ଶାହରୁଖ ଖାନଙ୍କ ବହୁ ପ୍ରତୀକ୍ଷିତ ଫିଲ୍ମ ‘ଯବାନ’ ପ୍ରେକ୍ଷାଳୟରେ ମୁକ୍ତିଲାଭ କରିଛି। ଫିଲ୍ମଟି ପ୍ରଥମ ଦିନରେ ଜବରଦସ୍ତ ଆୟ କରିଛି। ଏହା ଦେଶର ସବୁଠୁ ବଡ ଓପନିଂ ଫିଲ୍ମର ରେକର୍ଡ ମଧ୍ୟ କରିଛି। ଏପରିକି ‘ଯବାନ’ ପ୍ରଥମ ଦିନରେ ‘ପଠାନ’, ‘ଗଦର ୨’ ଭଳି ଫିଲ୍ମର ରେକର୍ଡ ଭାଙ୍ଗିଛି।
ଶାହାରୁଖଙ୍କ ‘ଯବାନ’ ରିଲିଜ ହେବାର ପ୍ରଥମ ଦିନରେ ବମ୍ପର ରୋଜଗାର କରି ଇତିହାସ ସୃଷ୍ଟି କରିଛି। ଏହା ସହ ‘ଯବାନ’ ବଲିଉଡର ସବୁଠୁ ବଡ ଓପନିଂ ଫିଲ୍ମ ପାଲଟିଛି। ଅଗ୍ରୀମ ବୁକିଂର ପ୍ରଥମ ଦିନରୁ ରେକର୍ଡ ସୃଷ୍ଟି କରୁଥିବା ‘ଯବାନ’ର ପ୍ରଥମ ଦିନରେ ଘରୋଇ ବକ୍ସ ଅଫିସରେ ୭୫ କୋଟି ଟଙ୍କା ସଂଗ୍ରହ କରିଛି। ଏହି ଫିଲ୍ମ ପ୍ରଥମ ଦିନରେ ହିନ୍ଦୀ ସଂସ୍କରଣରେ ୬୩ ରୁ ୬୫ କୋଟି ନିଟ ସଂଗ୍ରହ କରିଛି ଏବଂ ଏହା ସହିତ ‘ପଠାନ’ର ରେକର୍ଡ ଭାଙ୍ଗିଛି। ପ୍ରଥମ ଦିନରେ ‘ପଠାନ’ ୫୫ କୋଟି ରୋଜଗାର କରିଥିଲା।
୩୦୦ କୋଟି ବଜେଟରେ ନିର୍ମିତ ହୋଇଥିବା ‘ଯବାନ’ ହିନ୍ଦୀ, ତାମିଲ ଓ ତେଲଗୁ ଭାଷାରେ ମୁକ୍ତିଲାଭ କରିଛି। ଫିଲ୍ମରେ ସୁପରଷ୍ଟାର ଶାହରୁଖ ଦମଦାର ଆକ୍ସନ ରହିଛି। ପ୍ରସିଦ୍ଧ ନିର୍ଦ୍ଦେଶକ ଏଟଲିଙ୍କ ନିର୍ଦ୍ଦେଶିତ ‘ଯବାନ’ ଫିଲ୍ମରେ ଶାହରୁଖଙ୍କ ବ୍ୟତୀତ ଦୀପିକା ପାଦୁକୋନ, ନୟନତାରା, ସାନ୍ନ୍ୟା ମାଲହୋତ୍ରା, ସୁନୀଲ ଗ୍ରୋଭର, ଯୋଗୀ ବାବୁ ଏବଂ ତା’ ସହିତ ବିଜୟ ସେତୁପତିଙ୍କୁ ଭିନ୍ନ ଏକ ଅନ୍ଦାଜରେ ଦେଖିବାକୁ ମିଳିଛି।