ଦୁନିଆ ରହସ୍ୟମୟ ଜିନିଷରେ ପରିପୂର୍ଣ୍ଣ। ସେଥିରୁ କିଛି ରହସ୍ୟ ଉପରୁ ପରଦା ଉଠୁଥିବା ବେଳେ ଆଜି ପର୍ଯ୍ୟନ୍ତ କିଛିର ସମାଧାନ ମିଳିପାରି ନାହିଁ। ସେଭଳି ଏକ ରହସ୍ୟ ବିଷୟରେ ଆଜି ଆମେ ଆପଣଙ୍କୁ ପରିଚିତ କରିବାକୁ ଯାଉଛୁ। ସେଇଟି ହେଲା ପକ୍ଷୀଙ୍କ ଆତ୍ମହତ୍ୟା। ଗୋଟିଏ କିମ୍ବା ଦୁଇଟି ନୁହେଁ ବରଂ ହଜାର ହଜାର ସଂଖ୍ୟାରେ ପକ୍ଷୀ ପ୍ରତିବର୍ଷ ଏକ ନିର୍ଦ୍ଦିଷ୍ଟ ସ୍ଥାନକୁ ଆସି ଆତ୍ମହତ୍ୟା କରିଥାନ୍ତି। ଚକିତ ହୋଇଗଲେ ନା। କଥାଟି ସତ।
ଉତ୍ତର-ପୂର୍ବର ବୃହତ୍ତମ ରାଜ୍ୟ ଆସାମର ଅନେକ ବିଶେଷତା ଅଛି। ହେଲେ ଏହି ରାଜ୍ୟର ଅନେକ ଜିନିଷ ଅତ୍ୟନ୍ତ ରହସ୍ୟମୟ ଅଟେ। ରାଜ୍ୟରେ ଏପରି ଏକ ସ୍ଥାନ ଅଛି ଯେଉଁଠାରେ ପ୍ରତିବର୍ଷ ହଜାର ହଜାର ପକ୍ଷୀ ଆତ୍ମହତ୍ୟା କରନ୍ତି। ଡିମା ହାସୋ ଜିଲାର ପାହାଡରେ ଅବସ୍ଥିତ ଜାଟିଙ୍ଗା ଉପତ୍ୟକା ପକ୍ଷୀମାନଙ୍କର ଆତ୍ମହତ୍ୟା ସ୍ଥାନ ଭାବରେ ବେଶ ପ୍ରସିଦ୍ଧ। ପ୍ରତିବର୍ଷ ସେପ୍ଟେମ୍ବର ମାସରେ ପକ୍ଷୀମାନଙ୍କର ଆତ୍ମହତ୍ୟା ହେତୁ ଜାଟିଙ୍ଗା ଗାଁ ଚର୍ଚ୍ଚାର ବିଷୟ ପାଲଟିଥାଏ। ଜାଣି ଆଶ୍ଚର୍ଯ୍ୟ ହେବେ କେବଳ ସ୍ଥାନୀୟ ପକ୍ଷୀ ନୁହନ୍ତି ବରଂ ପ୍ରବାସୀ ପକ୍ଷୀମାନେ ମଧ୍ୟ ଏଠାକୁ ଆସି ଆତ୍ମହତ୍ୟା କରନ୍ତି। ଏଥିପାଇଁ ଏହି ଗାଁଟି ଅତ୍ୟନ୍ତ ରହସ୍ୟମୟ ବୋଲି ବିବେଚନା କରାଯାଏ ।
ସାଧାରଣତଃ ଆତ୍ମହତ୍ୟା କରିବାର ପ୍ରବୃତ୍ତି ମଣିଷଙ୍କ କ୍ଷେତ୍ରରେ ଦେଖାଯାଇଥାଏ। ହେଲେ ପକ୍ଷୀମାନଙ୍କ ବିଷୟରେ ଏହି କଥା ଶୁଣି ଲୋକମାନେ ଜାଣି ବହୁତ ଆଶ୍ଚର୍ଯ୍ୟ ହୁଅନ୍ତି। ପକ୍ଷୀମାନେ ବିଷ ଖାଇ କିମ୍ବା ନିଜକୁ ନିଆଁରେ ପୋଡି ଦିଅନ୍ତି ନାହିଁ। ବରଂ ସେମାନଙ୍କ ଆତ୍ମହତ୍ୟା କରିବାର ପଦ୍ଧତି ମଧ୍ୟ ଅଲଗା ଅଟେ। ଏହି ଗାଁରେ ପକ୍ଷୀମାନେ ଦ୍ରୁତଗତିରେ ଉଡି ଏକ କୋଠା କିମ୍ବା ଗଛ ସହିତ ପିଟି ହୋଇଯାଆନ୍ତି। ଫଳରେ ସେମାନେ ମରିଯାଆନ୍ତି। ହଜାର ହଜାର ପକ୍ଷୀମାନଙ୍କ ଏପରି ବ୍ୟବହାର ଲୋକଙ୍କ ମଧ୍ୟରେ କୌତୁହଳ ସୃଷ୍ଟି କରେ। ଏହି ଘଟଣା ସ ୭ ରୁ ୧୦ ଟା ମଧ୍ୟରେ ଘଟିଥାଏ। ଏହି ଘଟଣା ପଛରେ ରହସ୍ୟମୟ ଶକ୍ତିର ହାତ ବୋଲି ଗ୍ରାମବାସୀ ବିଶ୍ୱାସ କରନ୍ତି ।
ପକ୍ଷୀ ବିଶେଷଜ୍ଞମାନେ କହିଛନ୍ତି, ଚୁମ୍ବକୀୟ ଶକ୍ତି ହେତୁ ଏପରି ଘଟଣା ଘଟେ। କିନ୍ତୁ, ଏପର୍ଯ୍ୟନ୍ତ ଏହି ରହସ୍ୟ ସମାଧାନ ହୋଇନାହିଁ। ୧୯୦୧ ପରଠାରୁ ଏଭଳି ଘଟଣା ଚାଲିଆସୁଛି। କିନ୍ତୁ ୧୯୫୭ ମସିହାରେ ଏହା ବିଷୟରେ ବିସ୍ତୃତ ଭାବେ ଜଣାପଡ଼ିଥିଲା। ଘଟଣାକୁ ନେଇ ଅନେକ ଗବେଷଣା ମଧ୍ୟ କରାଯାଇଥିଲା। କିନ୍ତୁ କୌଣସି ସମାଧାନ ମିଳିପାରିନାହିଁ।