ନୂଆଦିଲ୍ଲୀ,୨୪।୭: ଅଗଷ୍ଟ ୪ରୁ ଭାରତ-ଇଂଲଣ୍ଡ ମଧ୍ୟରେ ୫ ମ୍ୟାଚ୍ ବିଶିଷ୍ଟ ଟେଷ୍ଟ ସିରିଜ୍ ଖେଳାଯିବ। ହେଲେ ସିରିଜ୍ ଆରମ୍ଭ ହେବା ପୂର୍ବରୁ ଭାରତୀୟ ଦଳର କିଛି ଖେଳାଳି ଆହତ ସମସ୍ୟା ଦେଇ ଗତି କରୁଛନ୍ତି। ତିନି ଭାରତୀୟ ଖେଳାଳି ଶୁଭମନ ଗିଲ, ଓ୍ବାଶିଂଟନ ସୁନ୍ଦର ଏବଂ ଆଭେଶ ଆହତ ହୋଇଛନ୍ତି। ଏଭଳି ପରିସ୍ଥିତିରେ ଦଳରେ ଖେଳାଳିଙ୍କ ସଂଖ୍ୟା କମ୍ ଥିବାରୁ ଭାରତୀୟ ଚୟନକର୍ତ୍ତାମାନେ ଅନ୍ୟ ଖେଳାଳିଙ୍କୁ ଇଂଲଣ୍ଡ ପଠାଇପାରନ୍ତି ବୋଲି କୁହାଯାଉଛି।
ଓପନର୍ ଶୁଭମନଙ୍କ ଆଘାତ ଭାରତୀୟ ଦଳ ପାଇଁ ପ୍ରଥମ ଝଟକା ଥିଲା। ଏହାପରେ ଆଉ ଦୁଇଜଣ ଆହତ ହୋଇଥିଲେ। ଏଣୁ ଚୟନକର୍ତ୍ତାଙ୍କ ପାଖରେ ଅନ୍ୟ ଖେଳାଳି ପଠାଇବା ବ୍ୟତିତ ଅନ୍ୟ କୌଣସି ବିକଳ୍ପ ନାହିଁ। ନିକଟରେ ଶ୍ରୀଲଙ୍କା ବିପକ୍ଷ ୩ ମ୍ୟାଚ୍ ବିଶିଷ୍ଟ ଏକଦିବସୀୟ ସିରିଜରେ ଚମତ୍କାର ପ୍ରଦର୍ଶନ କରିଥିବା ପୃଥ୍ବୀ ଶ, ସୂର୍ଯ୍ୟକୁମାର ଯାଦବଙ୍କୁ ଇଂଲଣ୍ଡକୁ ପଠାଯିବ। ଏଥିସହ ଜୟନ୍ତ ଯାଦବ ମଧ୍ୟ ଇଂଲଣ୍ଡ ଯାଇପାରନ୍ତି ବୋଲି କୁହାଯାଉଛି। ଏହି ତିନି ଖେଳାଳି ଶୀଘ୍ର ଇଂଲଣ୍ଡ ଯାଇପାରନ୍ତି। ଅପରପକ୍ଷେ ଆବେଶ ନେଟ୍ ବୋଲର ଭାବେ ଇଂଲଣ୍ଡ ଗସ୍ତରେ ଯାଇଥିଲେ। ଏଣୁ ତାଙ୍କର ସ୍ଥାନରେ ଅନ୍ୟ ଖେଳାଳି ଖେଳାଇବାର ଆବଶ୍ୟକତା ପଡ଼ିନାହିଁ।
