ମାଞ୍ଚେଷ୍ଟର,୧୩।୯: ଆଗାମୀ ବର୍ଷ ଜୁଲାଇରେ ଭାରତୀୟ ଦଳ ଇଂଲଣ୍ଡ ଗସ୍ତ କରି ୩ ମ୍ୟାଚ୍ ବିଶିଷ୍ଟ ଟି୨୦ ସିରିଜ୍ ଖେଳିବାର ଅଛି। ସେହି ସିରିଜ୍ରେ ଅତିରିକ୍ତ ୨ଟି ଟି୨୦ ମ୍ୟାଚ୍ ଖେଳିବାକୁ ଇଂଲଣ୍ଡ ଓ ଓ୍ବେଲ୍ସ କ୍ରିକେଟ ବୋର୍ଡ (ଇସିବି)କୁ ଏକ ପ୍ରସ୍ତାବ ଦେଇଛି ବିସିସିଆଇ। ଏ ନେଇ ବିସିସିଆଇ ପକ୍ଷରୁ ସୋମବାର ସ୍ପଷ୍ଟ କରାଯାଇଛି।
ବାତିଲ ହୋଇଥିବା ୫ମ ତଥା ଅନ୍ତିମ ଟେଷ୍ଟ ମ୍ୟାଚ୍ର ବନ୍ଧୁତ୍ୱପୂର୍ଣ୍ଣ ଫଳାଫଳ ପାଇଁ ଇସିବିକୁ ଉକ୍ତ ପ୍ରସ୍ତାବ ଦିଆଯାଇଥିବା ବିସିସିଆଇ ସମ୍ପାଦକ ଜୟ ଶାହ କହିଛନ୍ତି। ଇଂଲଣ୍ଡ ସହ ଅତିରିକ୍ତ ଦୁଇଟି ଟି୨୦ ମ୍ୟାଚ୍ ଖେଳିବାକୁ ବିସିସିଆଇ ରାଜି। ଯଦ୍ଦ୍ବାରା ମାଞ୍ଚେଷ୍ଟର ଟେଷ୍ଟ ବାତିଲ ହେବା ଯୋଗୁ ଇସିବି ସହିଥିବା କ୍ଷୟକ୍ଷତିର ପୂରଣ ହୋଇପାରିବ। ଓଲ୍ଡ ଟ୍ରାଫର୍ଡ ଟେଷ୍ଟ ବାତିଲ ହେବା ପରେ ବିସିସିଆଇଠାରୁ ଫରଫିଟ୍ ଦାବି କରିଥିଲା ଇସିବି।
ଆଗାମୀ ବର୍ଷ ଜୁଲାଇରେ ଇଂଲଣ୍ଡରେ ୩ ଟି୨୦ ମ୍ୟାଚ୍ ପରିବର୍ତ୍ତେ ଭାରତ ୫ ମ୍ୟାଚ୍ ବିଶିଷ୍ଟ ଟି୨୦ ସିରିଜ୍ ଖେଳିବାକୁ ଆମେ ପ୍ରସ୍ତାବ ଦେଇଛୁ। ବିକଳ୍ପ ଭାବେ ଆମେ ଏକମାତ୍ର ଟେଷ୍ଟ ମ୍ୟାଚ୍ ଖେଳିବାକୁ ଇଚ୍ଛୁକ। ଏବେ ସେମାନଙ୍କ ଉପରେ ସବୁ କିଛି ନିର୍ଭର କରେ ବୋଲି ଶାହ କହିଛନ୍ତି।
କିଛି ରିପୋର୍ଟ ଅନୁଯାୟୀ, ୫ମ ଟେଷ୍ଟର ଫଳାଫଳ ନିର୍ଣ୍ଣୟ କରିବା ପାଇଁ ଆଇସିସିର ଡିଆର୍ସି (ବିବାଦର ସମାଧାନକାରୀ କମିଟି) ନିକଟରେ ଇସିବି ଦ୍ୱାରସ୍ତ ହୋଇଛି। କମିଟି ନିକଟରେ ବାତିଲ ହୋଇଥିବା ଟେଷ୍ଟକୁ ଫରଫିଟ୍ ଭାବେ ଗଣନା କରିବାକୁ ଦାବି କରିଛି ଇଂଲିଶ ବୋର୍ଡ। ତେବେ ଇସିବି ତା’ର ଦାବିରୁ ଓହରିଲା ପରେ ହିଁ ଅତିରିକ୍ତ ମ୍ୟାଚ୍ ଖେଳାଯିବ ବୋଲି ଶାହ ସ୍ପଷ୍ଟ କରିଛନ୍ତି।