ସିଡନୀ,୪।୧: ସିଡନୀ ଟେଷ୍ଟରେ ଅଷ୍ଟ୍ରେଲିଆ ଉପରେ ଚାପ ବଢ଼ୁଥିବା ଦେଖି ଅଷ୍ଟ୍ରେଲୀୟ ପ୍ରଶଂସକ ଏବେ ଜସପ୍ରିତ ବୁମ୍ରାଙ୍କୁ ଟାର୍ଗେଟ କରାଯାଉଛି। ଏହି କ୍ରମରେ ବୁମ୍ରାଙ୍କ ଏକ ଭିଡିଓ ଭାଇରାଲ ହେଉଛି। ଏଥିରେ ସେ ନିଜର ଜୋତା ଖୋଲି ତାକୁ ଠିକ୍ କରି ପୁଣିଥରେ ପିନ୍ଧି ନେଉଛନ୍ତି। ଏହି ସମୟରେ ସେଥିରୁ କିଛି ଜିନିଷ ଖସି ପଡ଼ିଥିଲା। ଏହା କ’ଣ ଏକ ସ୍ୟାଣ୍ଡପେପର୍ ବୋଲି ପ୍ରଶ୍ନ ଉଠିଛି। ଏଭଳି କରି ବୁମ୍ରାଙ୍କ ଉପରେ ଚାପ ପକାଇବାକୁ ଚେଷ୍ଟା କରାଯାଉଛି।
View this post on Instagram
ବୁମ୍ରାଙ୍କ ଜୋତାରୁ ବାହାରିଥିବା ଜିନିଷ ସ୍ୟାଣ୍ଡପେପର୍ ଭଳି ଦେଖାଯାଉଥିଲେ ହେଁ ଏହା ଏକ ଫିଙ୍ଗର କ୍ୟାପ୍ ଥିଲା। ଏହାକୁ ପ୍ରାୟତଃ ଖେଳାଳିମାନେ ନିଜର ଆଙ୍ଗୁଠିକୁ ଆଘାତ ଲାଗିବାରୁ ରକ୍ଷା କରିବାକୁ ପିନ୍ଧିଥାନ୍ତି। ଅଷ୍ଟ୍ରେଲିଆ ଇନିଂସ ବେଳେ ବୁମ୍ରା ତାହା ହିଁ କରିଥିଲେ। ଯେତେବେଳେ ସେ ବୋଲିଂ କରିବାକୁ ଯାଉଥିଲେ, ସେ ନିଜ ଜୋତାରୁ ଫିଙ୍ଗର କ୍ୟାପ୍ ବାହାର କରିଥିଲେ। ହେଲେ ଏହାକୁ ନେଇ ଗୁଜବ ସୃଷ୍ଟି ହୋଇଥିଲା। ଅଷ୍ଟ୍ରେଲିୟ ପ୍ରଶଂସକମାନେ ତାଙ୍କୁ ଟାର୍ଗେଟ କରିବା ଆରମ୍ଭ କରିଥିଲେ। ଏହାକୁ ନେଇ ଭିଡିଓ ମଧ୍ୟ ଶେୟାର କରି ପ୍ରଶ୍ନ ପଚାରିଥିଲେ।
କହିରଖୁଛୁ, ସିଡନୀରେ ଜାରି ୫ମ ତଥା ଅନ୍ତିମ ମୁକାବିଲା ବେଶ ରେମାଞ୍ଚକ ସ୍ଥିତିରେ ପହଞ୍ଚିଛି। ଏହି ମ୍ୟାଚ୍ରେ କୌଣସି ବି ଟିମ୍ ଜିତିପାରେ ବୋଲି କୁହାଯାଉଛି। ଭାରତୀୟ ଟିମ୍ ଦ୍ୱିତୀୟ ଇନିଂସରେ ୬ ଉଇକେଟ ହରାଇ ମାତ୍ର ୧୪୧ ରନ୍ କରିଛି। ଯଦି ଟିମ୍ ବଡ଼ ଲକ୍ଷ୍ୟ ଦେଇ ନ ପାରେ ତେବେ ପୁଣିଥରେ ବୁମ୍ରାଙ୍କ ଘାତକ ବୋଲିଂର ଆବଶ୍ୟକତା ପଡ଼ିପାରେ। ହେଲେ ଏବେ ତାଙ୍କ ପିଠିରେ ଯନ୍ତ୍ରଣା ହେଉଥିବା ଯୋଗୁ ସେ ଡାକ୍ତରଖାନା ଯାଇଛନ୍ତି। ଏପରିକି ସେ ତୃତୀୟ ଦିନ ଖେଳ ପାଇଁ ଆସିବେ କି ନାହିଁ ସେନେଇ ସ୍ପଷ୍ଟ ସୂଚନା ମିଳିନାହିଁ।
