ସୋସୋ,୪ା୪(ସତ୍ୟବ୍ରତ ଜେନା)ନିର୍ବାଚନ ଯେତିକି ପାଖଉଛି କେନ୍ଦୁଝର ଜିଲାରେ ରାଜନୀତି ପାଣିପାଗ ସେତିକି ସରଗରମ ହେଉଛି। ରାଜ୍ୟର ପ୍ରମୁଖ ନେତା ଓ ତାଙ୍କ ପୁଅ ଦଳ ବଦଳରେ ଲାଗି ରହିଥିବା ବେଳେ ଜିଲାରେ ମଧ୍ୟ ତାହାର ପ୍ରଭାବ ପଡ଼ିବ ବୋଲି ଆଲୋଚନା ହେଉଛି। ଆନନ୍ଦପୁର ବିଧାନସଭା ନିର୍ବାଚନମଣ୍ଡଳୀରର ଟାଣୁଆ କଂଗ୍ରେସ ନେତା ଜୟଦେବ ଯେନାଙ୍କ ପୁଅ ମନୋଜ ବିଜେଡି ଆଡ଼େ ମୁହଁାଇଥିବା ଚର୍ଚ୍ଚା ଜୋର ଧରିଛି।
ଆନନ୍ଦପୁର ବିଧାନସଭା କ୍ଷେତ୍ରରୁ କଂଗ୍ରେସ ଦଳ ପକ୍ଷରୁ ଜୟଦେବ ଯେନା ୪ ଥର ବିଧାୟକ ହୋଇଥିବା ବେଳେ ୨ ଥର ମନ୍ତ୍ରୀ ପଦ ହାତେଇଥିଲେ। ଏଥର ଭାଜପା ଆଲୋକ ସେଠୀଙ୍କୁ ବିଧାୟକ ପ୍ରାର୍ଥୀ ଭାବେ ଘୋଷଣା କରିଥିବା ବେଳେ ବିଜେଡି ଓ କଂଗ୍ରେସ ପ୍ରାର୍ଥୀ ଘୋଷଣା କରିନାହାନ୍ତି। ତେବେ ଏଠାରେ ଜୟଦେବ ଯେନାଙ୍କ ସହ ତାଙ୍କ ବଡ଼ ପୁଅ ସଂଗ୍ରାମ କଂଗ୍ରେସକୁ ମଜବୁତ କରି ଆସିଥିଲେ ସୁଦ୍ଧା ସଂଗ୍ରାମଙ୍କ ହଠାତ୍ ଦେହାନ୍ତ ସମସ୍ତଙ୍କୁ ଆଶ୍ଚର୍ଯ୍ୟ କରିଦେଇଥିଲା। ବଡ଼ ପୁଅଙ୍କ ଦେହାନ୍ତ ପରେ ରାଜନୀତିରେ ଜୟଦେବଙ୍କ କାନ୍ଧରେ କାନ୍ଧ ମିଳାଇ ସାନପୁଅ ମନୋଜ ସହଯୋଗ କରିଆସୁଛନ୍ତି। ଆନନ୍ଦପୁରରେ ହୋଇ ଆସିଥିବା ବିଭିନ୍ନ କଂଗ୍ରେସ ସଭା, ସମାବେଶ, ବିକ୍ଷୋଭ ଆଦି କାର୍ଯ୍ୟକ୍ରମରେ ସାମିଲ ହୋଇ ବିଜେଡି ଶାସନ ବିରୋଧରେ ଗର୍ଜିବା ସହ ଚଳିତ ବର୍ଷ ଆନନ୍ଦପୁର ବାସୀ କଂଗ୍ରେସକୁ ଭୋଟ ଦେଇ ଜୟଯୁକ୍ତ କରିଲେ ଅଞ୍ଚଳର ସମସ୍ତ ସମସ୍ୟା ସମାଧାନ କରିବାକୁ ପ୍ରତିଶ୍ରୁତି ଦେଉଥିଲେ। ମାତ୍ର କିଛି ଦିନ ହେବ ସେ ନିରବ ରହୁଥିବାରୁ ବିଜେଡିର ସର୍ପରାଇଜ କାର୍ଡକୁ ଲକ୍ଷ୍ୟ କରି ମନୋଜଙ୍କ ନଁାକୁ ଯୋଡି ବହୁ କଥା ଶୁଣିବାକୁ ମିଳୁଛି। ଆନନ୍ଦପୁର ବିଧାନସଭା କ୍ଷେତ୍ରରେ ଏ ପର୍ଯ୍ୟନ୍ତ ବିଜେଡି ତାର ପ୍ରାର୍ଥୀ ଘୋଷଣା କରି ନ ଥିବା ବେଳେ ମନୋଜ ଉପଯୁକ୍ତ ସମୟରେ ବିଜେଡିରେ ସାମିଲ ହୋଇ ଟିକେଟ ହାତେଇ ପାରନ୍ତି ବୋଲି ବିଧାନସଭା କ୍ଷେତ୍ରରେ ଚର୍ଚ୍ଚା ଜୋର ଧରିଛି।