ଅହମ୍ମଦାବାଦ,୨୪।୧୨: ବିସିସିଆଇ ସଭାପତି ସୌରଭ ଗାଙ୍ଗୁଲି ବିଶ୍ୱର ସର୍ବବୃହତ କ୍ରିକେଟ ଷ୍ଟାଡିୟମରେ ଅର୍ଦ୍ଧଶତକ ହାସଲ କରିଥିବା ପ୍ରଥମ ଖେଳାଳି ହୋଇଛନ୍ତି। ସେ ବିସିସିଆଇ ସଚିବ ଜୟ ଶାହାଙ୍କ ଦଳ ବିପକ୍ଷରେ ଅର୍ଦ୍ଧଶତକ ହାସଲ କରିଛନ୍ତି। ଡିସେମ୍ବର ୨୪ରେ ଅହମ୍ମଦାବାଦର ମୋଟେରା ଷ୍ଟାଡିୟମରେ ବିସିସିଆଇ ବାର୍ଷିକ ସାଧାରଣ ସଭା ଅନୁଷ୍ଠିତ ହେବ ଏବଂ ଏହି ବୈଠକ ପୂର୍ବରୁ ବୋର୍ଡର ଚେୟାରମ୍ୟାନ ଗାଙ୍ଗୁଲି ଏବଂ ସଚିବ ଶାହାଙ୍କ ମଧ୍ୟରେ ଏକ ବନ୍ଧୁତ୍ୱପୂର୍ଣ୍ଣ ମ୍ୟାଚ ଖେଳାଯାଇଥିଲା। ଏହି ମ୍ୟାଚ୍ରେ ଶାହାଙ୍କ ଦଳ ଗାଙ୍ଗୁଲିଙ୍କ ଦଳକୁ ୨୮ ରନ୍ରେ ପରାସ୍ତ କରିଛି। ଗାଙ୍ଗୁଲି ବ୍ୟାଟିଂ କରିବାକୁ ପଡ଼ିଆକୁ ଓହ୍ଳାଇ ୩୨ଟି ବଲରୁ ୫୩ ରନ୍ର ଇନିଂସ ଖେଳି ନଟ୍ଆଉଟ୍ ରହିତତ୍ଲେ। କେବଳ ଏତିକି ନୁହେଁ, ସେ ଚମତ୍କାର ବୋଲିଂ ମଧ୍ୟ କରିଥିଲେ। ୩ ଓଭରରେ ୨୬ ରନ ଦେଇ ଗୋଟିଏ ଉଇକେଟ ନେଇଥିଲେ। ବିସିସିଆଇ ସଚିବ ଜୟ ଶାହା ଗାଙ୍ଗୁଲିଙ୍କ ଶିକାର ହୋଇଥିଲେ। ଜୟ ଶାହା ତାଙ୍କ ଦଳ ପାଇଁ ମାତ୍ର ଦୁଇ ରନ ସ୍କୋର କରିବାରେ ସକ୍ଷମ ହୋଇଥିଲେ। ଅବସର ପରେ ମଧ୍ୟ ଗାଙ୍ଗୁଲି ଏକ ବଡ଼ ରେକର୍ଡ ସୃଷ୍ଟି କରିବାରେ ସଫଳ ହୋଇଥିଲେ। ବିଶ୍ୱର ସର୍ବବୃହତ କ୍ରିକେଟ ଷ୍ଟାଡିୟମରେ ସେ ଅର୍ଦ୍ଧଶତକ ହାସଲ କରିଥିଲେ। ଏହି ଷ୍ଟାଡିୟମ ୬୩ ଏକର ଜମି ଉପରେ ବ୍ୟାପିଛି ଏବଂ ଏହାର ପୁନଃନିର୍ମାଣ ପାଇଁ ପ୍ରାୟ ୭୫୦ କୋଟି ଟଙ୍କା ଖର୍ଚ୍ଚ ହୋଇଛି। ଏହି ଷ୍ଟାଡିୟମ ମେଲବର୍ନ କ୍ରିକେଟ ଗ୍ରାଉଣ୍ଡ ଠାରୁ ବଡ। ଏଥିରେ ୧ ଲକ୍ଷ ୧୦ ହଜାର ଦର୍ଶକଙ୍କ ବସିବାର କ୍ଷମତା ଅଛି।
