ନୂଆଦିଲ୍ଲୀ, ୧୯।୧୧: ଫୁକୁସିମାରେ ଅକାମୀ ହୋଇପଡ଼ିଥିବା ଆଣବିକ ପ୍ଲାଣ୍ଟର ରେଡିଓଆକ୍ଟିଭ୍ ବିଷାକ୍ତ ଜଳକୁ ୨୦୨୨ ସୁଦ୍ଧା ସମୁଦ୍ରକୁ ଛାଡ଼ିଦେବା ଲାଗି ଜାପାନ ସରକାର ନିଷ୍ପତ୍ତି ନେଇଛନ୍ତି। ଫଳରେ ଭାରତ ସମେତ ଏସୀୟ ଉପକୂଳବର୍ତ୍ତୀ ଦେଶଗୁଡ଼ିକ ପାଇଁ ବିପଦ ସୃଷ୍ଟି ହେବାକୁ ଯାଉଛି। ଏଭଳି ଭୁଲ୍ ନିଷ୍ପତ୍ତି ଯୋଗୁ ଜଳଚର ପ୍ରାଣୀଙ୍କ ସମେତ ଉପକୂଳବର୍ତ୍ତୀ ଅଞ୍ଚଳର ଲୋକମାନେ କ୍ୟାନ୍ସର ସମେତ ବିଭିନ୍ନ ରୋଗରେ ପଡ଼ିବେ ବୋଲି ବିଶେଷଜ୍ଞମାନେ ମତ ଦେଇଛନ୍ତି।
ଛଡ଼ାଯିବାକୁ ଥିବା ବିପୁଳ ପରିମାଣର ବିଷାକ୍ତ ଜଳରେ ରେଡିଓଆକ୍ଟିଭ୍ ଆଇସୋଟୋପ୍ ଯଥା ସେସିୟମ, ଟ୍ରିଟିୟମ, କୋବାଲ୍ଟ ଏବଂ କାର୍ବନ-୧୨ ରହିଛି। ସେଗୁଡ଼ିକ ନଷ୍ଟ ହେବା ଲାଗି ୧୨ରୁ ୩୦ ବର୍ଷ ଲାଗିଯିବ। ଏହି ଜଳ ଯାହା ସଂସ୍ପର୍ଶରେ ଆସିବ ତାକୁ ନଷ୍ଟ କରିବ ଏବଂ ଉପକୂଳ ଦେଶଗୁଡ଼ିକର ମତ୍ସ୍ୟ ଶିଳ୍ପ ସମ୍ବନ୍ଧୀୟ ଅର୍ଥନୀତିକୁ ଗୁରୁତର ପ୍ରଭାବିତ କରିବ। ପୂର୍ବରୁ କେବେ ଏତେ ପରିମାଣରେ ରେଡିଓଆକ୍ଟିଭ୍ ଜଳ ସମୁଦ୍ରକୁ ଛଡ଼ାଯାଇ ନ ଥିଲା। ତେଣୁ ଏହା ଏକ ଭୁଲ୍ ପରମ୍ପରା ସୃଷ୍ଟି କରିବ ଏବଂ ଅନ୍ୟ ଦେଶଗୁଡ଼ିକ ମଧ୍ୟ ଭବିଷ୍ୟତରେ ଏଭଳି କାର୍ଯ୍ୟ କରିବା ଲାଗି ପଛାଇବେ ନାହିଁ। ମାନବ ଜାତି ତିଷ୍ଠି ରହିବାକୁ ହେଲେ ପରିବେଶ ଓ ସ୍ବାସ୍ଥ୍ୟ ସମ୍ପର୍କରେ ଚିନ୍ତା କରାଯିବା ଗୁରୁତ୍ୱପୂର୍ଣ୍ଣ। ଏନେଇ ବିଶ୍ୱସ୍ତରରେ ବିତର୍କ ହେବା ଆବଶ୍ୟକ ବୋଲି ପ୍ରତିରକ୍ଷା ଗବେଷଣା ବିକାଶ ସଂଗଠନ (ଡିଆର୍ଡିଓ)ର ସ୍ବାସ୍ଥ୍ୟ ବିଜ୍ଞାନ ମହାନିର୍ଦ୍ଦେଶକ ଏ.କେ. ସିଂ କହିଛନ୍ତି।
୨୦୧୧ ମାର୍ଚ୍ଚ ୧୧ରେ ୯.୦ ତୀବ୍ରତାର ଭୂକମ୍ପ ସାଙ୍ଗକୁ ୧୫ ମିଟର ଉଚ୍ଚ ସୁନାମି ଆସି ଜାପାନର ଉତ୍ତର-ପୂର୍ବ ଉପକୂଳକୁ ଧ୍ୱସ୍ତବିଧ୍ୱସ୍ତ କରିଦେଇଥିଲା। ଏହି ଭୂକମ୍ପରେ ଫୁକୁସିମାର ୫,୩୦୬ ମେଗାଓ୍ବାଟ ଆଣବିକ ପ୍ଲାଣ୍ଟ ନଷ୍ଟ ହୋଇଯାଇଥିଲା। ଏହା ବିଶ୍ୱର ଦ୍ୱିତୀୟ ବୃହତ୍ ଆଣବିକ ବିପର୍ଯ୍ୟୟ ଥିଲା। ପ୍ଲାଣ୍ଟର ରିଆକ୍ଟରଗୁଡ଼ିକରୁ ବାହାରିଥିବା ୧୨ ଲକ୍ଷ ଟନ୍ ରେଡିଓଆକ୍ଟିଭ୍ ଜଳକୁ ୧୦୦୦ରୁ ଅଧିକ ଟାଙ୍କିରେ ରଖାଯାଇଛି। ସରକାର ଏହାକୁ ସମୁଦ୍ରକୁ ଛାଡ଼ିଦେବା ଲାଗି ନିଷ୍ପତ୍ତି ନେଇଥିବାରୁ ବିଶେଷଜ୍ଞମାନେ ଉଦ୍ବେଗ ପ୍ରକାଶ କରିଛନ୍ତିି। ଏହାର ପ୍ରଭାବ ସିଧାସଳଖ ମାନବ ଓ ଜଳଜୀବଙ୍କ ଉପରେ ପଡ଼ିବ ବୋଲି ଭାରତ ସରକାରଙ୍କ ଆଣବିକ ସ୍ବାସ୍ଥ୍ୟ ବିଜ୍ଞାନୀମାନେ କହିଛନ୍ତି। ମାନବ ଶରୀରରେ ଟ୍ରିଟିୟମ ପ୍ରବେଶ କରିବା ସମ୍ଭାବନା ଥିବାରୁ ଏହା ବିଭିନ୍ନ ଅଙ୍ଗରେ ଦୀର୍ଘଦିନ ରହିବ। ରେଡିଓଆକ୍ଟିଭ୍ ଜଳର ତ୍ୱରିତ୍ ପ୍ରଭାବ ମତ୍ସ୍ୟ ଓ ଅନ୍ୟାନ୍ୟ ଉପକୂଳ ଜଳଜୀବ ଏବଂ ପାନୀୟ ଜଳ ଉପରେ ପଡ଼ିବ। ଶିଳାସ୍ତର ଉପରେ ରେଡିଓଆକ୍ଟିଭ୍ ଉପାଦାନ ମଧ୍ୟ ଜମାହେବ ବୋଲି ବିଶେଷଜ୍ଞ କହିଛନ୍ତି।