ଭୁବନେଶ୍ୱର, ୨୭।୩(କ୍ରୀଡ଼ା ପ୍ରତିନିଧି)-
ବେଙ୍ଗାଲୁରୁଠାରେ ଚାଲିଥିବା ୧୯ତମ ଜାତୀୟ ପାରା ଆଥଲେଟିକ୍ ଚାମ୍ପିୟନଶିପ୍ରେ ସ୍ବର୍ଣ୍ଣ ପଦକ ହାସଲରେ ହ୍ୟାଟ୍ରିକ କରିଛନ୍ତି ଓଡ଼ିଶା ସ୍ପ୍ରିଣ୍ଟର ଜୟନ୍ତୀ ବେହେରା। ପୂର୍ବରୁ ୪୦୦ ମିଟରେ ସ୍ବର୍ଣ୍ଣ ପଦକ ପାଇଥିବା ଜୟନ୍ତି ଶୁକ୍ରବାର ଉଭୟ ୨୦୦ ଓ ୧୦୦ ମିଟରରେ ମଧ୍ୟ ସ୍ବର୍ଣ୍ଣିମ ସଫଳତା ପାଇଛନ୍ତି। ୨୦୦ ମିଟର ରେସ୍ ଟି୪୭ କାଟେଗୋରିରେ ଜୟନ୍ତି ୨୬.୪୯ ସେକେଣ୍ଡ ସମୟ ନେଇଥିବାବେଳେ ୧୦୦ ମିଟର ଦୂରତ୍ୱକୁ ୧୩.୧୧ ସେକେଣ୍ଡରେ ଅତିକ୍ରମ କରିଥିଲେ। ଗୁରୁବାର ସେ ୪୦୦ ମିଟର ରେସ୍ରେ ୫୯.୪୩ ସେକେଣ୍ଡ ଟାଇମିଂ ସହ ସ୍ବର୍ଣ୍ଣ ପାଇଥିଲେ। ପ୍ରକାଶ ଯୋଗ୍ୟ ଯେ, ଏହାକୁ ମିଶାଇ ଜୟନ୍ତୀ ୫ ଥର ପାରା ଆଥଲେଟିକ୍ ଚାମ୍ପିୟନଶିପ୍ ଖେଳିଛନ୍ତି। ସବୁଥର ସେ ୧୦୦, ୨୦୦ ଓ ୪୦୦ ମିଟରରେ ସ୍ବର୍ଣ୍ଣ ପଦକ ହାସଲ କରିଛନ୍ତି। ଓଡ଼ିଶା ପାରା ସ୍ପୋଟର୍ସ ଆସୋସିଏଶନ ପକ୍ଷରୁ ତାଙ୍କୁ ଅଭିନନ୍ଦନ ଜଣାଯାଇଛି। ପ୍ରକାଶ ଯୋଗ୍ୟ ଯେ, ଜୟନ୍ତି ଟୋକିଓ ପାରାଲିମ୍ପିକ୍ସ ପାଇଁ ଯୋଗ୍ୟତା ଅର୍ଜନ କରିଛନ୍ତି।
