ନୂଆଦିଲ୍ଲୀ,୧୪।୧୨: ଟେଷ୍ଟ କ୍ରିକେଟ ଖେଳିବା ଛାଡ଼ି ଦିଅନ୍ତୁ ଭାରତୀୟ ଦ୍ରୁତ ବୋଲର୍ ଜସପ୍ରିତ ବୁମ୍ରା। କ୍ରିକେଟରଙ୍କୁ କିଛି ଏଭଳି ପରାମର୍ଶ ଦେଇଛନ୍ତି ପାକିସ୍ତାନର ପୂର୍ବତନ ଦ୍ରୁତ ବୋଲର ଶୋଏବ ଅଖତର। ଦୀର୍ଘ ଦିନ ଧରି କ୍ରିକେଟ ଖେଳିବା ଲାଗି ତାଙ୍କୁ ଟେଷ୍ଟ କ୍ରିକେଟରୁ ଦୂରେଇ ଯିବା ଉଚିତ। ଏହାଛଡ଼ା ତାଙ୍କୁ ଅନ୍ୟ ଫର୍ମାଟ ଉପରେ ଧ୍ୟାନ ଦେବା ଉଚିତ ବୋଲି ଏକ ପୋଡକାଷ୍ଟରେ ସେ କହିଛନ୍ତି।
ଏଯାବତ ବୁମ୍ରାଙ୍କ ରେକର୍ଡ ଦେଖିଲେ ଟେଷ୍ଟ କ୍ରିକେଟରେ ତାଙ୍କ ରେକର୍ଡ ଜବରଦସ୍ତ ରହିଛି। ସେ ୪୨ ମ୍ୟାଚ୍ରେ ହାରାହାରି ୨୦.୧ ହାରରେ ମୋଟ ୧୮୫ ଉଇକେଟ ନେଇଛନ୍ତି। ହେଲେ ଶୋଏବ କହିଛନ୍ତି ଯେ ଟେଷ୍ଟ କ୍ରିକେଟର ଯେଉଁଭଳି ଡିମାଣ୍ଡ ରହିଛି ସେଥିଯୋଗୁ ବୁମ୍ରାଙ୍କ କ୍ରିକେଟ କ୍ୟାରିୟର ପ୍ରଭାବିତ ହୋଇପାରେ। ସେ ବଲ୍କୁ ଭଲ ଭାବେ ବୁଝନ୍ତି, ଏଥିଯୋଗୁ କ୍ରିକେଟର ସବୁଠାରୁ ଛୋଟ ଫର୍ମାଟ ଏବଂ ଦିନିକିଆ ମ୍ୟାଚ୍ ଲାଗି ଜବରଦସ୍ତ ବୋଲର ଅଟନ୍ତି। ଡେଥ ଓଭର, ପାଓ୍ବାର ପ୍ଲେ ସମୟରେ ତାଙ୍କର ବୋଲିଂ ଚକିତ କରେ। ଟେଷ୍ଟ କ୍ରିକେଟରେ ଦୀର୍ଘ ସମୟ ଧରି ବୋଲିଂ କରିବାକୁ ପଡ଼ିବ। ତୁମକୁ ଗତିର ଆବଶ୍ୟକତା ପଡ଼ିପାରେ। କାରଣ ବ୍ୟାଟ୍ସମ୍ୟାନ ତୁମ ବଲ୍କୁ ଖେଳିବାକୁ ଚେଷ୍ଟା କରି ନ ଥାନ୍ତି। ଯଦି ଗତି କମ୍ ହୋଇଯାଏ ତେବେ ତୁମେ ସଂଘର୍ଷ କର। ଯେବେ ତୁମେ ସଂଘର୍ଷ କରିବା ଆରମ୍ଭ କରିଥାଅ ଲୋକେ ପ୍ରଶ୍ନ କରନ୍ତି।
ଏହାଛଡ଼ା ବୁମ୍ରାଙ୍କ ଫିଟନେସକୁ ନେଇ ଅଖତର କହିଛନ୍ତି, ଏହା ତାଙ୍କ ପାଇଁ ଚିନ୍ତାର ବିଷୟ ରହିଆସିଛି। ମାତ୍ର ଟେଷ୍ଟ କ୍ରିକେଟରେ ଦ୍ରୁତ ଗତି ବଜାୟ ରଖିବାକୁ ନେଇ ପ୍ରଚେଷ୍ଟା ସମୟରେ ଆଘାତ ଲାଗିପାରେ। ଟେଷ୍ଟ କ୍ରିକେଟ ଖେଳିବାକୁ ଥିଲେ ତାଙ୍କୁ ଗତି ବଢ଼ାଇବାକୁ ହେବ। ଏପରି ହେଲେ ତାଙ୍କର ଆଘାତ ପାଇବାର ସମ୍ଭାବନା ଅଧିକ। ଯଦି ମୁଁ ତାଙ୍କ ସ୍ଥାନରେ ଥାନ୍ତି ତେବେ କେବଳ ଛୋଟ ଫର୍ମାଟରେ ଖେଳିଥାନ୍ତି ବୋଲି ଅଖତର କହିଛନ୍ତି।