ପୁରୀ ଅଫିସ,୨୫।୮: ବଗଲା ଧର୍ମଶାଳା ଜମି ବିବାଦ ଦିନକୁ ଦିନ ଅଧିକ ଜଟିଳ ହୋଇପଡୁଛି। ଏହି ଧର୍ମଶାଳାର ଜମି ବିକ୍ରିକୁ ଭାଜପା, କଂଗ୍ରେସ ଏବଂ ସିପିଆଇ(ଏମ୍) ପକ୍ଷରୁ ବିରୋଧ, ବିକ୍ଷୋଭ ଓ ପ୍ରତିବାଦ ଜାରି ରହିଛି। ସୋମବାର ପୁରୀ ବିଧାୟକ ଜୟନ୍ତ ଷଡ଼ଙ୍ଗୀ ଏହି ପ୍ରସଙ୍ଗରେ କେନ୍ଦ୍ର ସଂସ୍କୃତି ଓ ପର୍ଯ୍ୟଟନ ମନ୍ତ୍ରୀ ପ୍ରହଲ୍ଲାଦ ସିଂ ପଟେଲ ଏବଂ କେନ୍ଦ୍ର ପେଟ୍ରୋଲିୟମ ମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କୁ ଚିଠି ଲେଖିଛନ୍ତି। ପୁରୀ ଜିଲାପାଳଙ୍କ ବେଆଇନ କାମ ଯୋଗୁ ଆଇନ ଶୃଙ୍ଖଳା ପରିସ୍ଥିତି ସୃଷ୍ଟି ହୋଇପାରେ। ତେଣୁ ଏଥିରେ ବ୍ୟକ୍ତିଗତ ଭାବେ ହସ୍ତକ୍ଷେପ କରିବାକୁ ବିଧାୟକ ଷଡ଼ଙ୍ଗୀ ଦୁଇ କେନ୍ଦ୍ର ମନ୍ତ୍ରୀଙ୍କୁ ଅନୁରୋଧ ଜଣାଇଛନ୍ତି।
ବିଧାୟକ ଷଡ଼ଙ୍ଗୀ ତାଙ୍କ ଚିଠିରେ ଦର୍ଶାଇଛନ୍ତି ଯେ, ୧୯୦୪ ମସିହାରେ ବଳଗଣ୍ଡି ମୌଜାର ୨ ଏକର ୫୭୪ ଡେସିମିଲ ଜମିରେ ବାବୁ କହ୍ନେୟାଲାଲ ବଗଲା ଏକ ଧର୍ମଶାଳା ତିଆରି କରିଥିଲେ। ପୁରୀ ଆସୁଥିବା ଗରିବ ଓ ମଧ୍ୟବିତ୍ତ ଶ୍ରେଣୀର ଭକ୍ତମାନେ ଯେପରି କମ୍ ଅର୍ଥରେ ଏଠାରେ ସୁବିଧାରେ ରହିପାରିବେ ସେଥିପାଇଁ ୧୯୦୫ରେ ସେ ଏହି ଧର୍ମଶାଳାକୁ ପୁରୀ ଜିଲାପାଳ ତଥା ଲଜିଂ ହାଉସ୍ ଫଣ୍ଡ କମିଟି ସଭାପତିଙ୍କୁ ହସ୍ତାନ୍ତର କରିଥିଲେ। ଫଳରେ ଭାରତର ବିଭିନ୍ନ ସ୍ଥାନରୁ ଆସୁଥିବା ତୀର୍ଥଯାତ୍ରୀ, ଭକ୍ତ ଏହାଦ୍ୱାରା ଉପକୃତ ହେଉଥିଲେ। ମାତ୍ର ୨୦୧୮ରେ ରାଜ୍ୟ ସରକାର ଓଡ଼ିଶା ପ୍ଲେସେସ୍ ଅଫ୍ ପିଲିଗ୍ରିମେଜ୍ ଆଇନ ୧୯୨୦କୁ ଉଚ୍ଛେଦ କରିବା ସହ ଲଜିଂ ହାଉସ୍ ଫଣ୍ଡ କମିଟିକୁ ଭାଙ୍ଗି ଦେଇଥିଲେ। ବଗଲା ଧର୍ମଶାଳାର ପୁନରୁଦ୍ଧାର କାମ ଚାଲିଥିବାବେଳେ ଏହାକୁ ହଠାତ୍ ବନ୍ଦ କରି ଦିଆଯାଇଥିଲା। ଚଞ୍ଚକତା କରାଯାଇ ବଗଲା ଜମିକୁ ଏବେ ବେଆଇନ ଭାବେ ବିକ୍ରି କରାଯାଇଛି। ଏହାକୁ ନେଇ ଜନସାଧାରଣଙ୍କ ମଧ୍ୟରେ ତୀବ୍ର ଅସନ୍ତୋଷ ପ୍ରକାଶ ପାଇଛି। ଆଗକୁ ଏହା ଆଇନ ଶୃଙ୍ଖଳା ପରିସ୍ଥିତିର କାରଣ ହୋଇପାରେ। ତେଣୁ ଏଥିରେ ବ୍ୟକ୍ତିଗତ ଭାବେ ହସ୍ତକ୍ଷେପ କରିବାକୁ ଜୟନ୍ତ ଦୁଇ କେନ୍ଦ୍ର ମନ୍ତ୍ରୀଙ୍କୁ ଅନୁରୋଧ କରିଛନ୍ତି।
ଅନ୍ୟପକ୍ଷରେ ଭାଜପା ପକ୍ଷରୁ ଗତ ତିନିଦିନ ଭଳି ସୋମବାର ମଧ୍ୟ ବଗଲା ଧର୍ମଶାଳା ସମ୍ମୁଖରେ ଧାରଣା ଦିଆଯାଇଥିଲା। ବଗଲା ଜମିର ଯେଉଁ ବିକ୍ରି କବଲା କରାଯାଇଛି ତାହାକୁ ରଦ୍ଦ କରାଯାଉ। ବଗଲା ଧର୍ମଶାଳାର ପୁନରୁଦ୍ଧାର କରାଯାଇ ଗରିବ ଭକ୍ତଙ୍କ ରହଣି ସୁବିଧା ହେଉ ବୋଲି ଭାଜପା ଦାବି କରିଛି। ବିଧାୟକ ଷଡ଼ଙ୍ଗୀଙ୍କ ସହ ଭାଜପାର ପୂର୍ବତନ ଜିଲା ସଭାପତି ପ୍ରଭଞ୍ଜନ ମହାପାତ୍ର, ଯୁବମୋର୍ଚ୍ଚା ସଭାପତି ଜୟନ୍ତ ଦାଶ, ବିଜୟ ପ୍ରଧାନ, ସୋମନାଥ ଦାସ, ସୌମ୍ୟା ମିଶ୍ର, ଅନୀତା ପଟ୍ଟନାୟକ, ଅଜିତ ସାମନ୍ତରାୟ, ବିଶ୍ୱଜିତ ମହାନ୍ତି, ପ୍ରଦୀପ ପରିଡ଼ା ପ୍ରମୁଖ ଏହି ଧାରଣାରେ ସାମିଲ ଥିଲେ। ମଙ୍ଗଳବାର ଯୁବ କଂଗ୍ରେସ ପକ୍ଷରୁ ବଗଲା ଧର୍ମଶାଳା ଆଗରେ ପ୍ରତିବାଦ ସଭା କରାଯିବ। ସେହିପରି ଭାଜପା ମହିଳା ମୋର୍ଚ୍ଚା ପକ୍ଷରୁ ଧାରଣା ଦିଆଯିବ ବୋଲି ଜଣାପଡ଼ିଛି।