ଭୁବନେଶ୍ୱର,୮ା୧୧(ବ୍ୟୁରୋ): କରୋନା ମହାମାରୀ ଛଡ଼ାଇନେଇଛି କଳାକାରଙ୍କ ବୃତ୍ତି, ବେଉସା। ପେଟକୁ ଦାନା ମୁଠେ ଯୋଗାଡ଼ କରିବାକୁ ସେମାନେ ବିଭିନ୍ନ ପନ୍ଥା ଆପଣାଉଛନ୍ତି। ନିକଟରେ ବଲିଉଡ୍ରେ ଭାଗ୍ୟ ପରୀକ୍ଷା କରୁଥିବା ଜଣେ ସିନେ କଳାକାର ଭୁବନେଶ୍ୱରରେ ପରିବା ବିକ୍ରି କରୁଥିବା ଦେଖିବାକୁ ମିଳିଥିଲା। ସେହିଭଳି ଅନ୍ୟ କଳାକାରମାନେ ମଧ୍ୟ ରୋଜଗାରର ଭିନ୍ନ ପନ୍ଥା ଅନ୍ବେଷଣରେ ରହିଛନ୍ତି। ଏପରିସ୍ଥିତିରେ ସବୁଠାରୁ ଦୁର୍ଦ୍ଦିନରେ ଦିନ କାଟୁଛନ୍ତି ମଞ୍ଚ କଳାକାର। ଇତିମଧ୍ୟରେ କୋଭିଡ୍ ପାଇଁ ମଞ୍ଚ ବନ୍ଦ ହେବାର ଦୀର୍ଘମାସ ବିତିଗଲାଣି। ଧୀରେ ଧୀରେ ସବୁ କ୍ଷେତ୍ର ପୂର୍ବାବସ୍ଥାକୁ ଫେରୁଥିବାବେଳେ ଯାତ୍ରା ଓ ମଞ୍ଚ ନାଟକ ଦୁଆର କିନ୍ତୁ ଏପର୍ଯ୍ୟନ୍ତ ବନ୍ଦ ହୋଇରହିଛି। ଫଳରେ ନାନା ଦୁର୍ଦ୍ଦଶାରେ କାଳାତିପାତ କରୁଥିବା ଯାତ୍ରା କଳାକାରମାନେ ସ୍ବାଭିମାନର ସହ ବଞ୍ଚତ୍ବାକୁ ଏବେ ନିଆରା ପ୍ରୟାସ ଆପଣାଇଛନ୍ତି। ଘରେ ହାତ ତିଆରି ଜିନିଷ ତିଆରି କରି ଲୋକଙ୍କ ପାଖରେ ପହଞ୍ଚାଉଛନ୍ତି। ମଞ୍ଚରେ ଦର୍ଶକଙ୍କୁ ଅଭିନୟ ଯାଦୁରେ ବାନ୍ଧି ରଖୁଥିବା କଳାକାରଙ୍କ ଦ୍ୱାରା ପ୍ରସ୍ତୁତ ଦେଶୀ ସାମଗ୍ରୀ ଲୋକଙ୍କ ମନ ଜିଣୁଛି।
କରୋନାର ଏହି ସଂକଟଜନକ ସ୍ଥିତିରେ କଳାକାରଙ୍କୁ ରୋଜଗାର ଦେବାକୁ ଯାତ୍ରା କଳାକାର କର୍ମଚାରୀ ସଂଘ ଅଣ୍ଟା ଭିଡିଛି। ଯୁବ କଳାକାରଙ୍କଠାରୁ ଆରମ୍ଭ କରି ବୟସ୍କଙ୍କ ପର୍ଯ୍ୟନ୍ତ ସମସ୍ତେ ଘରେ ବସି ନ ରହି କିଛି ନା କିଛି ରୋଜଗାର କରୁଛନ୍ତି। ଗତ ଏକମାସ ହେଲା ନିଜ ଘରେ ହିଁ ହାତ ତିଆରି ସୋରିଷ ତେଲ, ଫିନାଇଲ୍, ବିରି ବଡି, ଧୂପକାଠି ଆଦି ବିକ୍ରି କରି ପରିବାର ପ୍ରତିପୋଷଣ କରୁଛନ୍ତି। ‘ଜେକେ-୨’ ବ୍ରାଣ୍ଡ୍ ନାମରେ ଏସବୁ ସାମଗ୍ରୀକୁ ଘରେ ଘରେ ପହଞ୍ଚାଉଛନ୍ତି।ଫଳରେ ଧୀରେ ଧୀରେ ଏହି ବ୍ରାଣ୍ଡ୍ ଲୋକପ୍ରିୟ ହେବାରେ ଲାଗିଛି।
ଏନେଇ ସଂଘ ପକ୍ଷରୁ କୁହାଯାଇଛି, ଲକ୍ଡାଉନ୍ ଯୋଗୁ ସବୁ ଆଶା ଅଧାରେ ରହିଯାଇଥିଲା। ସବୁକିଛି ଖୋଲିଯିବା ପରେ ପୂର୍ବାବସ୍ଥା ଫେରିଆସିବ ବୋଲି ଭାବିଥିଲୁ। ହେଲେ ଯାତ୍ରା କଳାକାରଙ୍କ ଭାଗ୍ୟରେ କିନ୍ତୁ ତାଲା ପଡିଯାଇଛି। ନିରୁପାୟ ହୋଇ ଏବେ ହାତତିଆରି ଦେଶୀ ସାମଗ୍ରୀ ବିକ୍ରି କରୁଛନ୍ତି। ରୋଜଗାରର କୌଣସି ପନ୍ଥା ନ ଥିବାରୁ ବାଧ୍ୟ ହୋଇ ଏହି ରାହା ଆପଣାଇଛନ୍ତି। ପରିସ୍ଥିିତି ସୁଧୁରିଲା ପର୍ଯ୍ୟନ୍ତ ପେଟପାଟଣା ପାଇଁ ଏମିତି ପ୍ରୟାସ ଜାରିରହିବ। ବର୍ତ୍ତମାନ ସମ୍ପୂର୍ଣ୍ଣ ଦେଶୀ ସାମଗ୍ରୀ ବିକ୍ରି କରୁଛୁ। ଆଗକୁ ହଳଦୀ, ବେସନଠାରୁ ଆରମ୍ଭ କରି ଲୁଗାପଟା ମଧ୍ୟ ବିକ୍ରି କରିବାର ଯୋଜନା ରହିଛି। କୋଭିଡ୍ ଯୋଗୁ ରାଜ୍ୟରେ ପ୍ରାୟ ୧୦ହଜାର ଯାତ୍ରା କଳାକାର ଦୁର୍ଦ୍ଦଶାରେ ଦିନ କାଟୁଛନ୍ତି। ବିଶେଷକରି ଛୋଟ ଛୋଟ କଳାକାର ଓ କର୍ମଚାରୀମାନେ ଅଧିକ ସମସ୍ୟା ଭୋଗୁଛନ୍ତି। ସେହି କର୍ମଚାରୀମାନଙ୍କୁ ସାହାଯ୍ୟ କରିବା ପାଇଁ ଏଭଳି ପ୍ରୟାସ କରାଯାଉଛି ବୋଲି ସଂଘ ପକ୍ଷରୁ କୁହାଯାଇଛି।
