ନୂଆଦିଲ୍ଲୀ,୧୭।୨: ଭାରତୀୟ ଅଫ୍ ସ୍ପିନ୍ ଅଲରାଉଣ୍ଡର ଜୟନ୍ତ ଯାଦବ ବିବାହ ବନ୍ଧନରେ ବାନ୍ଧି ହୋଇଛନ୍ତି। ପ୍ରେମିକା ଦିଶା ଚାଓ୍ବଲାଙ୍କୁ ସେ ଜୀବନସାଥୀ କରିଛନ୍ତି। ପାରମ୍ପରିକ ପାର୍ସି ରୀତିନୀତିରେ ସେମାନେ ବିବାହ କରିଛନ୍ତି। ଏହାର ଅନେକ ଫଟୋ ସୋସିଆଲ ମିଡିଆରେ ଶେୟାର କରିଛନ୍ତି। ଏହାପରେ ପ୍ରଶଂସକ ତଥା ସାଥୀ ଖେଳାଳିମାନେ ଏହି କ୍ରିକେଟରଙ୍କୁ ଅଭିନନ୍ଦନ ବାର୍ତ୍ତା ଏବଂ ଶୁଭେଚ୍ଛା ଜଣାଉଛନ୍ତି।
ଜୟନ୍ତଙ୍କୁ ତାଙ୍କ ଆଇପିଏଲ୍ ଦଳ ମୁମ୍ବାଇ ଇଣ୍ଡିଆନ୍ସ ଅଭିନନ୍ଦନ ଜଣାଇଛି। ସେ ଶେୟାର କରିଥିବା ଫଟୋରେ ବିବାହର ଶୁଭେଚ୍ଛା ବୋଲି ଟିମ୍ କହିଛି। ସେହିଭଳି ସ୍ପିନର ଯୁଜବେନ୍ଦ୍ର ଚହଲ ମଧ୍ୟ ଜୟନ୍ତଙ୍କୁ ବିବାହର ଶୁଭକାମନା କରି ‘ଉଭୟଙ୍କୁ ଅଭିନନ୍ଦନ’ ବୋଲି କହିଛନ୍ତି।
୨୦୧୬ରେ ଆନ୍ତର୍ଜାତୀୟ ସ୍ତରରେ ଡେବ୍ୟୁ କରିଥିଲେ ଜୟନ୍ତ। ଇଂଲଣ୍ଡ ବିପକ୍ଷ ଡେବ୍ୟୁ ଟେଷ୍ଟରେ ସେ ୬୨ରନ୍ କରି ୪ ଉଇକେଟ ନେଇଥିଲେ। ସେ ମୋଟ ୪ ଟେଷ୍ଟ ଖେଳିଥିବା ବେଳେ ୨୨୮ରନ୍ କରିଛନ୍ତି। ସେ ୧୪ଟି ଆଇପିଏଲ୍ ମଧ୍ୟ ଖେଳିଛନ୍ତି। ତେବେ ଦିଶାଙ୍କ ସହ ସେ ୨୦୧୯ରେ ନିର୍ବନ୍ଧ କରିନେଇଥିଲେ। ଏବେ ସେ ବିବାହ କରି ପ୍ରଶଂସକଙ୍କୁ ଖୁସି ଖବର ଜଣାଇଛନ୍ତି।