ପାର୍ଲ, ୧୮ା୧: ନିକଟ ଭବିଷ୍ୟତରେ ତାଙ୍କୁ ଯଦି ଜାତୀୟ ଦଳର ଅଧିନାୟକ ହେବା ଲାଗି ସୁଯୋଗ ମିଳେ, ତେବେ ସେ ନିଜକୁ ଗୌରବାନ୍ବିତ ମନେକରିବେ ବୋଲି କହିଛନ୍ତି ଭାରତର ଅନ୍ୟତମ ପ୍ରମୁଖ ପେସ୍ ବୋଲର ଯଶପ୍ରୀତ ବୁମ୍ରା।
ବିରାଟ କୋହଲି ସମସ୍ତ ଫର୍ମାଟ୍ର ଅଧିନାୟକ ପଦବୀରୁ ଇସ୍ତଫା ଦେଇସାରିଛନ୍ତି। ଅନ୍ୟପକ୍ଷରେ ରୋହିତ ଶର୍ମା ଆସନ୍ତା ବର୍ଷ ୩୫ ବର୍ଷରେ ପଦାର୍ପଣ କରିବେ। ତେଣୁ ଜଣେ ଦୀର୍ଘ ମିଆଦି ଉତ୍ତରାଧିକାରୀ ପାଇଁ ବିଚାରବିମର୍ଶ ଚାଲିଛି। ବୁଧବାରଠାରୁ ଦକ୍ଷିଣ ଆଫ୍ରିକା ବିପକ୍ଷ ଅନ୍ତର୍ଜାତୀୟ ଦିନିକିଆ ସିରିଜ ଆରମ୍ଭ ହେବ। ଏହି ସିରିଜ ପାଇଁ ବୁମ୍ରାଙ୍କୁ ଭାରତୀୟ ଦଳର ଉପଅଧିନାୟକ କରାଯାଇଛି। ସିରିଜ ପୂର୍ବରୁ ଏକ ଖବରଦାତା ସମ୍ମିଳନୀରେ ଯୋଗଦେଇ ବୁମ୍ରା ପୁଣି କହିଛନ୍ତି ଯେ, ଦଳର ନେତୃତ୍ୱ ନେବା ଲାଗି ପ୍ରତ୍ୟେକ ଖେଳାଳି ଚାହିଁଥାନ୍ତି, ମୁଁ ଅବା ସେଥିରୁ କିପରି ବାଦ୍ ପଡ଼ିବି। ସେ ସବୁବେଳେ ଦଳ ପାଇଁ ଯଥାସମ୍ଭବ ଶ୍ରେଷ୍ଠ ପ୍ରଦର୍ଶନ କରିବାକୁ ଚେଷ୍ଟା କରିଥାନ୍ତି। କୋହଲିଙ୍କ ଟେଷ୍ଟ ଅଧିନାୟକ ପଦବୀରୁ ଇସ୍ତଫା ନିଷ୍ପତ୍ତିକୁ ଦଳ ସମ୍ମାନ ଦେଉଛି। ଏହି ଷ୍ଟାର ବ୍ୟାଟର ଜଣଙ୍କ ଏଭଳି ନିଷ୍ପତ୍ତି ସମ୍ପର୍କରେ ତାଙ୍କୁ ପୂର୍ବରୁ ଅବଗତ କରାଇଥିଲେ।