ନୂଆଦିଲ୍ଲୀ, ୨୧।୯ : ଦେଶର ଯବାନମାନଙ୍କୁ ଶତ୍ରୁ ଗୁଳିରୁ ରକ୍ଷା କରୁଥିବା ବୁଲେଟ ପ୍ରୁଫ ଜ୍ୟାକେଟରେ ଚାଇନାର ସାମଗ୍ରୀକୁ ରୋକିବା ପାଇଁ ପ୍ରତିରକ୍ଷା ମନ୍ତ୍ରଣାଳୟ ଏକ ଯୋଜନା ପ୍ରସ୍ତୁତ କରିଛି। ମନ୍ତ୍ରଣାଳୟ ପକ୍ଷରୁ କୁହାଯାଇଛି ଯେ ଭାରତୀୟ ଉତ୍ପାଦକମାନଙ୍କୁ ନିଶ୍ଚିତ କରିବାକୁ ପଡ଼ିବ ଯେ ସେମାନେ ଚାଇନାର କମ୍ପାନୀ ସହିତ କାମ କରୁନାହାଁନ୍ତି। ନିକଟରେ ସେନାକୁ ଦିଆଯାଇଥିବା ଜ୍ୟାକେଟରେ ବହୁ ପରିମାଣର ଚାଇନାର ସାମଗ୍ରୀର ବ୍ୟବହାରକୁ ନେଇ ଏକ ବିବାଦ ଉପୁଜିଥିଲା।
ଖବର ମୁତାବକ, ତଟରକ୍ଷୀ ବାହିନୀ ଦ୍ୱାରା ଦିଆଯାଇଥିବା ସର୍ବଶେଷ ଟେଣ୍ଡରରେ କଞ୍ଚାମାଲ ବ୍ୟବହାର ଉପରେ କଟକଣା ଲଗାଯାଇଛି। ବିଶେଷ କରି ଚାଇନାରୁ ଆସୁଥିବା ସାମଗ୍ରୀ ଉପରେ ପ୍ରତିବନ୍ଧକ ଲଗାଇବା ପାଇଁ କୁହାଯାଇଛି। ୭୪୬ ଜ୍ୟାକେଟ ପାଇଁ ଚୁକ୍ତିରେ ଦର୍ଶାଯାଇଛି ଯେ ଏଥିରେ ସମ୍ପୃକ୍ତ ଭାରତୀୟ କମ୍ପାନୀମାନେ ନିଶ୍ଚିତ କରିବେ ଯେ କଞ୍ଚାମାଲ ଚାଇନାରୁ ଆମଦାନୀ ହୋଇନାହିଁ। ସେମାନଙ୍କୁ ଏ ବାବଦରେ ଏକ ପ୍ରମାଣପତ୍ର ମଧ୍ୟ ଦେବାକୁ ପଡିବ। ଭବିଷ୍ୟତରେ ସେନାଙ୍କ ସୁରକ୍ଷା ସାମଗ୍ରୀ କ୍ରୟ ପାଇଁ ଭାରତୀୟ ସେନା ଟେଣ୍ଡର ଦେବାର ମଧ୍ୟ ସମ୍ଭାବନା ରହିଛି।
ଏକ ରିପୋର୍ଟ ଅନୁଯାୟୀ, ପୂର୍ବରୁ ଭାରତୀୟ ସଶସ୍ତ୍ର ବାହିନୀ ୟୁରୋପ ଏବଂ ଆମେରିକାର କମ୍ପାନୀଗୁଡିକରୁ ଆସୁଥିବା କଞ୍ଚାମାଲ ବ୍ୟବହାର କରୁଥିଲେ। ବର୍ତ୍ତମାନ ସେହି ଧାରା ବନ୍ଦ ହୋଇଯାଇଛି। କମ୍ପାନୀମାନେ ୟୁରୋପ ଏବଂ ଆମେରିକାରୁ ଆସୁଥିବା କଞ୍ଚାମାଲରୁ ନିର୍ମିତ ଜ୍ୟାକେଟ ପରୀକ୍ଷାମୂଳକ ଭାବେ ଉପସ୍ଥାପନ କରିଥିଲେ। କିନ୍ତୁ ଚୁକ୍ତିନାମା ହାସଲ ପରେ ସେମାନଙ୍କ କଞ୍ଚାମାଲ ଯୋଗାଣକାରୀଙ୍କୁ ବଦଳାଦେଇଥିଲେ।
ଜୁନ ୨୦୨୦ରେ, ଶିଳ୍ପ ଗୋଷ୍ଠୀ ସରକାରଙ୍କୁ ଏକ ନୀତି ପ୍ରସ୍ତୁତ କରିବାକୁ ନିବେଦନ କରିଥିଲେ ଯେଉଁଥିରେ ଚାଇନାର ସାମଗ୍ରୀ ଉପରେ ନିର୍ଭରଶୀଳତା ହ୍ରାସ ପାଇବ ବୋଲି କୁହାଯାଇଥିଲା। ଗୋଷ୍ଠୀ କହିଥିଲେ ଯେ ପ୍ରତିରକ୍ଷା ସାମଗ୍ରୀ ଉତ୍ପାଦନ ପାଇଁ କଞ୍ଚାମାଲ ଆଣିବା ପାଇଁ ବିପୁଳ ପରିମାଣର ବୈଦେଶିକ ମୁଦ୍ରା ଚାଇନାକୁ ଯାଉଛି। ଜ୍ୟାକେଟରେ ବ୍ୟବହୃତ ସାମଗ୍ରୀକୁ ସ୍ବଦେଶୀ ଭାବରେ ଉତ୍ପାଦନ କରିବାକୁ ପ୍ରୟାସ ଚାଲିଛି।