କାନ କରି ରସିଦ ଦେଇଥିଲେ। ଦିନେ ଦୁଇଦିନ ଭିତରେ ଚାଉଳ ଦିଆଯିବ ବୋଲି ପ୍ରତିଶ୍ରୁତି ଦେଇଥିଲେ। ମାତ୍ର ଆଜିକାଲି କହି ଦିନ ଗଡ଼ାଇ ଚାଲିଥିଲେ। ଗତ ୭ ତାରିଖରୁ ଜାନୁୟାରୀ ଓ ଫେବୃୟାରୀର ଚାଉଳ ହିତାଧିକାରୀଙ୍କୁ କେରେଡାଗଡ଼ ପଏଣ୍ଟରେ ରିଟେଲର ବଣ୍ଟନ କରୁଛନ୍ତି। ୩ ମାସର ଚାଉଳ ଦେବାକୁ ୨ ମାସ ତଳୁ ରସିଦ ଦେଇଥିଲେ। ମାତ୍ର ଏବେ ୩ ମାସର ଚାଉଳ ବଦଳରେ ୨ ମାସର ଚାଉଳ ବଣ୍ଟନ କରୁଛନ୍ତି। ଏ ସମ୍ପର୍କରେ ହିତାଧିକାରୀମାନେ ଅଭିଯୋଗ କଲେ, ଉପରୁ ଚାଉଳ ଆସିନି କହି ଭୂଅଁା ବୁଲାଇ ଚାଲିଛନ୍ତି।
କେରେଡାଗଡ଼ ଗାଁର ନିରଞ୍ଜନ ରାଉତଙ୍କ ଅଭିଯୋଗ ହେଲା ମାର୍ଚ୍ଚରେ ଆମକୁ ୩ ମାସର ଚାଉଳ ଦେବେ କହି ଫିଙ୍ଗର ପ୍ରିଣ୍ଟ ନେଇ ରସିଦ ଦେଇଥିଲେ। ଚଳିତମାସ ୮ ତାରିଖରେ ଆମକୁ ୨ ମାସର ଚାଉଳ ୪୦ କେଜି ଦେଇଛନ୍ତି। ଆମ ରସିଦରେ ୨ମାସ ଚାଉଳ ଦେଇଥିବା ଠିକ୍ ମାରିବା ସହ ଆମ ଖାତାରେ ୨ ମାସର ଚାଉଳ ଦେଇଥିବା ଲେଖି ଦେଇଛନ୍ତି। ବ୍ଲକ ସାରା ଏବେ ଏପ୍ରିଲ, ମେ, ଜୁନ ମାସର ଚାଉଳ ବଣ୍ଟା ଯାଉଥିବା ବେଳେ ଆମେ ଏଯାଏଁ ମାର୍ଚ୍ଚ ମାସର ଚାଉଳ ପାଇନୁ। କେବଳ ନିରଞ୍ଜନ ନୁହଁନ୍ତି, ଗାଁର ଝରଣା ସେଠୀ, ସାବିତ୍ରୀ ମଳିକ, ଘନଶ୍ୟାମ ମଳିକ, ଜାନକୀ ମଳିକ, ଭାରତୀ ମଳିକ, ଧନେଶ୍ୱର ସେଠୀ ପ୍ରମୁଖ ସମାନ ଅଭିଯୋଗ କରିଛନ୍ତି। ଆମଠାରୁ ମାର୍ଚ୍ଚରେ ଟିପ ନେଇ ଏବେ ୩ ମାସ ବଦଳରେ ୨ ମାସର ଚାଉଳ ଦେଉଥିବା ସମ୍ପର୍କରେ ଅଭିଯୋଗ କରିଛନ୍ତି। ଏ ସମ୍ପର୍କରେ କେରେଡାଗଡ଼ଠାରେ ରିଟେଲରଙ୍କ ପକ୍ଷରୁ ଚାଉଳ ବାଣ୍ଟୁଥିବା ସନାତନ ନାୟକଙ୍କୁ ପଚାରିବାରୁ ମୁଁ କିଛି ନୁହେଁ, ରିଟେଲର ବଳଙ୍କ ପକ୍ଷରୁ ଏଠାରେ ରାଶନ ସାମଗ୍ରୀ ବାଣ୍ଟୁଛି। ଉପରୁ ମାର୍ଚ୍ଚ ମାସର ଚାଉଳ ଆସିନାହିଁ ବୋଲି ରିଟେଲର କହୁଛନ୍ତି। ସେଥିପାଇଁ ମୁଁ ହିତାଧିକାରୀଙ୍କୁ ଦେଇଥିବା ରସିଦରେ ଜାନୁୟାରୀ ଓ ଫେବୃୟାରୀ ମାସର ଚାଉଳ ଦେଉଛି ବୋଲି ଲେଖିକି ଦେଇଛି ବୋଲି ସେ କହିଛନ୍ତି। ଏ ସମ୍ପର୍କରେ ରିଟେଲର ପ୍ରକାଶ ଚନ୍ଦ୍ର ବଳଙ୍କୁ ପଚାରିବାରୁ ପୂର୍ବରୁ ଆମେ ସବୁ ବାଣ୍ଟି ସାରିଛୁ। ଏବେ ଜାନୁୟାରୀ, ଫେବୃୟାରୀର ରାଶନ ବଣ୍ଟା ଯାଉଛି। ମାର୍ଚ୍ଚ ମାସର ଚାଉଳ ଆସିନି ବୋଲି ସେ କହିଛନ୍ତି।