ଲକ୍ଷ୍ନୌ,୯।୫: ଏବେ ସାରା ଦେଶରେ କରୋନା କାୟା ବିସ୍ତାର କରିଛନ୍ତି। ପ୍ରତିଦିନ ଏହାଦ୍ୱାରା ଲକ୍ଷ ଲକ୍ଷ ଲୋକ ସଂକ୍ରମିତ ହେଉଥିବାବେଳେ ହଜାର ହଜାର ଲୋକ ମୃତ୍ୟୁ ବରଣ କରୁଛନ୍ତି। ଉତ୍ତର ପ୍ରଦେଶରେ କରୋନା ସ୍ଥିତି ସଙ୍ଗିନ ରହିଛି। ଫିରୋଜାବାଦର ଜନପଦର ଜସରାନା ବିଧାୟକ ରାମଗୋପାଳ ଓରଫ ପପୁ ଲୋଧି ଗତ ଏପ୍ରିଲ ୩୦ରେ କରୋନା ସଂକ୍ରମିତ ହୋଇଥିଲେ। ତାଙ୍କ ସ୍ତ୍ରୀ ମଧ୍ୟ ଏହାର ଶିକାର ହୋଇଥିଲେ। କିଛି ଦିନ ଆଇସୋଲେସନରେ ରହିବା ପରେ ରାମଗୋପାଳ ସୁସ୍ଥ ହୋଇଥିଲେ କିନ୍ତୁ ତାଙ୍କ ସ୍ତ୍ରୀଙ୍କ ସ୍ବାସ୍ଥ୍ୟାବସ୍ଥା ଖରାପ ହୋଇଯାଇଥିଲା। ଫଳରେ ତାଙ୍କ ଏସଏନ ମେଡିକାଲ କଲେଜ, ଆଗ୍ରାରେ ଭର୍ତ୍ତି କରାଯାଇଥିଲା। କିନ୍ତୁ ମେଡିକାଲରେ ଭର୍ତ୍ତି କରାଯିବା ସହଜ ନ ଥିଲା ବୋଲି ରାମଗୋପାଳ କହିଛନ୍ତି। ପ୍ରଥମେ ତାଙ୍କ ସ୍ତ୍ରୀଙ୍କୁ ପ୍ରାୟ ୩ ଘଣ୍ଟା କାଳ ବେଡ୍ ମିଳି ନ ଥିଲା। ଫଳରେ ହସ୍ପିଟାଲ ଚଟାଣରେ ତାଙ୍କ ଶୋଇବାକୁ ପଡିଥିଲା। ଜିଲାଅଧିକାରୀଙ୍କୁ କହିବା ପରେ ବହୁ କଷ୍ଟରେ ଗୋଟିଏ ବେଡ୍ ମିଳିଥିଲା। ଏହା ପରେ ଚିକିତ୍ସା ଆରମ୍ଭ ହୋଇଥିଲା। ଏବେ ମଧ୍ୟ ସ୍ତ୍ରୀଙ୍କ ଅବସ୍ଥା କେମିତି ଅଛି ସେ ଜାଣି ନ ଥିବା କହିଛନ୍ତି ରାମଗୋପାଳ। ଏସଏନ ମେଡିକାଲ କଲେଜରେ ଭଲ ଚିକିତ୍ସା ଦିଆଯାଉ ନ ଥିବା କହିଛନ୍ତି। ଯଦି ମୋ ସ୍ତ୍ରୀଙ୍କ ଅବସ୍ଥା ଏମିତି ତେବେ ସାଧାରଣ ଲୋକଙ୍କ ଅବସ୍ଥା କେମିତି ଥିବା ତାହା ସହଜରେ ଅନୁମେୟ ବୋଲି ସେ କହିଛନ୍ତି।