ଟୋକିଓ,୨୬।୪ : ଭାରତର ବିକ୍ରମ ଲାଣ୍ଡର ପରି ଜାପାନର ଏକ ସ୍ପେସକ୍ରାଫ୍ଟ ଦୁର୍ଘଟଣାର ସମ୍ମୁଖୀନ ହୋଇଛି। ଚନ୍ଦ୍ରରେ ଅବତରଣ କରିବାରେ ଜାପାନର ସ୍ବପ୍ନ ପୂରଣ ହୋଇ ପାରି ନାହିଁ। ଜାପାନର ଏକ ଘରୋଇ କମ୍ପାନୀ ଆଇସ୍ପେସ ଇଙ୍କର ଏକ ଲ୍ୟାଣ୍ଡର ଚନ୍ଦ୍ରକୁ ଯାଇଥିଲା। କୁହାଯାଉଥିଲା ପ୍ରଥମ ଥର ପାଇଁ ଦେଶର ଏକ ଘରୋଇ କମ୍ପାନୀର ସ୍ପେସକ୍ରାଫ୍ଟ ଚନ୍ଦ୍ର ପୃଷ୍ଠରେ ଅବତରଣ କରିବ, କିନ୍ତୁ ଏହା ହୋଇପାରି ନାହିଁ। ଗ୍ରାଉଣ୍ଡ ଟିମ୍ ଲ୍ୟାଣ୍ଡର ସହ ସମ୍ପର୍କ ହରାଇଛି।
ଲ୍ୟାଣ୍ଡର ହାକୁତୋ-ଆର ମିଶନ ୧ (ହାକୁଟୋ-ଆର ମିଶନ ୧ ଏମ ୧) ଜାପାନ କମ୍ପାନୀର ଏହି ଉପଗ୍ରହ ଗତ ବର୍ଷ ଡିସେମ୍ବରରେ ଫ୍ଲୋରିଡାର କେପ କାନାଭେରାଲରୁ ଏକ ସ୍ପେସ ଏକ୍ସ ରକେଟ ସହିତ ଉତକ୍ଷେପଣ କରାଯାଇଥିଲା।
ଯୋଗାଯୋଗ ହରାଇବା ପରେ ପ୍ରତିଷ୍ଠାତା ତଥା ସିଇଓ ତକେଶି ହାକାମାଦା କହିଛନ୍ତି ଯେ ଆମେ ସମ୍ପର୍କ ହରାଇଛୁ। ଆମେ ଆଶା କରିଥିଲୁ ସଂଯୋଗ ପୁନଃସ୍ଥାପିତ ହେବ, କିନ୍ତୁ ତାହା ହୋଇନାହିଁ ।ଏହା ସ୍ପଷ୍ଟ ଆମେ ଚନ୍ଦ୍ର ପୃଷ୍ଠରେ ଅବତରଣ କରିପାରିଲୁ ନାହିଁ ଏବଂ ଆମର ମିଶନ ବିଫଳ ହେଲା।