ମୁମ୍ବାଇ: ଇଣ୍ଡିଆନ ସୁପର ଲିଗ୍ (ଆଇଏସ୍ଏଲ୍) ଦଳ ମୁମ୍ବାଇ ସିଟି ଏଫ୍ସି ସିଜନ ୨୦୨୦-୨୧ ପାଇଁ ଇଂଲଣ୍ଡ ଜନ୍ମିତ ଜାପାନିଜ ମିଡ୍ ଫିଲ୍ଡର ସାଏ ଗୋଡାର୍ଡଙ୍କ ସହିତ ଚୁକ୍ତି କରିଛି। ୨୩ ବର୍ଷୀୟ ଏହି ଫୁଟ୍ବଲର ଗୋଟିଏ ସିଜନ ପାଇଁ ଋଣ ଭିତ୍ତିରେ ଇଟାଲିଆନ କ୍ଲବ ବେନେଭେଣ୍ଟୋ କାଲସିଓ ଦଳରୁ ଆସିଛନ୍ତି। ଗୋଡାର୍ଡ ହେଉଛନ୍ତି ଇଂଲିଶ କ୍ଲବ ଟୋଟେନହାମ୍ ହଟ୍ସପୁର ୟୁଥ୍ ଏକାଡେମୀର ସୃଷ୍ଟି। ସେ ୨୦୧୭ରେ ସ୍ପର୍ସ କ୍ଲବ ଛାଡ଼ିବା ପୂର୍ବରୁ ୧୮ବର୍ଷରୁ କମ୍, ୨୧ବର୍ଷରୁ କମ୍ ଏବଂ ୨୩ ବର୍ଷରୁ କମ୍ ଦଳ ତରଫରୁ ପ୍ରତିନିଧିତ୍ୱ କରିଛନ୍ତି। ଗୋଡାର୍ଡ ପରେ ଇଟାଲୀ ଯାଇଥିଲେ। ସେଠାରେ ସେ ୨୦୧୮ରେ ସିରି ବି’ ଦଳ ବେନେଭେଣ୍ଟୋ ଦଳ ସହ ୩ ବର୍ଷିଆ ଚୁକ୍ତି କରିଥିଲେ। ସମୟ ମିଳିଲେ ସେ ସାମୟିକ ଅନ୍ୟ କ୍ଲବ ତରଫରୁ ଖେଳିଥାନ୍ତି। ୨୦୧୯-୨୦ ସିଜନ ପାଇଁ ସେ ଋଣ ଭିତ୍ତିରେ ଏହି ମିଡ୍ଫିଲ୍ଡର ସାଇପ୍ରସର ଏକ କ୍ଲବ ପାଫୋସ୍ ଏଫ୍ସି ତରଫରୁ ଖେଳିଥିଲେ। ଗୋଡାର୍ଡ ଆହୁରି ମଧ୍ୟ ଜାପାନର ୧୬ ବର୍ଷରୁ କମ୍ , ୧୭ ବର୍ଷରୁ କମ୍ ଏବଂ ୟୁଥ୍ ଦଳ ତରଫରୁ ଖେଳିଛନ୍ତି।