ରାଜନଗର, ୮ା୧୨(ଡି.ଏନ.ଏ.):ବାତ୍ୟା ଜୱାଦ ପ୍ରଭାବରେ ଲଗାଣ ବର୍ଷା ଯୋଗୁ ରାଜନଗର ବ୍ଲକ ଅଞ୍ଚଳର ଚାଷୀଙ୍କ ବର୍ଷକର ଦାନାକୁ ନଷ୍ଟ କରି ଦେଇଛି। ଚାଷୀକୁଳ ମୁଣ୍ଡରେ ଚଡକ ପକାଇଛି। ରାଜନଗରବାସୀ କେବଳ ଖରିଫ ଧାନ ଫସଲ ଉପରେ ନିର୍ଭରଶୀଳ। ହସୁଥିବା ପାଚିଲା ଧାନ କ୍ଷେତ କେଉଁଠି ପାଣିରେ ବୁଡିଛି ତ, ଆଉ କେଉଁଠି ଗଜା ହୋଇଗଲାଣି। ଚଳିତବର୍ଷ ପ୍ରଥମେ ମରୁଡି ଯୋଗୁ ବିଳମ୍ବରେ ଚାଷ ହୋଇଥିଲେ ମଧ୍ୟ ଅଧିକ ଓ ଶୀଘ୍ର ଅମଳକ୍ଷମ ହାଇବ୍ରିଡ ବିହନ ଚାଷୀ ଚାଷ କରି ଭଲ ଫସଲ କରିଥିଲେ। ମାତ୍ର ନଭେମ୍ବରରେ ଲଘୁଚାପ ବର୍ଷା ଓ ଏବେ ଜୱାଦ ପ୍ରଭାବରେ ବର୍ଷା ଭାତହାଣ୍ଡିକୁ ଉଜାଡି ଦେଇଛି। କିପରି ଋଣ ଶୁଝିବୁ, ପରିବାର ପେଟରେ ବର୍ଷକ ଯାକ ଦାନା ଦେବୁ ସେ ନେଇ ଚାଷୀ ଚିନ୍ତାରେ ପଡିଛି।
ବ୍ଲକ ରଙ୍ଗଣୀ ପଞ୍ଚାୟତ ଭେକ୍ଟା ଗାଁର ମାଧବ ନାୟକ ୧୨ ଏକର ଜମିରେ ଖରିଫ ଧାନ ଚାଷ କରିଥିଲେ। ମରୁଡି ଯୋଗୁ ପାଣି ବୋହି ଧାନ ଚାଷ କରି ଖର୍ଚ୍ଚାନ୍ତ ହୋଇଥିଲେ। ଜମିରେ ଶୀଘ୍ର ଅମଳକ୍ଷମ ଧାନ ଚାଷ କରିଥିଲେ। ବିଳମ୍ବରେ ଚାଷ କାମ କରିଥିଲେ ମଧ୍ୟ ଫସଲ ଭଲ ହୋଇଥିଲା। ପ୍ରାଥମିକ ସେବା ସମବାୟ ସମିତି ଓ ବ୍ୟାଙ୍କରୁ ଋଣ ଆଣି ଧାନ ଫସଲ କରିଥିଲେ। କାର୍ତ୍ତିକ ପୂର୍ଣ୍ଣିମା ପରେ ଧାନକୁ କାଟି ଅମଳ କରିଥାନ୍ତେ। ମାତ୍ର ଦଇବ ଦାଉ ସାଧିଲା। ନଭେମ୍ବରର ଲଘୁଚାପ ବର୍ଷା ଧାନ ସବୁ ପାଣିରେ ବୁଡି ଗଜା ହୋଇଯାଇଥିଲା। ଏବେ ଯେତିକି ଧାନ ଥିଲା କାଟିବାକୁ ସଜବାଜ ହେବା ବେଳକୁ ଜୱାଦ ତାହାକୁ ଛଡାଇ ନେଇଛି। ଶୈଳେନ୍ଦ୍ରନଗରର ହରି ମଣ୍ଡଳ, ରଙ୍ଗଣୀର ବନବିହାରୀ ଜେନା ମଧ୍ୟ ସମାନ କଥା ଦୋହରାଇଛନ୍ତି। ପାଚିଲା ଧାନ ଫସଲ ପାଣିରେ ଲୋଟିକି ରହିଛି। କେବଳ ଏହି ଗାଁ ନୁହେଁ, ବ୍ଲକର ୨୯ ପଞ୍ଚାୟତର ପ୍ରାୟ ୪୦ ହଜାର ଚାଷୀ ପରିବାର ଅଦିନିଆ ବର୍ଷା ଯୋଗୁ ପ୍ରଭାବିତ ହୋଇଛନ୍ତି। ଶହେ ପ୍ରତିଶତ ପାଚିଲା ଧାନ ଫସଲ ପାଚି ସାରିଛି। ବର୍ଷା ଯୋଗୁ ପାଚିଲା ପାଣିରେ ଉବୁଡୁବୁ ହେଉଛି। ବର୍ଷକର ଦାନା ସମ୍ପୂର୍ଣ୍ଣ ଉଜୁଡି ଯିବ। ରାଜନଗର ବ୍ଲକ ନଦୀ ନାଳ ଘେରା ଅଞ୍ଚଳ। ଏହି ବ୍ଲକର ୮୦ ପ୍ରତିଶତ ଲୋକ ଧାନ ଫସଲ ଚାଷ କରିଥାନ୍ତି। ବ୍ଲକ ଅଣଜଳସେଚିତ ଅଞ୍ଚଳ ହୋଇଥିବାରୁ ଏଠାରେ ୯୫ ପ୍ରତିଶତ ଚାଷୀ କେବଳ ଖରିଫ ଧାନ ଫସଲ ଉପରେ ନିର୍ଭର କରିଥାନ୍ତି। ରାଜନଗର ବ୍ଲକରେ ଚଳିତବର୍ଷ ୨୨ ହଜାର ହେକ୍ଟରରୁ ଅଧିକ ଚାଷ ଜମିରେ ଧାନ ଚାଷ ହୋଇଥିଲା।