ନୂଆଦିଲ୍ଲୀ,୮।୧: ଆଇସିସି ର଼୍ୟାଙ୍କିଂରେ ଭାରତୀୟ ଉଇକେଟ କିପର ବ୍ୟାଟ୍ସମ୍ୟାନ ରିଷଭ ପନ୍ତ ଏବଂ ଜସପ୍ରୀତ ବୁମ୍ରା ଉପକୃତ ହୋଇଛନ୍ତି। ବୁମ୍ରା ଜୀବନର ଶ୍ରେଷ୍ଠ ର଼୍ୟାଙ୍କିଂ ହାସଲ କରିଛନ୍ତି। ବୁମ୍ରା ଟେଷ୍ଟରେ ନମ୍ବର-୧ ବୋଲର। ଏଥିସହ ସେ ବର୍ତ୍ତମାନ ଏହି ଫର୍ମାଟରେ ନିଜ କ୍ୟାରିୟରର ସର୍ବଶ୍ରେଷ୍ଠ ରେଟିଂ ହାସଲ କରିଛନ୍ତି। ବର୍ଡର-ଗାଭାସ୍କର ଟ୍ରଫିରେ ବୁମରାଙ୍କ କ୍ରମାଗତ ଚମତ୍କାର ବୋଲିଂ ତାଙ୍କୁ ୯୦୮ ରେଟିଂ ସହ ଟେଷ୍ଟ ମାନ୍ୟତାର ଶୀର୍ଷରେ ରଖିଛି। ୯୦୦ରୁ ଅଧିକ ଆଇସିସି ରେଟିଂ ସହ ସେ ବର୍ତ୍ତମାନ ଟେଷ୍ଟରେ ଏକମାତ୍ର ବୋଲର ଅଟନ୍ତି। ଜସପ୍ରୀତ ବୁମରାଙ୍କ ଶକ୍ତିଶାଳୀ ବୋଲିଂ ବର୍ଡର ଗାଭାସ୍କର ଟ୍ରଫିରେ ଦେଖିବାକୁ ମିଳିଥିଲା। ସେ ସିରିଜ୍ରେ ସର୍ବାଧିକ ୩୨ ଉଇକେଟ୍ ନେଇଥିଲେ। ତେବେ ଏହି ପାଞ୍ଚ ମ୍ୟାଚ ବିଶିଷ୍ଟ ସିରିଜରେ ଟିମ ଇଣ୍ଡିଆକୁ ୩-୧ ପରାଜୟର ସମ୍ମୁଖୀନ ହେବାକୁ ପଡିଥିଲା।
ପୁଣି ଥରେ ପନ୍ତ ଶ୍ରେଷ୍ଠ-୧୦ ବ୍ୟାଟ୍ସମ୍ୟାନ ନିକଟକୁ ଆସିଛନ୍ତି। ଅଷ୍ଟ୍ରେଲିଆ ବିପକ୍ଷ ସିଡନୀ ଟେଷ୍ଟର ଦ୍ୱିତୀୟ ଇନିଂସରେ ରିଷଭ ପନ୍ତ ଚମତ୍କାର ବ୍ୟାଟିଂ କରିଥିଲେ। ଅଷ୍ଟ୍ରେଲିଆ ବିପକ୍ଷରେ କ୍ରମାଗତ ଖରାପ ପ୍ରଦର୍ଶନ ପରେ ରିଷଭ ପନ୍ତ ଟପ-୧୦ ବାଦ୍ ପଡିଥିଲେ ମଧ୍ୟ ସିଡନୀ ଟେଷ୍ଟ ପରେ ସେ ପ୍ରତ୍ୟାବର୍ତ୍ତନ କରିଛନ୍ତି। ତେବେ ଆଇସିସି ର଼୍ୟାଙ୍କିଙ୍ଗରେ ଟପ-୫ରେ କୌଣସି ପରିବର୍ତ୍ତନ ହୋଇନାହିଁ। ଇଂଲଣ୍ଡର ଜୋ ରୁଟ୍ ଶୀର୍ଷରେ ରହିଛନ୍ତି। ଇଂଲଣ୍ଡର ହ୍ୟାରି ବ୍ରୁକ ୮୭୬ ରେଟିଂ ପଏଣ୍ଟ ସହିତ ଦ୍ୱିତୀୟ ସ୍ଥାନରେ ଅଛନ୍ତି। ନ୍ୟୁଜିଲାଣ୍ଡର କେନ ୱିଲିୟମ୍ସନ ୮୬୭ ରେଟିଂ ସହିତ ୩ ନମ୍ବରରେ ଅଛନ୍ତି। ଭାରତର ଯଶସ୍ବୀ ଜୟସ୍ବାଲ ୮୪୭ ରେଟିଂ ସହ ୪ ନମ୍ବରରେ ରହିଛନ୍ତି। ଭାରତ ବିପକ୍ଷରେ ବର୍ଡର-ଗାଭାସ୍କର ଟ୍ରଫିରେ ଚମତ୍କାର ପ୍ରଦର୍ଶନ କରିଥିବା କରିଥିବା ଟ୍ରାଭିସ ହେଡ ୭୭୨ ରେଟିଂ ପଏଣ୍ଟ ସହ ପଞ୍ଚମ ସ୍ଥାନରେ ଅଛନ୍ତି। ଏହିପରି, ଟପ-୫ ବ୍ୟାଟ୍ସମ୍ୟାନ ର଼୍ୟାଙ୍କିଂରେ କୌଣସି ପରିବର୍ତ୍ତନ ଦେଖାଯାଇ ନାହିଁ।
