ଜଟଣୀ,୧୮ା୧୦(ଡି.ଏନ୍.ଏ.): ଜଟଣୀ ଥାନା ଅଧୀନ ବାଲିଛକ ମୁଣ୍ଡିଆସାହିର ରବି ପ୍ରଧାନଙ୍କ ଘର ଉପରକୁ ରବିବାର ବୋମାମାଡ଼ ହୋଇଛି। ଏଥିରେ ଉକ୍ତ ସାହିର ନରେଶ ଦାସ ଆହତ ହୋଇଛନ୍ତି। ଚିକିତ୍ସା ପାଇଁ ତାଙ୍କୁ ସ୍ଥାନୀୟ ଡାକ୍ତରଖାନାରେ ଭର୍ତ୍ତି କରାଯାଇଛି। ଖବରପାଇ ପୋଲିସ ଘଟଣାସ୍ଥଳରେ ପହଞ୍ଚି ପଡ଼ିଥିବା ସୁତୁଲି ଓ ସାମଗ୍ରୀ ଜବତ କରି ତଦନ୍ତ ଚଳାଇଛି। ସୂଚନା ଅନୁଯାୟୀ, ଅପରାହ୍ନ ପ୍ରାୟ ୫ଟାରେ ଦୁଇଟି ବାଇକ୍ରେ ୫ଜଣ ଯୁବକ ଆସି ହଠାତ୍ ରବିଙ୍କ ଘରକୁ ୪ଟି ବୋମାମାଡ଼ କରି ଫେରାର ହୋଇଯାଇଥିଲେ। ଏହି ସମୟରେ ରବିଙ୍କ ପରିବାର ଲୋକେ ଭୟଭୀତ ହୋଇ ବାରିପଟ ଦେଇ ବାହାରକୁ ପଳାଇଆସିଥିଲେ। ବୋମାମାଡ଼ର କିଛି ଦୂରରେ ଛିଡ଼ା ହୋଇଥିବା ସାହିର ନରେଶ ଆହତ ହୋଇଥିଲେ। ପୂର୍ବ ବିବାଦକୁ ନେଇ ସାହି ନିକଟରେ ରହୁଥିବା କେତେଜଣ ଅସାମାଜିକ ଯୁବକ ବୋମାମାଡ଼ କରିଥିବା ରବି କହିଛନ୍ତି। ଅଭିଯୁକ୍ତଙ୍କୁ ଧରିବା ପାଇଁ ବିଭିନ୍ନ ସ୍ଥାନରେ ଚଢ଼ାଉ ଜାରି ରହିଛି ବୋଲି ଆଇଆଇସି ବିଶ୍ୱରଞ୍ଜନ ସାହୁ କହିଛନ୍ତି।