ନୂଆଦିଲ୍ଲୀ,୮।୧: ଚାମ୍ପିଅନ୍ସ ଟ୍ରଫି ଲାଗି ଜାନୁଆରୀ ୧୨ରେ ଦଳ ଘୋଷଣା ହେବ। ଏଥିରେ ଦ୍ରୁତ ବୋଲର୍ ଜସପ୍ରିତ ବୁମ୍ରା ଖେଳିବେ କି ନାହିଁ ସେନେଇ ପ୍ରଶ୍ନବାଚୀ ସୃଷ୍ଟି ହୋଇଛି। କାରଣ ତାଙ୍କ ଆଘାତ ନେଇ ସ୍ଥିତି ସ୍ପଷ୍ଟ କରୁନାହିଁ ବିସିସିଆଇ।
ଗଣମାଧ୍ୟମ ରିପୋର୍ଟ ମୁତାବକ, ବୁମ୍ରାଙ୍କ ଭଳି ଆହତ ସମସ୍ୟା ସହ ଲଢ଼ୁଥିବା ବ୍ୟକ୍ତି ଏବଂ ଚିକିତ୍ସା କରୁଥିବା ଡାକ୍ତରଙ୍କ କହିବାନୁଯାୟୀ ଯଦି ଏହା କେବଳ ବ୍ୟାକ୍ ସ୍ପାଜମ୍(ଯାହାକି ଟିମ୍ ମ୍ୟାନେଜମେଣ୍ଟ କହୁଛି), ତେବେ ବୁମ୍ରା ଚାମ୍ପିଅନ୍ସ ଟ୍ରଫି ଖେଳାଯିବା ମଧ୍ୟରେ ଫିଟ୍ ହୋଇଯିବେ। ହେଲେ ସୋସିଆଲ ମିଡିଆରେ ଶେୟାର କରାଯାଉଥିବା ଆଉ କିଛି ରିପୋର୍ଟ ମୁତାବକ ଯଦି ଏହା ଗ୍ରେଡ୍ ୧ ଶ୍ରେଣୀର ଆଘାତ ତେବେ ତାଙ୍କୁ ୬ ମାସ ଯାଏ ଦଳରୁ ବାହାରେ ରହିବାକୁ ହେବ।
ଏବେ ସବୁକିଛି ଆଘାତର ଶେଷ ଯାଞ୍ଚ ଉପରେ ନିର୍ଭର କରିବ। ଯଦି ଷ୍ଟ୍ରେସ୍ ଫ୍ୟାକ୍ଚର ହୋଇ ନ ଥାଏ ତେବେ ଜାନୁଆରୀ ଶେଷ ମଧ୍ୟରେ ସେ ମଇଦାନକୁ ଫେରିପାରନ୍ତି। ଅର୍ଥାତ ସେ ଚାମ୍ପିଅନ୍ସ ଟ୍ରଫିରେ ଖେଳୁଥିବା ନଜର ଆସିବେ।
ଏବେ ଦେଖିବାକୁ ହେବ ଯେ ବୁମ୍ରା କେବେ ମଇଦାନକୁ ଓହ୍ଲାଉଛନ୍ତି? ସେ ଇଂଲଣ୍ଡ ବିପକ୍ଷ ଘରୋଇ ସିରିଜ ଖେଳିବେ ନାହିଁ ବୋଲି ସ୍ପଷ୍ଟ ହୋଇଛି। ହେଲେ ଚାମ୍ପିଅନ୍ସ ଟ୍ରଫିରୁ ସେ ବାଦ୍ ପଡ଼ିବେ କି ନାହିଁ ସେନେଇ କିଛି ଦିନରେ ଆଧିକାରୀକ ଭାବେ ସ୍ପଷ୍ଟ ହୋଇଯିବ।