ଟୋକିଓ,୩୦।୧(ଏପି): ଜାପାନରେ କରୋନା ଭାଇରସ ମହାମାରୀର ପ୍ରକୋପ ବୃଦ୍ଧି ପାଇବାରେ ଲାଗିଛି। ଫଳରେ ଟୋକିଓରେ ଅଲିମ୍ପିକ୍ସ ଆୟୋଜନ ନେଇ ଅନିଶ୍ଚିତତା ଦେଖାଦେଇଛି। ଏହା ସତ୍ତ୍ୱେ ଅଲିମ୍ପିକ୍ସ ଆୟୋଜନ କରିବାକୁ ପ୍ରତିବଦ୍ଧ ଅଛୁ ବୋଲି ଜାପାନ ପ୍ରଧାନମନ୍ତ୍ରୀ ୟୋଶିହିଡେ ସୁଗା କହିଛନ୍ତି। ମହାମାରୀ ଉପରେ ମନୁଷ୍ୟର ବିଜୟକୁ ସାବ୍ୟସ୍ତ କରିବା ପାଇଁ ଏହି ମେଗା ଇଭେଣ୍ଟ ଆୟୋଜନ କରିବା ଜରୁରୀ ହୋଇପିଡିଛି ବୋଲି ଓ୍ବାଲର୍ଡ ଇକୋନୋମିକ ଫୋରମ୍ର ଭର୍ଚୁଆଲ ମିଟିଂରେ ଯୋଗ ଦେଇ ସେ କହିଛନ୍ତି। ଆଗାମୀ ଦିନରେ ବିଭିନ୍ନ ମହାମାରୀକୁ ସାମ୍ନା କରିବାରେ ଏହା ସହାୟକ ହେବ। ଆସନ୍ତା ଗ୍ରୀଷ୍ମରେ ଆମେ ଅଲିମ୍ପିକ୍ସ ଓ ପାରାଅଲିମ୍ପିକ୍ସ ଆୟୋଜନ କରିବୁ। ଏହା ମହାମାରୀ ବିରୋଧରେ ବିଜୟକୁ ସୂଚାଇବ। ଅଲିମ୍ପିକ୍ସ ସଫଳତାର ସହ ଆୟୋଜନ ହେଲେ ସାରା ବିଶ୍ୱରେ ଲୋକଙ୍କ ମଧ୍ୟରେ ଆଶା ଓ ସାହସ ବୃଦ୍ଧିପାଇବ ବୋଲି ସେ କହିଛନ୍ତି।
ମହାମାରୀ କାରଣରୁ ଗୋଟିଏ ବର୍ଷ ଅଲିମ୍ପିକ୍ସକୁ ପୂର୍ବରୁ ଘୁଞ୍ଚାଯାଇଥିଲା। ଆଗାମୀ ଜୁଲାଇରେ ଏହା ଆୟୋଜନ ହେବ ବୋଲି ଅଲିମ୍ପିକ୍ସ ଅଧିକାରୀମାନେ ବାରମ୍ବାର କହିଆସୁଛନ୍ତି। ଜାପାନରେ କରୋନା ସଂକ୍ରମଣ ଖୁବ୍ଶୀଘ୍ର ନିୟନ୍ତ୍ରଣକୁ ଆସିବ। କୋଭିଡ୍-୧୯ ଆମକୁ ବହୁତ କଥା ଶିଖାଇଛି ଓ ଭବିଷ୍ୟତରେ ବିଭିନ୍ନ ବିପଦକୁ ସମ୍ମୁଖୀନ ହେବାରେ ଏହା ସହାୟତା ପ୍ରଦାନ କରିବ ବୋଲି ସେ କହିଛନ୍ତି। ଉଲ୍ଲେଖଥାଉ କି ଟୋକିଓରେ ଇତିମଧ୍ୟରେ କରୋନାର ଅବନତି ହୋଇଛି। କିନ୍ତୁ ଏହା ଯଥେଷ୍ଟ ନୁହେଁ ବୋଲି କୁହାଯାଇଛି। କରୋନାକୁ ରୋକିବା ପାଇଁ ଆହୁରି କିଛି ଦୃଢ଼ କାର୍ଯ୍ୟାନୁଷ୍ଠାନ ହାତକୁ ନିଆଯିବାର ଆବଶ୍ୟକତା ରହିଛି ବୋଲି କୁହାଯାଇଛି।
