ଇସଲାମାବାଦ୍,୬।୨: ଏସିଆ କପ ୨୦୨୩ ଆୟୋଜନକୁ ନେଇ ଭାରତ ଏବଂ ପାକିସ୍ତାନ ମଧ୍ୟରେ କ୍ରିକେଟ ସମ୍ପର୍କ ଆହୁରି ଖରାପ ହେଉଥିବା ଦେଖାଯାଉଛି। ନିକଟରେ ବାହାରେନରେ ଅନୁଷ୍ଠିତ ଏସୀୟ କ୍ରିକେଟ ପରିଷଦ (ଏସିସି) ବୈଠରେ ପାକିସ୍ତାନରେ ଏସିଆ କପ୍ ଆୟୋଜନ ହେବ କି ନାହିଁ ସେନେଇ କୌଣସି ନିଷ୍ପତ୍ତି ନିଆଯାଇନାହିଁ। ଏହା ପାକିସ୍ତାନରେ ନ ହୋଇ ୟୁଏଇ କିମ୍ବା ଶ୍ରୀଲଙ୍କାରେ ହୋଇପାରେ ବୋଲି ଚର୍ଚ୍ଚା ହେଉଛି। ଏଥିରେ ହତାଶ ପାକିସ୍ତାନ ହୋଇ ଏସିଆ କପ ୨୦୨୩ ଆୟୋଜନ କରିବାକୁ ଚାହୁଁଥିବାବେଳେ ବିସିସିଆଇ କହିଛି ଯେ, ବର୍ତ୍ତମାନ ପରିସ୍ଥିତିରେ ଭାରତୀୟ ଦଳକୁ ପାକିସ୍ତାନ ପଠାଇ ପାରିବ ନାହିଁ। ଏବେ ବିସିସିଆଇର ଏହି ନିଷ୍ପତ୍ତିରେ ପାକିସ୍ତାନୀ କିମ୍ବଦନ୍ତୀ କ୍ରିକେଟର ଜାଭେଦ ମିଆଁଦାଦ୍ଙ୍କ ବିବୃତ୍ତି ସାମ୍ନାକୁ ଆସିଛି।
ଏନେଇ ମିଆଁଦାଦ୍ଙ୍କୁ ପଚରାଯିବାରୁ ସେ ସ୍ପଷ୍ଟ କହିଛନ୍ତି, ଯଦି ଭାରତୀୟ ଦଳ ପାକିସ୍ତାନକୁ ଆସିବ ନାହିଁ, ତେବେ କିଛି ଫରକ ପଡିବ ନାହିଁ। ସେମାନେ ନ ଆସିଲେ ପାକିସ୍ତାନ କ୍ରିକେଟ୍ର କୌଣସି କ୍ଷତି ହେବ ନାହିଁ। ସେମାନେ ଆସିବେ ନ ଆସିବେ ତାହା ଆଇସିସି ନିର୍ଣ୍ଣୟ ନେବ। ଆଇସିସିର ସମସ୍ତ ଦେଶ ପାଇଁ ସମାନ ନିୟମ ରହିବା ଉଚିତ୍। ଯଦି ଏକ ଶକ୍ତିଶାଳୀ ଦଳ ଏକ ଟୁର୍ନାମେଣ୍ଟ ଖେଳିବାକୁ ଆସୁନାହିଁ, ତେବେ ତାକୁ ବାହାର କରିଦେବା ଉଚିତ୍। ଭାରତୀୟ ଦଳ ଆମ ପାଇଁ କିମ୍ବା ବିଶ୍ୱ ପାଇଁ ଏକମାତ୍ର ଦଳ ନୁହେଁ।
ଭାରତୀୟ ଦଳ ପାକିସ୍ତାନକୁ ନ ଆସିବା ପାଇଁ ମିଆଁଦାଦ୍ ଏକ ଅଜବ ଯୁକ୍ତି ମଧ୍ୟ ଦର୍ଶାଇଛନ୍ତି। ସେ କହିଛନ୍ତି, ଭାରତୀୟ ଦଳ ଏଠାରେ ନ ଖେଳିବାର କାରଣ ହେଉଛି, କାରଣ ସେମାନେ ହାରିଗଲେ, ତାଙ୍କ ପାଇଁ ଅଡୁଆ ପରିସ୍ଥିତି ସୃଷ୍ଟି ହୁଏ। ତାଙ୍କ ଦେଶରେ ନିଆଁ ଲାଗିଯାଏ। ଏହି କାରଣରୁ ପାକିସ୍ତାନ ଆସିବାକୁ ସେମାନେ ଭୟ କରୁଛନ୍ତି।