ମସ୍କଟ,୧୦।୯: ଭାରତୀୟ ମୂଳ ଜସକରଣ ମାଲହୋତ୍ରା ଏକ ଦିନିକିଆ ଅନ୍ତର୍ଜାତୀୟ ମ୍ୟାଚ୍ରେ ୬ଟି ବଲ୍ରେ ୬ଟି ଛକା ମାରି ଏକ ନୂଆ ରେକର୍ଡ ସୃଷ୍ଟି କରିଛନ୍ତି। ସେ ହର୍ସେଲ ଗିବ୍ସଙ୍କ ପରେ ଦିନିକିଆରେ ଗୋଟିଏ ଓଭରରେ ୬ଟି ଛକା ମାରି ବିଶ୍ୱର ଦ୍ୱିତୀୟ ଖେଳାଳି ହୋଇଛନ୍ତି। ଆମେରିକାରୁ ଖେଳୁଥିବା ଜସକରଣ ପାପୁଆ ନ୍ୟୁ ଗିନି ବିପକ୍ଷରେ ୫୦ତମ ଓଭରରେ ଏହି ସଫଳତା ହାସଲ କରିଥିଲେ। ସେ ୧୭୩ ର ଇନିଂସରେ ୧୬ ଛକା ଓ ୪ ଚୌକା ମାରିଥିଲେ। ଅର୍ଥାତ୍ ସେ ୨୦ ବଲରେ ୧୧୨ ରନ ସଂଗ୍ରହ କରିଥିଲେ।
ମୂଳତଃ ପଞ୍ଜାବରୁ ଆସିଥିବା ୩୧ ବର୍ଷୀୟ ଜସକରଣଙ୍କ ଏହା ହେଉଛି ସପ୍ତମ ଅନ୍ତର୍ଜାତୀୟ ଦିନିକିଆ ମ୍ୟାଚ୍। ଏହି ମ୍ୟାଚ ପୂର୍ବରୁ ତାଙ୍କର ସର୍ବାଧିକ ସ୍କୋର ୧୮ ରନ ଥିଲା। ସେ ଦ୍ରୁତ ବୋଲର ଗାଉଡିଡି ଟୋକାଙ୍କ ଓଭରରେ ଏହି ପ୍ରଦର୍ଶନ କରିଥିଲେ। ସେ ୫ ନମ୍ବରରେ ବ୍ୟାଟିଂ କରିବାକୁ ଆସିଥିଲେ। ସେ ୧୨୪ ବଲର ସମ୍ମୁଖୀନ ହୋଇଥିଲେ। ଏହି ମ୍ୟାଚ୍ରେ ପ୍ରଥମ ଖେଳି ଆମେରିକା ୯ ଉଇକେଟ ହରାଇ ୨୭୧ ରନ ସଂଗ୍ରହ କରିଥିଲା।
ଜସକରନ ମାଲହୋତ୍ରା ପୂର୍ବରୁ ଦକ୍ଷିଣ ଆଫ୍ରିକାର ହର୍ସେଲ ଗିବ୍ସ ଦିନିକିଆ କ୍ରିକେଟରେ ୬ ବଲ୍ରୁ ୬ ଛକା ମାରିଥିଲେ। ୨୦୦୭ରେ ନେଦରଲ୍ୟାଣ୍ଡ ବିପକ୍ଷ ଦିନିକିଆ ବିଶ୍ୱକପ ସମୟରେ ସେ ଏହା କରିଥିଲେ। ଏଥି ସହିତ, ଭାରତର ପୂର୍ବତନ ବ୍ୟାଟ୍ସମ୍ୟାନ ଯୁବରାଜ ସିଂ ୨୦୦୭ ଟି -୨୦ ବିଶ୍ୱକପରେ ୬ ବଲ୍ରୁ ୬ ଛକା ମାରିଥିଲେ। ସେ ଇଂଲଣ୍ଡର ଦ୍ରୁତ ବୋଲର ଷ୍ଟୁଆର୍ଟ ବ୍ରଡଙ୍କ ଓଭରରେ ୬ଟି ଛକା ମାରିଥିଲେ। ଚଳିତ ବର୍ଷ ମାର୍ଚ୍ଚରେ ୱେଷ୍ଟଇଣ୍ଡିଜ କିରନ ପୋଲାର୍ଡ ଶ୍ରୀଲଙ୍କା ବିପକ୍ଷ ଟି -୨୦ ଇଣ୍ଟରନ୍ୟାସନାଲରେ ଗୋଟିଏ ଓଭରରେ ୬ଟି ଛକା ମାରିଥିଲେ।
ଏହି ମ୍ୟାଚ ପୂର୍ବରୁ ଜସକରନ ସିଂ ୬ଟି ଦିନକିଆ ଏବଂ ୬ ଟି -୨୦ ଅନ୍ତର୍ଜାତୀୟ ଖେଳିଥିଲେ। କିନ୍ତୁ ସେ ଉଭୟ ଫର୍ମାଟରେ ଗୋଟିଏ ଅର୍ଦ୍ଧଶତକ ହାସଲ କରିପାରି ନ ଥିଲେ।